საქართველოს პრემიერმინისტრ ირაკლი ღარიბაშვილისა და აზერბაიჯანის რესპუბლიკის პრეზიდენტ ილჰამ ალიევის შეხვედრა ბაქოში, SPECA-ს ცენტრალური აზიის ქვეყნების მეთაურთა სამიტზე, განჯელიკის სამთავრობო რეზიდენციაში გაიმართა, სადაც საქართველოს პრემიერმა განაცხადა, რომ საქართველო დაინტერესებულია აზერბაიჯანთან პარტნიორობის მეტად გაძლიერებით, ასევე, მთავრობის მეთაურმა იმედი გამოთქვა, რომ აზერბაიჯანი სომხეთთან შეთანხმებას მალე გააფორმებს.
საქართველოს მთავრობის ცნობით, შეხვედრაზე ყურადღება გამახვილდა ორი ქვეყნის “მრავალსაუკუნოვან, კეთილმეზობლურ, მეგობრულ ურთიერთობებზე” და აღინიშნა, რომ აზერბაიჯანი საქართველოს ერთ-ერთი წამყვანი სავაჭრო პარტნიორია.
მთავრობის ცნობით, შეხვედრაზე ასევე აღინიშნა, რომ სამომავლოდ ბაქო-თბილისი-ყარსის სარკინიგზო მაგისტრალი გახდება ევროპა-კავკასია-აზიის სარკინიგზო დერეფნის ნაწილი და ყურადღება განსაკუთრებით გამახვილდა სამხრეთ კავკასიის მწვანე ენერგეტიკულ რესურსთა ევროკავშირის ბაზრისთვის მისაწოდებლად მასშტაბური პროექტის − შავი ზღვის წყალქვეშა კაბელის − განვითარების საკითხსა და მის განსაკუთრებულ მნიშვნელობაზე.
“მხარეებმა მიმოიხილეს მსოფლიოში და რეგიონში არსებული უსაფრთხოების საკითხები. მთავრობის მეთაურმა იმედი გამოთქვა, რომ აზერბაიჯანი სომხეთთან ძალიან მალე გააფორმებს სამშვიდობო შეთანხმებას.” – აცხადებს მთავრობის ადმინისტრაცია.
ირაკლი ღარიბაშვილის კომენტარი
ღარიბაშვილის თქმით, მოსალოდნელია, რომ წლის ბოლოს ერთ სულ მოსახლეზე მშპ-ს მაჩვენებელი იქნება 8 000 დოლარზე მეტი, რაც არის ბოლო 3 წელიწადში გაორმაგება ამ პარამეტრის. მისი განმარტებით, საქართველოს საერთაშორისო რეზერვები მიმდინარე წლის ივლისში ისტორიულ მაქსიმუმს გაუტოლდა. ხოლო უმუშევრობა და სიღარიბე ისტორიულ დაბალ ნიშნულზე დავიდა.
“ასევე, მინდა აღვნიშნო, რომ საქართველო, როგორც ეკონომიკური თვალსაზრისით მზარდი პოტენციალის მქონე ქვეყანა, საიმედო და სტაბილური პარტნიორია. დღემდე ჩვენ ხელი მოვაწერეთ თავისუფალი ვაჭრობის შეთანხმებებს ევროკავშირთან, ჩინეთთან, გვაქვს თავისუფალი ვაჭრობა დსთ-ს ქვეყნებთან, დიდ ბრიტანეთთან, არაბეთის გაერთიანებულ საამიროებთან და თურქეთთან. მთლიანობაში თავისუფალი სავაჭრო შეთანხმებები საქართველოში ინვესტორებს აძლევს წვდომას 2,3 მილიარდიან მომხმარებელთა ბაზარზე.” – განაცხადა ღარიბაშვილმა.
მისივე თქმით, საქართველო არის დაინტერესებული, რომ კიდევ უფრო მეტად გააძლიეროს პარტნიორობა და თანამშრომლობა აზერბაიჯანთან – ცენტრალური აზიის რეგიონთან.
