"გუნდიდან გაგდებულები" - ოცნება ხელისუფლების ყოფილი წევრების "ღალატზე" მიანიშნებს
გუნდიდან გაგდებულები
“ქართული ოცნების” დეპუტატებმა, თენგიზ შარმანაშვილმა და დავით მათიკაშვილმა განაცხადეს, რომ “გუნდიდან გაგდებული ზოგიერთი ყოფილი წევრი რადიკალიზმს ასაზრდოებს” და ხაზი გაუსვეს, რომ “ადეკვატური იქნება პასუხი იმ ადამიანების” მიმართ, ვინც დანაშაულს ჩაიდენს და სამშობლოს უღალატებს.
ამასთან, “ქართული ოცნების” პრემიერმინისტრმა ირაკლი კობახიძემ ნარკოტიკებზე, ორგანიზებულ დანაშაულსა და კორუფციაზე საუბრისას განაცხადა, რომ “მიშვებული იყო ეს ყველაფერი.” მისივე თქმით, ამ მიმართულებით საქართველოს მთავრობა და “კონკრეტულად, შინაგან საქმეთა სამინისტრო ძალიან ეფექტიანად მუშაობს”, რითაც კობახიძემ ყოფილ შს მინისტრზე, ვახტანგ გომელაურზე ირიბად მიანიშნა.
“ყველამ კარგად უნდა იცოდეს, რომ ვინც კანონს დაარღვევს, უღალატებს სამშობლოს და გუნდს. ბუნებრივია, მათ მიმართ კანონი და სახელმწიფო შეუვალი იქნება – ჩვენ გვარებზე და სახელებზე არ ვსაუბრობთ, ყოველ შემთხვევაში, ჯერჯერობით”, – ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა განაცხადა, რითაც გამოეხმაურა “ნაციონალური მოძრაობის“ ერთ-ერთი ლიდერის, სოფო ჯაფარიძის განცხადებას, რომ “კობახიძე და “ქართული ოცნება“ ბევრ სიურპრიზს უნდა ელოდოს მათივე ყოფილი თანაგუნდელებისგან“.
დავით მათიკაშვილის თქმით, ადეკვატური იქნება პასუხი იმ ადამიანების მიმართ, ვინც დანაშაულს ჩაიდენს და სამშობლოს უღალატებს.
“კიდევ ერთხელ დადასტურდა ის, რაც ბატონმა პრემიერმა ბრძანა, რომ გუნდიდან გაგდებული ზოგიერთი ყოფილი წევრი საქართველოში რადიკალიზმს ასაზრდოებს. არ ვიცი, ჯაფარიძეს წამოსცდა, ქვეცნობიერმა უღალატა თუ რა ქნა, მაგრამ ზუსტად ამაზე ისაუბრა. ეს იმდენად ამაზრზენია, საერთოდ არც მინდა ამ თემაზე საუბარი, მაგრამ ყველამ კარგად უნდა იცოდეს, რომ ვინც კანონს დაარღვევს, უღალატებს სამშობლოს, გუნდს და იქნება თან დანაშაულის ჩამდენი, ბუნებრივია, მათ მიმართ კანონი და სახელმწიფო შეუვალი იქნება.
თქვენ კარგად იცით, რომ ჩვენ გვარებზე და სახელებზე არ ვსაუბრობთ, ყოველ შემთხვევაში, ჯერჯერობით. არ არის აქ კონკრეტულ იდენტიფიცირებულ ადამიანებზე საუბარი, თუმცა ფაქტი იმისა, რომ აქედან გაგდებული პირები გარკვეული ფორმით ცდილობდნენ, რადიკალიზმი წაეხალისებინათ და დაეფინანსებინათ კიდეც, არის სახეზე.“ – განაცხადა მათიკაშვილმა.
თენგიზ შარმანაშვილის თქმით, “ქართული ოცნება” კი არ უნდა ელოდოს რაღაცებს, არამედ პირიქით, პარტიის ყოფილი წევრები უნდა ელოდონ მხილებას. შარმანაშვილი არ ასახელებს, კონკრეტულად, “ქართული ოცნების” რომელ ყოფილ წევრებზეა საუბარი.
“ქართული ოცნების” დეპუტატი აღნიშნავს, რომ პარტიის მოქმედ და ყოფილ წევრებსაც დაიჭერენ, თუკი სისხლის სამართლებრივი დანაშაული აქვს ჩადენილი.
“უხერხულადაც კი მიმაჩნია საუბარი გუნდიდან გაგდებულებზე, რომლებიც მერე თანხებს ხარჯავენ და არა მხოლოდ გუნდის, არამედ, საქართველოს საწინააღმდეგოდ, ათას საქმიანობას ეწევიან. ამაზე ილაპარაკა საქართველოს პრემიერ-მინისტრმა. აღარ გავიმეორებ იმ მეტსახელს, რომლითაც ხაბეიშვილი იღებდა ჰონორარს ამ “ღალატის აქტთან” დაკავშირებით. რა თქმა უნდა, ეს მოსალოდნელია.
ეს ადამიანები გუნდიდან იმიტომაც გაუშვეს და გააგდეს, რომ სახელმწიფოს საწინააღმდეგო საქმეს ეწეოდნენ. თავის საქმიანობას სწორი მიმართულებით არ ეწეოდნენ და რა თქმა უნდა, ისინი ამას აგრძელებენ. მაგრამ ერთი რამე მინდა ვთქვა, რომ ისინი და ბევრი სხვაც, ეტყობა ვერ ხვდებიან, რომ სახელმწიფო საწინააღმდეგოდ მოქმედებები ასე ადვილად უკვე აღარ ჩაივლის. ისინი, ყველანი, მხილებული იქნებიან უცხოეთთან ისეთ კავშირებზე, რომელიც ძალიან აზიანებს საქართველოს და მის ინტერესებს. ასე რომ, ჩვენ კი არ უნდა ველოდოთ რაღაცებს, ისინი უნდა ელოდონ, რომ მხილებული იქნებიან.
თუ სისხლის სამართლის დანაშაული აქვს ჩადენილი, ყოფილსაც და მოქმედსაც დაიჭერენ. რაც შეეხება მტკიცებულებებს – თქვენ იცით, რომ ქართული სახელმწიფო მტკიცებულებების მაღალი ხარისხის უქონლობით არავის იჭერს, ასე რომ როდესაც იქნება საკმარისი მტკიცებულებები, რომელიც ყველაზე მაღალ სტანდარტს დააკმაყოფილებს, მაშინ მიაკითხავს მას მართლმსაჯულება. თუ ასეთი მტკიცებულებები არ იქნება, არავის მიაკითხავს.” – განაცხადა შარმანაშვილმა.
