"ბორჯომის" თანამშრომლები გაფიცვას განაგრძობენ
გაფიცვა ბორჯომში
ორშაბათს დილიდან „ბორჯომის“ გაფიცულმა თანამშრომლებმა ორივე ქარხნის შესასვლელი ჩაკეტეს.
პიკეტის მონაწილეები ითხოვენ კომპანიიდან გათავისუფლებული 50 თანამშრომლის აღდგენას, ძველ შრომით პირობებზე დაბრუნებას, ორი თვის ხელფასის ჩარიცხვას, უვადო ხელშეკრულებებს და ხელფასების 25 პროცენტით ზრდას, და ასევე, ადმინისტრაციის იმ თანამშრომელთა დასჯას და სამსახურიდან გაშვებას, რომლებიც შანტაჟის მუქარისა და იძულების ენაზე ესაუბრება თანამშრომლებს.
კომპანია “ბორჯომში” ვითარება მას შემდეგ გამწვავდა, რაც ამ კომპანიის რუსი მფლობელები დასავლეთის მიერ უკრაინის გამო სანქცირებული რუსი ბიზნესმენების ნუსხაში აღმოჩნდნენ.
● TI: ივანიშვილი 2012-2019 წლებში მინიმუმ 10 კომპანიას ფლობდა რუსეთში
● ქადაგიძე: 10 ნაბიჯი რასაც საქართველოს ხელისუფლება გადადგამდა, უკრაინას ნამდვილად რომ უჭერდეს მხარს
● საქართველო და სანქციები რუსეთის წინააღმდეგ – რატომ ასოცირდება ქვეყანა “შავ ხვრელთან”?
აპრილის ბოლოს კომპანია “IDS Borjomi Georgia”-მ, რომელიც ამ მინერალურ წყალს ასხამს, გააჩერა ბორჯომის ორივე ქარხნის მუშაობა.
IDS Borjomi Georgia, რომელიც ფლობს ქართულ ბრენდებს – ბორჯომს, ლიკანს, მიტარბს და ბაკურიანს მსხვილი რუსული კონგლომერატის – ალფა-ჯგუფის შემადგენლობაშია. ალფა-ჯგუფის მფლობელი, რუსი მილიარდერი მიხაილ ფრიდმანი სანქცირებულთა სიაშია.
ფრიდმანის ანგარიშები გაყინულია, შესაბამისად, მას არც ფულის ჩადება შეუძლია “ბორჯომში” და არც სხვა ბიზნესმენებისთვის გარანტორად ყოფნა.
ამას ემატება ისიც, რომ ბორჯომისთვის ფაქტობრივად დაიხურა ორი უმსხვილესი ბაზარი – რუსეთი და უკრაინა. ხოლო ზოგიერთმა ქვეყანამ, მაგალითად ესტონეთმა, ეს ბრენდი დახლებიდან აიღო იმის გამო, რომ იგი რუსული ბიზნესის მფლობელობაშია.
აპრილის ბოლოს ქარხანაში შემცირება გამოცხადდა და 50 თანამშრომელი დაითხოვეს. სულ ბორჯომის ორ ქარხანაში 600-ზე მეტი ადამიანია დასაქმებული, ხოლო თუ გავითვალისწინებთ დისტრიბუციის ხაზსაც, მათი რიცხვი 1000-მდე გაიზრდება.
“ჩათვალეთ, რომ ათასზე მეტი ოჯახი რჩება ლუკმა პურის გარეშე”, – უთხრა “ნოვაია გაზეტას” აგრარულ მეურნეობაში, ვაჭრობასა და მრეწველობაში დასაქმებულთა პროფკავშირების თავმჯდომარემ, გიორგი დიასამიძემ.
გამოსავლის სახით კომპანიამ თანამშრომლებს ხელშეკრულებების შეცვლილი პირობები შესთავაზა. როგორც თანამშრომლები აცხადებენ, ადმინისტრაციის მხრიდან იყო მუქარები და შანტაჟი, რომ ამ ხელშეკრულებებისთვის ხელი მოეწერათ. თანამშრომლები აღნიშნავენ, რომ შემოთავაზებულ პირობებს არ დათანხმდებიან. მათი თქმით, პანდემიის გამო კომპანიამ ისედაც უკვე შეამცირა მათი ხელფასები.
19 მაისს “ალფა ჯგუფმა” საქართველოს მთავრობას ოფიციალური შესთავაზა IDS ბორჯომი ჯორჯიაში თავისი წილის უსასყიდლოდ გადაცემა.
ეს ნაბიჯი საქართველოს მთავრობას საშუალებას მისცემს მონაწილეობა მიიღოს საერთაშორისო კომპანიის მენეჯმენტში, განმარტა ალფა ჯგუფმა.
ამ წინადადებას ორი დღის შემდეგ საქართველოს პრემიერ-მინისტრი ირაკლი ღარიბაშვილი გამოეხმაურა. მისი გათვლებით, 100 მილიონ დოლარად არის შეფასებული წილი, რომელიც ბორჯომის მფლობელებს მთავრობისთვის გადაცემას სურთ. ღარიბაშვილი ბორჯომელებს დაჰპირდა, რომ მთავრობის პასუხი რამდენიმე დღეში იქნებოდა.
„ბორჯომს“ ოპერირებაში პრობლემა არ ექნება და ჩვენი საამაყო ბრენდი გააგრძელებს მუშაობას. ყველა დასაქმებული თანამშრომელი მშვიდად უნდა იყოს. მინდა თანამშრომლებს მივმართო, რომ პრობლემა ამოწურული იქნება“,- განაცხადა პრემიერმა.
თუმცა, ამ განცხადებიდან თითქმის თვე გავიდა, “ბორჯომის” და მისი თანამშრომლების ბედი კი კვლავ გაურკვეველია.
პიკეტის მონაწილეები აცხადებენ, რომ არ დაიშლებიან, სანამ კომპანია “ბორჯომის” მენეჯმენტი მათ მოთხოვნებს არ დააკმაყოფილებს.
როგორც კომპანია IDS ბორჯომში აცხადებენ, ამჟამად ქარხნები მინიმალური დატვირთვით – მხოლოდ საქართველოს ბაზრისთვის მუშაობს.
გაფიცვა ბორჯომში
