გადაჭედილი სპირტის საწყობები და აფთიაქები, სადაც ანტისეპტიკური საშუალებები არ არის

ჩრდილოეთ ოსეთს-ალანიას, ჩრდილოეთ კავკასიის ამ რესპუბლიკას უნიკალური შესაძლებლობა აქვს, რომ ახლავე დაიწყოს ანტისეპტიკების წარმოება, რომელიც ასეთი დეფიციტურია ყველგან კორონავირუსის პანდემიის პირობებში – საკუთარი მოსახლეობისთვისაც და რუსეთის სხვა რეგიონებისთვისაც.

აქ სპირტისა და არყის რამდენიმე საწარმოა. ოდესღაც რესპუბლიკა რუსეთის ალკოჰოლის ბაზარზე ლიდერობდა. ის ქვეყანაში ეთილის სპირტისა და სპირტის შემცველი საკვები პროდუქციის უმსხვილესი მწარმოებელი და მიმწოდებელი იყო.

საწყობები ახლაც გადაჭედილია სპირტით, თუმცა თვითონ სპირტის ქარხნები გაჩერებულია. მათი ნაწილი გაკოტრდა, ნაწილი დაიშალა, ზოგიერთი მათგანი კი საზედამხედველო ორგანოების სანქციების ქვეშ მოექცა.

მთავარი პრობლემა ის არის, რომ ჩრდილოეთ ოსეთს, რესპუბლიკას, რომელსაც საკუთარი ხელმძღვანელი, პარლამენტი და კონსტიტუცია გააჩნია, არ შეუძლია დამოუკიდებლად მიიღოს გადაწყვეტილება – არც იმის შესახებ, რომ აამუშაოს საწარმოები და არც იმის, რომ უკვე არსებული ეთილის სპირტის დიდი მარაგებით სანიტარული პროდუქციის წარმოება დაიწყოს.

ეს მოსკოვში, შესაბამისი სტრუქტურების გადაწყვეტილებას მოითხოვს. ეს გადაწყვეტილება კი ამ დრომდე არ იყო მიღებული.

31 მარტს, რესპუბლიკის ხელმძღვანელის პრესსამსახურმა განაცხადა, რომ სპირტის მწარმოებლებს საშუალება მიეცათ, გამოეყოთ ნედლეული სადეზინფექციო ხსნარების წარმოებისთვის, მრავალ საცხოვრებელ კორპუსში საერთო ტერიტორიების დეზინფექციის მიზნით.

იმავე დღეს, ჩრდილოეთ ოსეთში განაცხადეს კორონავირუსის ორი ოფიციალურად დადასტურებული შემთხვევის შესახებ.

მაგრამ რატომ შეიქმნა საერთოდ ეს სიტუაცია, რომელსაც ადგილობრივი ექსპერტები პარადოქსულს უწოდებენ?

• თბილისი, ბოლნისი, ბარსელონა, ვაშინგტონი, ქობულეთი – როგორ შეცვალა კორონავირუსმა ადამიანების ცხოვრება

• მოდელიერები და რესტორატორები ეპიდემიის პირობებში – როგორ შეცვალა კორონავირუსმა აფხაზეთის ცხოვრება

რა მოუვიდა ოსურ სპირტის საწარმოებს

„მთელმა მსოფლიომ ყველა რესურსი ჩართო კორონავირუსთან ბრძოლაში, ჩვენთან კი სპირტის საწარმოები გაჩერებულია. ოსეთში შეუძლებელია ანტისეპტიკის ყიდვა – საწარმოების საწყობები კი სპირტით არის სავსე. წყაროსთან ვდგავართ და წყურვილით ვკვდებით“, – ამბობს ფინანსური ანალიტიკოსი, ჟურნალისტი და ბლოგერი, ალიკ ფუხაევი.

ჩრდილოეთ ოსეთში, სამედიცინო სპირტის წარმოების ლიცენზია ორ საწარმოს ჰქონდა – „ფაიურ – სოიუზს“ და „შპს მარატს“. მაგრამ „როსალკორეგულირებამ“ (რომლის სათავო ოფისი მოსკოვშია) უკანასკნელი წლების განმავლობაში, მათ მუშაობის უფლება არ მისცა, ნახულობდა რა მინიმალურ დარღვევებს.

„მაგალითად, ისინი დაადანაშაულეს იმაში, რომ სამედიცინო სპირტის წარმოება გამოიყენებოდა ყალბი არყის დასამზადებლად, თუმცა, ამის დამტკიცებას არავინ ცდილობდა“, – ამბობს ალიკ ფუხაევი.

ბოლოს, მოსკოვიდან ხელმძღვანელები ვლადიკავკაზში 2019 წლის დეკემბერში ჩამოვიდნენ და პირდაპირ აიძულეს საწარმოები შეეჩერებინათ მუშაობა.

მას შემდეგ, საწარმოების საწყობები გადაჭედილია სპირტით სავსე ცისტერნებით, რომელიც სამედიცინო პრეპარატების საწარმოებლად არის გამოსადეგი.

ზოგიერთი მათგანი ალკოჰოლური ბაზრის ფედერალურ სამსახურთან სასამართლოში დავას ცდილობს, ზოგიერთი კი უბრალოდ ცვლილებებს ელოდება.

მოსკოვური კორუფცია

„არ არსებობს მკაფიო მექანიზმი: აღმოფხვრი დარღვევებს – აგრძელებს მუშაობას. იმიტომ, რომ მთელი ეს სტრუქტურა კორუმპირებულია“, – ამბობს ალიკ ფუხაევი.

„როსალკორეგულირების“ ხელმძღვანელის ყოფილი მოადგილის, ირინა გოლოსნოის წინააღმდეგ სისხლის სამართლის საქმეა აღძრული უფლებამოსილების ბოროტად გამოყენების გამო.

„როსალკორეგულირების“ ყოფილი ხელმძღვანელი, იგორ ჩუიანი საერთაშორისო ძებნაზე არის გადაცემული მრავალმილიარდიანი თაღლითობის ბრალდებით.

მისი ხელმძღვანელობით, ოსური და ყაბარდოული სპირტის საწარმოებიდან ტექნიკა წაიღეს და სადღაც, ცენტრალურ რუსეთში „ფრანკეინშტეინები“ – უკანონო საწარმოები ააწყვეს.

შემდეგ, იქ გამომუშავებული ფული „ოფკ ბანკის“ საშუალებით თეთრდებოდა და რუსეთიდან საზღვარგარეთ გადიოდა.

ფუხაევი დარწმუნებული აცხადებს, რომ სწორედ კორუფციამ გაანადგურა ალკოჰოლური პროდუქციის ოსური წარმოებები.

„უკვე, რამდენი გადასახადი არ შევიდა ბიუჯეტში მას შემდეგ, საწარმოები იძულებულები გახდნენ, დაკეტილიყვნენ. არადა, ახლა, როგორ კარგ შემოსავალს მიიღებდნენ სამედიცინო პრეპარატებისა და ანტისეპტიკების წარმოებით და, მათ შორის, საზღვარგარეთ, ჩეხეთსა და პოლონეთში გატანით“.

„რესპუბლიკის ეკონომიკა გაიმართებოდა, კორონავირუსისგან მიყენებულ დარტყმას შეამსუბუქებდა და სხვებს დახმარებას აღმოუჩენდა“, – ამბობს ფუხაევი.

მას კონკრეტული შეთავაზებებიც აქვს.

მისი აზრით, სიტუაციის გადაწყვეტა ჩრდილოეთ ოსეთის ხელმძღვანელს, ვიაჩესლავ ბიტაროვს შეუძლია, თუკი ის რუსეთის პრეზიდენტს მიმართავს. მას იმ რისკებზე, სოციალური დაძაბულობის ზრდასა და უმუშევრობაზე უნდა მოუყვეს – და შესთავაზოს, ხელი შეუწყოს წარმოების მოწესრიგებას და, ამგვარად, საგადასახადო შემოსავლების ზრდას, მიაჩნია ფუხაევს.

„ზოგიერთი წყაროს ინფორმაციით, პრეზიდენტთან დაახლოებული ძმები როტენბერგები აკონტროლებენ ალკოჰოლის ინდუსტრიას. მათ უნდა ვთხოვოთ, რომ ოსურ საწარმოებს მისცენ მუშაობის საშუალება.

იქ შესაძლოა შიშობენ, რომ ჩრდილოეთოსური სპირტის საწარმოები კონკურენციას გაუწევენ რუსეთის ცენტრალური რეგიონების საწარმოებს. მაგრამ ახლა, დეფიციტის პირობებში, სამუშაო ყველას ეყოფა“, – მიაჩნია ალიკ ფუხაევს.