აფხაზეთში ოპოზიციის ლიდერი ეშსოუ კაკალია დაჭრეს
ოპოზიციის ლიდერი დაჭრეს აფხაზეთში
21 თებერვალს შუადღისას, ოპოზიციის ერთ-ერთი ლიდერი, ეშსოუ კაკალია დაჭრეს აფხაზეთში. ადგილობრივი მედიის ცნობით, პოლიტიკოსს ე.წ. პრეზიდენტის ადმინისტრაციის უფროსის ნათესავებმა ესროლეს.
ინციდენტის შესახებ მცირე ინფორმაციაა ხელმისაწვდომი. ცნობილია, რომ ოპოზიციის ლიდერს თავს დაესხნენ შაბათს შუადღისას სოხუმის რკინიგზის სადგურთან. მას სცემეს და პისტოლეტიდან ფეხში ესროლეს.
ჯანდაცვის მინისტრის, ედუარდ ბუტბას თქმით, ეშსოუ კაკალია საავადმყოფოში მუხლისა და ბარძაყის შუა ნაწილში ცეცხლსასროლი იარაღით მიყენებული ჭრილობებით გადაიყვანეს.
კაკალიას ასევე დაუდგინდა თავის დახურული ტრავმა.
ოპოზიციური მედიის ცნობით, დანაშაული ე.წ. პრეზიდენტის ადმინისტრაციის ხელმძღვანელის, ბესლან ეშბას ძმისშვილებმა ჩაიდინეს. ინციდენტში მონაწილე პირების ვინაობა ამ დრომდე არ გახმაურებულა.
მკვლელობის მცდელობამდე რამდენიმე დღით ადრე, კაკალიამ, აფხაზეთის გენერალური პროკურორის ყოფილმა მოადგილემ და ამჟამად ოპოზიციური ორგანიზაცია “აიდგილარას“ თავმჯდომარის მოადგილემ, ბესლან ეშბას წინააღმდეგ ბრალდებები გაახმაურა.
მან განაცხადა, რომ რუსი პოლიტიკური სტრატეგები უკანონოდ მოქმედებდნენ აფხაზეთში სწორედ პრეზიდენტის ადმინისტრაციის უფროსის ხელმძღვანელობით. ისინი ოპოზიციონერმა აქტივისტებმა, მათ შორის თავად კაკალიამ, გასული წლის 5 ნოემბერს, ადგილობრივ არჩევნებამდე სამი დღით ადრე ამოიცნეს.
ამ ინციდენტის გამო, კაკალია და კიდევ ექვსი აფხაზი ოპოზიციონერი თებერვლის დასაწყისში რუსეთის სასამართლომ დაუსწრებლად დააკავა.
რუსეთის საგამოძიებო კომიტეტი მათ სამი რუსის ცემასა და ძარცვაში ადანაშაულებს.
- რუსეთის სასამართლომ დაუსწრებლად დააკავა აფხაზეთის ე.წ. პარლამენტის წევრი და კიდევ ექვსი ოპოზიციური აქტივისტი
- რატომ ფასობს აფხაზური პასპორტი რუსულზე ნაკლებად? მოსაზრება
- აფხაზეთში ოპოზიცია მოითხოვს, რომ მთავრობა გაიწმინდოს ასლან ბჟანიას თანამოაზრეებისგან
თავის მხრივ, აფხაზეთის ხელისუფლებამ რუსეთის სასამართლოს ქმედებებს ამ საკითხთან დაკავშირებით საკუთარი სისხლის სამართლის საქმით უპასუხა. ამ საქმესაც აქვს თავისი ნიუანსები. კერძოდ, ბრალი არა მხოლოდ ოპოზიციის წარმომადგენლებს, არამედ რუს პოლიტიკურ სტრატეგებსაც ედებათ.
რუსები ოფიციალურად ძებნილთა სიაში არიან შეყვანილნი, ხოლო ოპოზიციის ზოგიერთ აქტივისტს შინაპატიმრობა შეეფარდა. დანარჩენებმა, მათ შორის კაკალიამ, მოგზაურობის აკრძალვაზე ხელი მოაწერეს.
ოპოზიცია სისხლის სამართლის საქმეს პოლიტიკურად მოტივირებულად მიიჩნევს.
