DW: გერმანიიდან დეპორტირებულთა შორის ყველაზე მეტი საქართველოს მოქალაქეა

გერმანიიდან დეპორტირებული ქართველები

გამოცემა DW ინფორმაციით, 2023 წელს გერმანიიდან დეპორტირებული მიგრანტების რიცხვი გაიზარდა, რომელთა შორის ყველაზე მეტი საქართველოს მოქალაქეა.

გერმანიის შინაგან საქმეთა სამინისტროს მონაცემებით, თავშესაფრის წარუმატებელი მაძიებლების დეპორტაცია 2023 წლის პირველ ექვს თვეში მეოთხედზე მეტით გაიზარდა – იანვრიდან ივნისამდე გერმანიიდან 7 861 ადამიანი იქნა დეპორტირებული, რაც რომ გასული წლის ანალოგიურ პერიოდთან შედარებით 27%-ით მეტია. დეპორტირებულთაგან 1 664 ქალი, 1 375 კი არასრულწლოვანი იყო.

სტატისტიკამ აჩვენა, რომ ყველაზე მეტი დეპორტირებული საქართველოდან, ჩრდილოეთ მაკედონიიდან, ალბანეთიდან და სერბეთიდან იყო. 

ასევე გაიზარდა იმ ადამიანთა რიცხვი, ვინც ნებაყოფლობით დატოვა ქვეყანა. 4 892 ადამიანმა  სამშობლოში დასაბრუნებლად ფედერალური დაფინანსება მიიღო, ხოლო 2 309 ადამიანმა მიიღო სახელმწიფო ან ადგილობრივი დაფინანსება.

კანონის თანახმად, მათ, ვისი თავშესაფრის განაცხადი უარყოფილია ან ვიზას ან ბინადრობის ნებართვას ვადა გაუვიდა, გერმანია უნდა დატოვონ.

● საქართველოს მოქალაქეებს შესაძლოა, ფინეთსა და კვიპროსში დასაქმების შესაძლებლობა მიეცეთ
● საქართველოს მოქალაქეებს ისრაელში ლეგალური დასაქმება შეეძლებათ
● საქართველოში ყოველ მეხუთე ოჯახს საჭმლის სამყოფი ფული არ აქვს – NDI-ის ახალი კვლევა

საქართველოდან გერმანიაში ლეგალურად დასაქმების მსურველები 2021 წლის პირველი აპრილიდან გაემგზავრნენ. 100 ათასამდე მსურველის მიუხედავად, გერმანიაში მხოლოდ 54 ადამიანი ჩავიდა. საქართველო არის პირველი ქვეყანა, ვისთანაც გერმანიამ აღნიშნული მიმართულებით მუშაობა დაიწყო.

თუმცა, გერმანიაში დასაქმების პროგრამით ჩასული ქართველები ამბობდნენ, რომ ადგილზე ჩასულებს შეუსაბამო პირობები დახვდათ. როგორც “ფორმულას” სიუჟეტიდან ირკვევა, დასაქმებულების ხელფასი სამჯერ ნაკლებია, ვიდრე ეს კონტრაქტში წერია. პრობლემაა კვებაც. ასევე, ცუდი პირობებია საცხოვრებელშიც – ქართველების თქმით, საცხოვრებელი პირობები შეუსაბამოა და რამდენიმე კვადრატულ მეტრში 24-მდე ადამიანს უწევს ყოფნა. როგორც ისინი აღნიშნავენ, არ ხდება ისე, როგორც კონტრაქტში ეწერა.

2021 წელს, გერმანიის შემდეგ ისრაელი გახდა მეორე ქვეყანა, სადაც საქართველოს მოქალაქეებს ლეგალურად შეეძლებათ დასაქმება. ჯანდაცვის სამინისტროს განცხადებით, საქართველოს მოქალაქეებს ისრაელში, ხანგრძლივი მოვლის დაწესებულებებში, დამხმარე მუშაკის პოზიციაზე დასაქმება შეეძლებათ. ეს არის დაწესებულებები, სადაც ასაკიან, ქრონიკული ან კომპლექსური დაავადებების მქონე პირებს უვლიან.

ამასთან, 2023 წლის თებერვალში ცნობილი გახდა, რომ შესაძლოა, საქართველოს მოქალაქეები ფინეთსა და კვიპროსშიც ლეგალურად დასაქმდნენ. ჯანდაცვის მინისტრის მოადგილის, თამარ ბარკალაიას თქმით, ამ საკითხზე ფინეთსა და კვიპროსთან მოლაპარაკებები უკვე მიმდინარეობს. როგორც ბარკალაიამ განმარტა, კონკრეტული გადაწყვეტილებები მას შემდეგ გახდება ცნობილი, რაც სამუშაო ძალის საჭიროებაზე ხელახალი კვლევის შედეგები დაიდება.