ევროპარლამენტმა მიიღო რეზოლუცია, რომელიც ეხება საქართველოში რუსული კანონის მიღებას. რეზოლუციაში შესული შესწორებების მიხედვით, ევროპარლამენტი ევროკომისიას და ევროკავშირის წევრ ქვეყნებს მოუწოდებს ბიძინა ივანიშვილის სანქცირების განხილვას და საქართველოს ევროკავშირის ქვეყნებთან უვიზო რეჟიმის გადახედვას.
ასევე, რეზოლუციის მიღებით ევროპარლამენტი ითხოვს, რომ ევროკავშირში გაწევრიანების მოლაპარაკებები არ დაიწყოს მანამ, სანამ ეს კანონი საქართველოს სამართლებრივ დღის წესრიგშია.
რეზოლუციის მიღებას მხარი დაუჭირა 425-მა ევროპარლამენტარმა, 25 წინააღმდეგი იყო, 30-მა კი თავი შეიკავა.
უვიზო მიმოსვლის შეჩერების მექანიზმი ევროკავშირმა 2013 წელს მიიღო – მექანიზმი ევროკავშირის წევრ სახელმწიფოებს საშუალებას აძლევს ევროკავშირის არაწევრ ქვეყნებს დროებით შეუჩერონ უვიზო რეჟიმი სპეციალური გარემოებების დროს.
მსგავსი გარემოებები შეიძლება იყოს: თავშესაფრის მაძიებლების განსაკუთრებული ზრდა, ეროვნული უსაფრთხოების გადაუდებელი საფრთხე, თანამშრომლობის ნაკლებობა არალეგალურად მყოფი პირების ქვეყანაში დაბრუნების პროცესში და ა.შ.
2018 წელს მიღებული რეგულაციით ევროკომისია ყოველწლიურად წარადგენს ანგარიშს უვიზო რეჟიმის მქონე ქვეყნების მიერ ვიზა ლიბერალიზაციის მოთხოვნების შესრულებაზე.
ევროკავშირს უვიზო რეჟიმი 60 სახელმწიფოსთან აქვს, ხოლო უვიზო მიმოსვლის შეჩერების პროცესში მთავარი მოქმედი ორგანო ევროკომისიაა – კომისიას შეუძლია დააკვირდეს და ანგარიშები წარუდგინოს ევროპარლამენტს და ევროპულ საბჭოს იმაზე, თუ რამდენად თანამშრომლობს სახელმწიფო ევროკავშირთან და რამდენადაა თანხვედრა ღირებულებებს შორის.
უვიზო რეჟიმის შეჩერების განხილვის დაწყებიდან 18 თვის ვადაში ევროკომისია საბოლოო პასუხს გამოაქვეყნებს.
ანა ფოტიგას მიერ წარდგენილი შესწორება მოიცავს ორ პუნქტს:
მოუწოდებს ევროკავშირის საბჭოსა და ევროკავშირის პარტნიორებს, დაუწესონ პერსონალური სანქციები ბიძინა ივანიშვილს, რომელიც “კიდევ ერთხელ ცდილობს, ძირი გამოუთხაროს ქვეყნის დასავლურ კურსს რუსეთისკენ გადახრის სასარგებლოდ” და “რომელიც საკუთარი ხალხის ინტერესების წინააღმდეგ მოქმედებს”.
კვლავ მოუწოდებს საქართველოს ხელისუფლებას, პატიმრობიდან გაათავისუფლონ ყოფილი პრეზიდენტი მიხეილ სააკაშვილი და დაუშვან მისი საზღვარგარეთ სათანადო მკურნალობა.
პოლიტიკური ჯგუფის “განაახლე” შესწორება მოიცავს 3 პუნქტს:
მოუწოდებს კომისიას, დროულად შეაფასოს საქართველოში დაგეგმილი “უცხოური აგენტების” კანონის გავლენა საქართველოს მიერ სავიზო ლიბერალიზაციის კრიტერიუმების შესრულებაზე, განსაკუთრებით, ფუნდამენტური უფლებების ნაწილში, რაც “ევროკავშირთან სავიზო ლიბერალიზაციის პოლიტიკის უმნიშვნელოვანესი კომპონენტია”.
მოუწოდებს ქართული ოცნების უმრავლესობას, გაიწვიოს საკონსტიტუციო ცვლილებების სახით ინიციირებული პროექტი, რომელიც “ზღუდავს ლგბტქი უფლებებს, რაც წარმოადგენს თავდასხმას არა მხოლოდ ლგბტქი თემაზე, არამედ სიტყვის თავისუფლებასა და თავისუფალ სამოქალაქო საზოგადოებაზე”.
იმეორებს თავის მოწოდებას საქართველოს ხელისუფლების მიმართ, გაათავისუფლოს ყოფილი პრეზიდენტი მიხეილ სააკაშვილი ჰუმანიტარული ნიშნით და დაუშვას მისი საზღვარგარეთ სათანადო მკურნალობა.
დღეს მიღებული რეზოლუცია საქართველოს მთავრობას მოუწოდებს, რომ კანონპროექტი “უცხოური გავლენის გამჭვირვალობის” შესახებ გაიწვიონ და “პატივი სცენ” შარშან დადებულ პირობას, რომ ამ კანონს აღარ დააბრუნებდნენ.
თავდაპირველად, ევროპარლამენტში “ქართული ოცნების” მიერ ინიციირებულ რუსულ კანონთან დაკავშირებით რეზოლუციის 5 სამუშაო პროექტი იყო წარმოდგენილი, თუმცა, საბოლოო ჯამში, გამოქვეყნდა საერთო რეზოლუციის პროექტი, რომელსაც ცოტა ხნის წინ ევროპარლამენტარებმა მხარი დაუჭირეს.
ამავე დროს, ევროკავშირის უმაღლესმა წარმომადგენელმა საგარეო საკითხებში, ჯოზეფ ბორელმა კიდევ ერთხელ მოუწოდა საქართველოს პოლიტიკურ ლიდერებს, გაიწვიონ “აგენტების შესახებ” კანონპროექტი და არ “გადაახვევინოს” ქვეყანას ევროპული გზიდან.
“თუ ეს კანონი მიღებული იქნება, ეს საფრთხეს შეუქმნის საქართველოს პროგრესს ევროკავშირის გზაზე. ამ კანონის მიღება ასევე იმოქმედებს ევროკავშირის მხარდაჭერაზე ქართველი ხალხისადმი, რადგან ამ დახმარების ნაწილი ქვეყანაში არასამთავრობო ორგანიზაციების მეშვეობით ხდება.” – თქვა ბორელმა.
