"პარტნიორიდან პრობლემამდე: საქართველოს ანტი-ამერიკული შემობრუნება“ - ჰელსინკის კომისია მოსმენას გამართავს
ჰელსინკის კომისია მოსმენას გამართავს
აშშ-ის ჰელსინკის კომისია 10 სექტემბერს გამართავს მოსმენას თემაზე – “პარტნიორიდან პრობლემამდე: საქართველოს ანტი-ამერიკული შემობრუნება“. შეხვედრა ვაშინგტონში, “რეიბერნის“ საკონგრესო ოფისის შენობაში გაიმართება და პირდაპირ ეთერში იქნება ხელმისაწვდომი.
კომისიის ცნობით, მმართველი პარტია “ქართული ოცნება“ ქვეყანას რუსეთის ორბიტაში აბრუნებს, ამყარებს ურთიერთობებს ჩინეთთან და სხვა აშშ-ის მოწინააღმდეგეებთან, რაც საფრთხეს უქმნის ამერიკის ინტერესებს რეგიონში. დოკუმენტში ხაზგასმულია, რომ “ქართულმა ოცნებამ“ დაასუსტა საქართველოს ინსტიტუტები, შელახა ქვეყნის სუვერენიტეტი, ხელი შეუწყო ჩინურ ინვესტიციებს და პარალელურად ამერიკულ კომპანიებს ბლოკავს “შუა დერეფნის“ მარშრუტში ჩართვაში.
ჰელსინკის კომისია აღნიშნავს, რომ საქართველოში იდევნება ოპოზიციის და ძალა გამოიყენება მშვიდობიანი მომიტინგეების წინააღმდეგ. მოსმენის ფარგლებში განიხილება საქართველოს ავტორიტარიზმისკენ სვლის გლობალური შედეგები და აშშ-ის შესაძლო პოლიტიკა, მათ შორის ორპარტიული MEGOBARI აქტის ინიციატივა.
“მოსმენა შეისწავლის საქართველოს ავტორიტარიზმისკენ სვლის გლობალურ შედეგებს. მოწვეული მომხსენებლები განიხილავენ აშშ-ის შესაძლო პოლიტიკურ ნაბიჯებს, მათ შორის ორპარტიულ MEGOBARI აქტს, რომელიც მიზნად ისახავს საქართველოს დახმარებას დამოუკიდებლობის შენარჩუნებაში და დიდი ხნის ურთიერთსასარგებლო ურთიერთობის გაგრძელებაში ამერიკის შეერთებულ შტატებთან.” – ვკითხულობთ პრესრელიზის ტექსტში.
მოსმენაზე მიწვეულები არიან:
● სალომე ზურაბიშვილი, საქართველოს მეხუთე პრეზიდენტი;
● თინათინ ხიდაშელი, თავდაცვის ყოფილი მინისტრი;
● ლუკ კოფი, “ჰადსონის ინსტიტუტის“ მკვლევარი.
აშშ-ის კონგრესის წარმომადგენელთა პალატამ MEGOBARI Act 6 მაისს მიიღო. აქტი ამერიკის პრეზიდენტს რეჟიმის წევრების, მათი ხელშემწყობებისა და ოჯახის წევრებისთვის სანქციების დაწესებას ავალდებულებს.
დოკუმენტში წერია, რომ MEGOBARI აქტი აშშ-ის პრეზიდენტს ავალდებულებს, სანქციები დაუწესოს იმ უცხო პირებს, მათ შორის ქართველ ოფიციალურ პირებს, რომლებიც საქართველოს უსაფრთხოებასა და სტაბილურობას საფრთხეს უქმნიან. სანქციები ვიზების შეზღუდვასა და ქონების გაყინვას მოიცავს და შეეხება.
რესპუბლიკელმა კონგრესმენმა ჯო უილსონმა სოციალურ პლატფორმა X-ზე იმ ადამიანების სია გამოაქვეყნა, ვისაც შეერთებული შტატები MEGOBARI Act-ის მიღების შემდეგ პირველ რიგში დაასანქცირებს.
სიაში ხელისუფლების მაღალჩინოსნები, მოსამართლეები, ბიზნესმენები და ოცნების პროპაგანდისტები მოხვდნენ.
დოკუმენტში მითითებულია, რომ “ჩამოთვლილი პირები ეხმარებიან ბიძინა ივანიშვილს, საქართველოში ჩრდილოვან მმართველს, ქართული სახელმწიფოს ხელში ჩაგდებასა და ქვეყნის ჩინეთის, ირანისა და რუსეთის გავლენის ქვეშ მოქცევაში”.
