გიორგი ახობაძე სასამართლო დარბაზიდან გაათავისუფლეს
გიორგი ახობაძე თავისუფალია
თბილისის საქალაქო სასამართლოს მოსამართლე, რომეო ტყეშელაშვილმა გიორგი ახობაძე გაამართლა და ნარკოდანაშაულში ბრალდებული ექიმი უდანაშაულოდ ცნო – ახობაძე სასამართლო დარბაზიდან გათავისუფლდა.
“ყველა მედიასაშუალებას დიდი მადლობას ვუხდი თანადგომისთვის, ასეთი დეტალური გაშუქებისთვის. ალბათ, სახლში რომ მივალ, შოკში ჩავვარდები, ისეთი მხარდაჭერა მქონდა თქვენგან. პირველი ემოცია, რაც მაქვს, არის მადლობა ყველას მიმართ. არ მჯერა, აქ რომ ვარ ახლა, მადლობა გვერდში დგომისთვის. ძალიან მიყვარხართ ყველა – ბრძოლა ბოლომდე“, – მიმართა სასამართლოს ეზოში საგულშემატკივროდ მისულ ადამიანებს გიორგი ახობაძემ.
წინა სხდომაზე გიორგი ახობაძემ დასკვნითი სიტყვით ისარგებლა. მისი და დაცვის მხარის პოზიციით, ექიმს ნარკოტიკი სამართალდამცავებმა ჩაუდეს, ხოლო ბრალდების მხარის მტკიცებულებები ფაბრიკაციას ეფუძნება:
“ნარკოტესტი არ ჩამიტარეს, რადგან იცოდნენ, რომ ნარკოტიკების მომხმარებელი არ ვიყავი… ნივთს რომ ხელი მოკიდო, მასზე დნმ კვალი უნდა დარჩეს – კვალი გაყალბებულია“, — განაცხადა ბრალდებულმა.
გიორგი ახობაძის ადვოკატი აცხადებდა, რომ მის მიმართ განჩინება და დაკავების ოქმი უკანონოა და საქმეში არ არსებობს ვიდეომტკიცებულება.
აღსანიშნავია, რომ თავდაპირველად გიორგი ახობაძის საქმეს 4 თვეზე მეტი ხნის განმავლობაში მოსამართლე მიხეილ ჯინჯოლია განიხილავდა, თუმცა საქმის განხილვის დასასრულს, მოსამართლე შეიცვალა და რომეო ტყეშელაშვილი გახდა.
2024 წლის 7 დეკემბერს გიორგი ახობაძე საპროტესტო აქციიდან სახლში ბრუნდებოდა, როდესაც ის პოლიციამ დააკავა.
გიორგი ახობაძეს ბრალი სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანონო შეძენა-შენახვას ითვალისწინებს.
