ოპოზიციის კიდევ ერთ ლიდერს, გიორგი ვაშაძეს 7-თვიანი პატიმრობა მიესაჯა
გიორგი ვაშაძეს პატიმრობა მიესაჯა
“სტრატეგია აღმაშენებლის“ ლიდერი გიორგი ვაშაძე სასამართლომ პარლამენტის დროებითი საგამოძიებო კომისიის მოთხოვნის შეუსრულებლობის გამო დამნაშავედ ცნო და 7 თვით პატიმრობა შეუფარდა. მას 2 წლით თანამდებობის დაკავებაც აეკრძალა.
გადაწყვეტილება თბილისის საქალაქო სასამართლოს მოსამართლემ, ნინო გალუსტაშვილმა გამოაცხადა.
გადაწყვეტილების გამოცხადებას ბრალდებული არ დაესწრო. მიუხედავად დაცვის მხარის შუამდგომლობისა, რომ პროცესი გადადებულიყო საბოლოო სიტყვის ეტაპისთვის, მოსამართლემ განაჩენი წინასწარ გამოაცხადა.
ვაშაძე განაჩენს პარტიის ოფისში თანამოაზრეებთან ერთად ელოდებოდა.
ის პარლამენტის დროებით საგამოძიებო კომისიაში გამოკითხვაზე არ გამოცხადდა, რის გამოც მას 349-ე მუხლით წარედგინა ბრალდება. აღნიშნული მუხლი ითვალისწინებს ჯარიმას ან ერთ წლამდე პატიმრობას, ასევე თანამდებობის დაკავების ან საქმიანობის აკრძალვას სამ წლამდე ვადით.
სასამართლომ ვაშაძეს 50 000-ლარიანი გირაო ადრე უკვე შეუფარდა, რომელიც მან კანონით დადგენილ ვადაში გადაიხადა.
23 ივნისს, “ქართული ოცნების” სასამართლომ ოპოზიციის სამ ლიდერს – მამუკა ხაზარაძეს და ბადრი ჯაფარიძეს (ლელო – ძლიერი საქართველო), ასევე ზურაბ გირჩი ჯაფარიძეს (კოალიცია ცვლილებებისთვის) პატიმრობა შეუფარდა.
საგამოძიებო კომისიაზე გამოუცხადებლობის გამო ციხეში უკვე სხედან ნიკა მელია, ზურაბ გირჩი ჯაფარიძე და ნიკა გვარამია (კოალიცია ცვლილებებისთვის) და თავდაცვის ყოფილი მინისტრი ირაკლი ოქრუაშვილი.
ყველა მათგანს თეა წულუკიანის საგამოძიებო კომისიაზე გამოუცხადებლობას ედავებიან.
5 თებერვალს “ქართული ოცნების” პარლამენტში შეიქმნა ენმ-ის ხელისუფლების საქმიანობის შემსწავლელი საგამოძიებო კომისია სახელწოდებით – “2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისია“.
კომისიის შექმნა “ქართულმა ოცნებამ” 2025 წლის 9 იანვარს დააანონსა. ფრაქციის თავმჯდომარის, მამუკა მდინარაძის თქმით, კომისია 6 თვის განმავლობაში იმუშავებს და მოამზადებს დასკვნას, რომელსაც განიხილავენ და დაამტკიცებენ სექტემბრის პირველი სასესიო კვირისთვის.
