ჰელსინკის კომისია: გამოიძიეთ ოცნების მიერ ქიმიური იარაღის სავარაუდო გამოყენება
ჰელსინკის კომისია
აშშ-ის ჰელსინკის კომისია შეშფოთებულია ბოლო დროინდელი ცნობებით იმის შესახებ, რომ “ქართულმა ოცნებამ “გასულ წელს მშვიდობიანი მომიტინგეების წინააღმდეგ ქიმიური იარაღი გამოიყენა – ამის შესახებ განცხადებას ავრცელებენ აშშ-ს ჰელსინკის კომისიის თავმჯდომარე, სენატორი როჯერ უიკერი, კომისიის თანათავმჯდომარე, კონგრესმენი ჯო უილსონი, სენატორი შელდონ უაითჰაუსი და სენატორი სტივ კოენი.
“ბოლოდროინდელი ცნობები იმის შესახებ, რომ ქართულმა ოცნებამ გასულ წელს მშვიდობიანი მომიტინგეების წინააღმდეგ ქიმიური იარაღი გამოიყენა, ღრმად შემაშფოთებელია. ამ ქიმიურმა თავდასხმებმა მსხვერპლს დამწვრობა და ჯანმრთელობის ხანგრძლივი გართულებები მიაყენა. ეს წარმოადგენს ადამიანის უფლებათა შესახებ იმ ვალდებულებების დარღვევას, რომელთა შესრულებაც საქართველოს ხელისუფლებას ევალება. ასეთი ქცევა ქართულ ოცნებას რუსეთისა და ჩინეთის კორუმპირებულ მმართველებთან ალიანსში აყენებს, რომლებსაც საკუთარი ხალხის ეშინიათ და ძალაუფლების შესანარჩუნებლად არაფერზე დაიხევენ უკან.
მოვუწოდებთ აშშ-ს ხელისუფლებას და ჩვენს დემოკრატ მოკავშირეებს, გადაამოწმონ ეს ცნობები და დაუწესონ შესაბამისი სანქციები პასუხისმგებელ პირებს. ამავდროულად, კვლავ მოვუწოდებთ კოლეგებს კონგრესში მიიღონ MEGOBARI აქტი, ორპარტიული საკანონმდებლო ინიციატივა, რომელიც სახელმწიფო დეპარტამენტ დამატებით საშუალებას მისცემს მხარი დაუჭიროს ქართველ ხალხს თავისუფლებისთვის ბრძოლაში”. – წერია განცხადებაში.
“ქართული ოცნების” შინაგან საქმეთა ყოფილმა მინისტრმა, ვახტანგ გომელაურმა იმედს განუცხადა, რომ BBC-ის ფილმში ნახსენებ ნივთიერება წინა მთავრობის დროს, 2009-2010 წლებში შეიძინეს. იგი ამტკიცებს, რომ აღნიშნულ ნივთიერებას შსს 2012 წლამდე იყენებდა.
შინაგან საქმეთა მოქმედი მინისტრი, გეკა გელაძე უარყოფს ვახტანგ გომელაურის გაკეთებულ განცხადებას და ამტკიცებს, რომ პირადად გაეცნო ყველა დოკუმენტაციას, შესყიდვას და “სრული პასუხისმგებლობით” ამბობს, რომ საქართველოში შსს-ს არასდროს შეუსყიდია ე.წ. “კამიტი”.
BBC-მ 1 დეკემბერს გამოაქვეყნა ვრცელი სტატია, სადაც აღნიშნულია, რომ მათ მიერ შეგროვებული მტკიცებულებების თანახმად, გასულ წელს საქართველოს ხელისუფლებამ ანტისამთავრობო მომიტინგეების ჩასახშობად პირველი მსოფლიო ომის დროინდელი ქიმიური ნივთიერება გამოიყენა.
