"ვფიქრობ, იხილავთ აშშ-ს ზომებს მათ წინააღმდეგ, ვინც საქართველოში ძალადობს" - ჰელსინკის კომისია
ჰელსინკის კომისია სანქციებზე
აშშ-ს კონგრესის ჰელსინკის კომისიაში საქართველოში განვითარებულ მოვლენებს ეხმაურებიან. სენატორ ბენ კარდინისა და კომისიის თავმჯდომარე, რესპუბლიკელი კონგრესმენის, ჯო უილსონის თქმით, აშშ-მ ქართველ ხალხს მხარი უნდა დაუჭიროს და ივანიშვილის რეჟიმის წინააღმდეგ ზომები უნდა მიიღოს. ამის შესახებ კარდინმა და უილსონმა “ამერიკის ხმასთან” საუბრისას განაცხადეს.
“ვფიქრობ, თქვენ იხილავთ აშშ-სგან ზომებს მათ წინააღმდეგ, ვინც საქართველოში ამ ძალადობას სჩადის. ხალხის ნება არ სრულდება, ამას რეაგირება ყველგან უნდა მოჰყვეს”. – თქვა კარდინმა იმ პირების შესახებ, რომლებიც საქართველოში მიმდინარე საპროტესტო აქციებზე მშვიდობიან დემონსტრანტებზე ძალადობენ.
ჯო უილსონის თქმით კი, საქართველოში ბოლო დროს განვითარებულ მოვლენებში დამნაშავე რუსეთის პრეზიდენტი ვლადიმირ პუტინია:
ძალზე შეშფოთებული ვარ იმის გამო, რომ საქართველოში არჩევნები ნამდვილად გაყალბდა. აის სრული აღქმა უნდა არსებობდეს, ევროკავშირი და სხვებიც ამ დასკვნამდე უნდა მივიდნენ ეს ომის დამნაშავე პუტინმა გააკეთა. ეს ძალზე სამწუხაროა, რადგან საქართველოს ისეთი ბრწყინვალე მომავალი ელოდა!
ამასთან, რესპუბლიკელმა კონგრესმენმა და MEGOBARI Act-ის ავტორმა დასძინა, რომ ქართველი ხალხისთვის რუსული აგრესია სიახლე არ არის და თბილისი კვლავ თავისუფალი და დამოუკიდებელი უნდა გახდეს.
“ამასთან [ქართველები ნამდვილად თავადაც იყვნენ კრიმინალი პუტინის ომის აგრესიის მსხვერპლნი… თბილისი კვლავ თავისუფალი და დამოუკიდებელი უნდა გახდეს. საქართველოში შესანიშნავი ადამიანების ცხოვრობენ, ვამაყობ საქართველოს პრეზიდენტის სიმამაცით. მათ ყველამ უნდა დაუჭიროს მხარი”. – თქვა უილსონმა ამერიკის ხმასთან საუბრისას.
აშშ-ს ჰელსინკის კომისიის თანათავმჯდომარე სენატორები ბენ კარდინი, როჯერ ვიკერი და ჯონ კორნინი “ქართული ოცნების” მიერ ევროკავშირში გაწევრიანების მოლაპარაკებების შეჩერებასა და მიმდინარე საპროტესტო აქციებს 3 დეკემბერს გამოეხმაურნენ. მათი თქმით, ოცნების უარი ევროკავშირთან მოლაპარაკებებზე ქართველი ხალხის ღალატია.
სენატორებმა განცხადებაში ქართველი ხალხისა და მათი ევროატლანტიკური მისწრაფებებისადმი მხარდაჭერა გაიმეორეს და ივანიშვილის რეჟიმის მიერ მშვიდობიანი პროტესტის ძალადობრივი გზით ჩახშობის მცდელობები დაგმეს.
4 დეკემბერს საქართველოში მიმდინარე პოლიტიკურ მოვლენებთან დაკავშირებით, ამერიკის შეერთებული შტატების ჰელსინკის კომისიის თავმჯდომარემ, ჯო უილსონმა საგანგებო განცხადება გაავრცელა.
ჯო უილსონი სახელმწიფო დეპარტამენტს და ევროპულ მოკავშირეებს მოუწოდებს, თბილისის მერს, შინაგან საქმეთა მინისტრსა და “რეპრესიების ორგანიზებაზე პასუხისმგებელ ყველა პირს” პერსონალური სანქციები დაუწესონ.
