გომელაურის თქმით, ზუგდიდის ბანკის მძარცველს ბანკის კუთვნილი თანხა მისცეს და არა ბიუჯეტის

შს მინისტრმა ვახტანგ გომელაურმა პირველი კომენტარი გააკეთა ჟურნალისტებთან ზუგდიდში, “საქართველოს ბანკის” ფილიალზე მომხდარი თავდასხმის შემდეგ.

ვინ იყო თავდამსხმელი და ჰყავდა თუ არა თანამზრახველები

მინისტრმა არაფერი თქვა თავდამსხმელის ვინაობაზე. მისი თქმით, გამოძიების ინტერესებიდან გამომდინარე, ამ ეტაპზე ბევრი რამის თქმა არ შეუძლია.

● როგორ ვითარდებოდა მოვლენები ზუგდიდში – “საქართველოს ბანკზე” თავდასხმის ქრონიკა

“შეიძლება 43 ადამიანში 10 ადამიანი იყო მისი თანამზრახველი, ამას ვერავინ ვერ იტყვის, იყო თუ არ იყო,” – ასე პასუხობს გომელაური ჟურნალისტების კითხვას, იყო თუ არა „საქართველოს ბანკზე” განხორციელებული თავდასხმისას, მძევლებს შორის შეიარაღებული პირის თანამზრახველი.

რამდენად კვალიფიციურად ჩატარდა სპეცოპერაცია

შს მინისტრი აცხადებს, რომ გუშინ მძევლების გათავისუფლებისას ქართველი სამართალდამცავები საერთაშორისო სტანდარტით მოქმედებდნენ:

„ძალიან ბევრი პოლიტიკოსი, ექსპერტი გამოდის და ამბობს: ეს ასე არ შეიძლება. მძევალი, როდესაც აყვანილია, მას აქვს წესები, ესაა მსოფლიო დადგენილი წესები, სტანდარტი, ეს არც საქართველოსი და არც ვახტანგ გომელაურის მოგონილია. ესაა მსოფლიო სტანდარტი, კეთდება „A“, „B“, „C“ ოპერაცია, ვთქვათ – დაწყება, შესვლა, არ შესვლა, ჩვეულებრივია და ჩვენც ამ გეგმით ვიმოქმედეთ. ახალი არ მოუგონია არც გომელაურს, არც სამხარეოს უფროსს”, – განაცხადა გომელაურმა.

ხომ არ გაჩნდა პრეცედენტი?

ჟურნალისტის კითხვაზე დღეს, ქობულეთში მომხდარი ძარცვა აღნიშნული საქმის მიმბაძველობა ხომ არ იყო, გომელაურმა განაცხადა, რომ ქობულეთში მომხდარი ძარცვა ჩვეულებრივი ხასიათისაა, რადგან გარეთ მოხდა ძარცვა და ბანკში შევარდნას ადგილი არ ჰქონია.

“მსგავსი ტიპის ღმერთმა დაგვიფაროს, ესაა ჩვეულებრივი ძარცვა, გარეთ მოხდა ძარცვა, ეს არ არის ბანკში შევარდნა”, – აღნიშნა შს მინისტრმა.

რამდენი გადაუხადეს თავდამსხმელს

“პირადად ჩემთვის და ჩვენი ხელისუფლებისთვის არანაირი თანხა არ არსებობს ადამიანის სიცოცხლის საფასურად, იქნება 10 მილიონი, 100 მილიონი, ამას დიდი მნიშვნელობა არ აქვს”, – ასე უპასუხა ჟურნალისტების კითხვას საქართველოს შინაგან საქმეთა მინისტრმა, ვახტანგ გომელაურმა, რა თანხა წაიღო ზუგდიდში, “საქართველოს ბანკიდან“ თავდამსხმელმა.

როგორც გომელაურმა აღნიშნა, გამოძიებიდან გამომდინარე ის საქმის დეტალებზე ვერ ისაუბრებს.

„თანხა ძალიან ბევრჯერ დასახელდა და დასამალიც არ არის. იყო ნახევარ მილიონ დოლარზე საუბარი და ამაზე ვიმუშავეთ“, – განაცხადა გომელაურმა.

მისი განცხადებით, თანხა, რომელიც თავდამსხმელს გადასცეს, სახელმწიფო ბიუჯეტიდან არ იყო და ის „საქართველოს ბანკმა“ გადაიხადა.

„ბიუჯეტის თანხა ნამდვილად არ არის, „საქართველოს ბანკის“ თანხაა. ეს ასე ხდება, ყველგან ხდება, მსოფლიოში ასე ხდება, როცა ბანკში შედიან და იყვანენ მძევლებს… ყველამ იცის და მეკითხებით – „თიბისი ბანკი“ ხომ არ გადაიხდის, „საქართველოს ბანკში“ იყო ხალხი შესული?“, – განაცხადა გომელაურმა.

21 ოქტომბერს, დაახლოებით 14 საათსა და 20 წუთზე შეიარაღებული პირი შეიჭრა ზუგდიდის ცენტრში, გამსახურდიას გამზირზე მდებარე “საქართველოს ბანკის” შენობაში და მძევლად აიყვანა 43 ადამიანი.

თავდამსხმელი ბანკის შენობაში 8 საათზე მეტხანს იმყოფებოდა. იგი ერთ-ერთი მძევლის დახმარებით დაუკავშირდა ტელეკომპანია “მთავარს” და თავისი მოთხოვნები გააცნო – ნახევარი მილიონი დოლარი, უიარაღო მომლაპარაკებელი და უსაფრთხოების გარანტიები.

საღამოს ათი საათისთვის, თავდამსხმელმა მიიღო მოთხოვნილი თანხა და ყველა მძევალი გაათავისუფლა სამის გარდა. სამ ადამიანთან ერთად, რომელთა შორის იყოს სამხარეო პოლიციის უფროსი, თავდამსხმელმა ბანკის შენობა დატოვა და ავტომობილით გაურკვეველი მიმართულებით წავიდა. მოგვიანებით მან ის სამი მძევალიც გაათავისუფლა, თავად კი, მიიმალა.