ომი ყარაბაღში, 3 ნოემბრის დილისთვის არსებული ვითარების მიმოხილვა

ინფორმაცია ბაქოდან

• 2 და 3 ნოემბერს, ბრძოლები გრძელდება, ძირითადად ფრონტის აღდერინის, ხოჯავენდის, ზანგილანისა და გუბადლის მიმართულებით.

• სომხეთის ტერიტორიიდან, სომხეთის მოსაზღვრე აზერბაიჯანული რაიონების დაბომბვა მიმდინარეობს: ბარდის, ჭამბარაკისა და ვარდენისის რაიონებიდან თოვუზის, გადაბეისა და დაშქესანის რაიონების მიმართულებით.

• კიდევ რვა დასახლებული პუნქტი გადავიდა აზერბაიჯანის არმიის კონტროლქვეშ – ამის შესახებ ილჰამ ალიევი იტყობინება.

• ბაქოს ცნობით, სულ მათ კონტროლქვეშ 201 დასახლებული პუნქტი გადავიდა. სრულად გათავისუფლდა ფუზულის რაიონი (ყარაბაღის მოსაზღვრე, რომელიც 1990-იანი წლების დასაწყისის ომის შემდეგ, სომხური ძალების კონტროლქვეშ იყო).

• აზერბაიჯანის პრეზიდენტის თანაშემწემ სომხეთი ფოსფორული ჭურვების გამოყენებაში დაადანაშაულა ჯერ კიდევ 8 ოქტომბერს, ფუზულის რაიონში ბრძოლისას: „ასეთი ჭურვების გამოყენებაში აზერბაიჯანის დადანაშაულებით, სომხეთი დანაშაულის გადაბრალებასა და პასუხისმგებლობის თავიდან არიდებას ცდილობს“.

ინფორმაცია ერევნიდან

• 3 ნოემბრის ღამეს, ბრძოლა, რამდენიმე მიმართულებით მიმდინარეობდა. ყარაბაღის თავდაცვის არმიამ, მცირე მონაკვეთზე, ტაქტიკური მოსაზრებით უკან დაიხია.

• აღიკვეთა აზერბაიჯანის არმიის მცდელობა, წინ წასულიყო სამხრეთ მიმართულებით (ირანის საზღვრის მიმართულებით), გრძელდება შეტევა ჩრდილოეთ მიმართულებაზე.

• მთელი 2 ნოემბერის განმავლობაში, გრძელდებოდა ბრძოლა ყარაბაღის სამხრეთით, ქალაქების მარდაკერტისა და მარტუნის მიმართულებით. აზერბაიჯანულმა ძალებმა ზეწოლა გაზარდეს.

• ყარაბაღის თავდაცვის არმიამ შედეგიანი კონტრშეტევა განახორციელა სამხრეთით, მაგრამ დაკარგა რამდენიმე პოზიცია მარტუნის მიმართულებით.

• ყარაბაღში ძლიერდება ტყის ხანძრები, მას განზრახ აჩენენ აზერბაიჯანელი სამხედროები ჰაერიდან, რისთვისაც თეთრი ფოსფორი გამოიყენება.

• ყარაბაღის ომბუდსმენის ოფისის ცნობით, უკვე, სულ მცირე 1 815 ჰექტარი დაიწვა, ეკოლოგიური კატასტროფა ხდება.

• ყარაბაღის ომბუდსმენმა განაცხადა, რომ „აზერბაიჯანის არმია ომის დანაშაულს ჩადის, ცეცხლის გაჩენა მიმართულია მშვიდობიანი მოსახლეობის წინააღმდეგ, რომელიც დაბომბვისგან თავის არიდებას ტყეებში ცდილობენ“.

• სომხეთის საგარეო საქმეთა სამინისტრომ კვლავ განაცხადა, რომ თურქეთსა და აზერბაიჯანს უცხოელი „ბოევიკი-ტერორისტები“ ჩამოჰყავთ.

• 2 ოქტომბერს, ერევანში, აშშ-ის საელჩოს წინ, რამდენიმე ასეულმა ბავშვიანმა ქალმა გამართა აქცია. მათი მოთხოვნა ომის შეჩერება და ყარაბაღის გამოუკიდებლობის აღიარებაა.