ევროპარლამენტმა მიიღო რეზოლუცია საქართველოს შესახებ. რა ვიცით ამ დროისთვის?
ევროპარლამენტის რეზოლუცია საქართველოზე
ევროპარლამენტი მხარს უჭერს საქართველოსთვის ევროკავშირის წევრობის კანდიდატის სტატუსის მინიჭებას. მაგრამ, იქვე, ევროპულ საბჭოს მოუწოდებს, განიხილონ პერსონალური სანქციების დაწესება ბიძინა ივანიშვილისთვის.
საქართველოში მედიის თავისუფლებების დარღვევებსა და ჟურნალისტების უსაფრთხოებაზე ევროპარლამენტის ხუთი პოლიტიკური ჯგუფის მიერ ინიცირებული, ერთობლივი რეზოლუცია ევროპარლამენტმა დღეს, 9 ივნისს მიიღო.
- საქართველომ ევროკავშირში გაწევრიანებაზე განაცხადი წარადგინა. რას ნიშნავს ეს
- ევროკავშირის წევრობის განაცხადის შემდეგ რა პროცედურებს გადის ქვეყანა
- დაუსრულებელი მცდელობა: საქართველო ევროპაში საკუთარი ალაგის ძიებაში
დოკუმენტის ტექსტი ჯერ გამოქვეყნებული არ არის. თუმცა, ამ დროისთვის უკვე ვიცით რომ:
- რეზოლუცია გამოხატავს შეშფოთებას ბოლო წლებში საქართველოში მედიის მდგომარეობისა და ჟურნალისტების უსაფრთხოების მნიშვნელოვანი გაუარესების გამო. გმობს ჟურნალისტების მიმართ დაშინების, მუქარისა და ძალადობის შემთხვევებსა და მედიის მფლობელთა მიმართ სისხლის სამართლის საქმეების ზრდას;
- ევროპარლამენტი გმობს მთავარი ოპოზიციური ტელეკომპანიის “მთავარი არხის” დირექტორის ნიკა გვარამიას მიმართ განაჩენის გამოტანას. იზიარებს ორგანიზაციის „რეპორტიორების საზღვრებს გარეშე“ მოწოდებას ნიკა გვარამიას განაჩენის გადახედვის შესახებ;
- საუბრობს 2021 წლის 5 ივლისის საქმეზე. მოუწოდებს ხელისუფლებას ეფექტიანად გამოიძიოს ძალადობრივი ჯგუფების მიერ ჩადენილი დანაშაულები;
- ეხება მოსმენების სკანდალს. ხელისუფლებას მოუწოდებს დანერგოს სათანადო მექანიზმები სახელმწიფო ინსტიტუტების მიერ თვალთვალისა და მონაცემთა შეგროვების დემოკრატიული ზედამხედველობისთვის;
- ევროპარლამენტის რეზოლუცია საქართველოს ხელისუფლებას მოუწოდებს სათანადო სამედიცინო მკურნალობის მიზნით, ჰუმანიტარული ნიშნით გაათავისუფლოს ყოფილი პრეზიდენტი მიხეილ სააკაშვილი ციხიდან;
ამ რეზოლუციით, ევროპარლამენტი მოუწოდებს ევროკავშირის ინსტიტუტებს, იმუშაონ საქართველოსთვის ევროკავშირის კანდიდატის სტატუსის მინიჭებაზე. თუმცა, იმ პირობით, რომ საქართველოს ხელისუფლება შეასრულებს ყველა კრიტერიუმს.
საინტერესოა, რომ ასეთივე რეზოლუცია ევროპარლამენტმა მიიღო უკრაინისა და მოლდოვის შესახებაც, მაგრამ, იქ პირობების შესახებ საუბარი არ არის.
ევროპარლამენტი გაწევრიანების გზაზე გადაწყვეტილების მიმღები სტრუქტურა არ არის, მაგრამ, მისი მხარდაჭერა მნიშვნელოვანი პოლიტიკური სიგნალია.
უკვე მიღებულ რეზოლუციაში, მოგვიანებით, შევიდა შესწორება, რომლის თანახმადაც, ევროპარლამენტი ევროპულ საბჭოს და დემოკრატიულ პარტნიორებს მოუწოდებს, ბიძინა ივანიშვილისთვის პერსონალური სანქციების დაწესება განიხილონ.
ევროპარლამენტი შეშფოთებულია იმ დესტრუქციული როლის გამო, რომელსაც საქართველოს პოლიტიკურ და ეკონომიკურ ცხოვრებაში ქვეყნის ერთადერთი ოლიგარქი ბიძინა ივანიშვილი ასრულებს. ასევე, შეშფოთებას გამოთქვამს მისი კავშირების გამო კრემლთან. და საუბრობს, მის კონტროლზე მთავრობაზე.
რეზოლუციის პროექტზე ევროპარლამენტში მსჯელობა გუშინ, 8 ივნისს გაიმართა. “იმედგაცრუებულები ვართ”, “ნიკა გვარამია”, “სანქციები”, “ბიძინა ივანიშვილი”, “5 ივლისი”, “საქართველომ უკან დაიხია” – ძირითადად ეს სიტყვები ისმოდა გუშინ ევროპარლამენტში.
ევროპარლამენტში სიტყვით გამოსვლისას დეპუტატმა ანა ფოტიგამ განაცხადა, რომ დღეს საქართველოს ციხეში სხედან “ყველაზე გამოჩენილი ადამიანები”, ისეთები, როგორიცაა მესამე პრეზიდენტი მიხეილ სააკაშვილი და ნიკა გვარამია.
ჩეხეთის წარმომადგენელმა მარკეტა გრეგოროვამ თქვა, რომ ისინი იმედგაცრუებული არიან იმით, რომ საქართველოს მთავრობა ჩართულია მედიის დევნაში.
ლიტვის ყოფილი პრემიერმინისტრმა და ევროპარლამენტის წევრმა, ანდრიუს კუბილიუსმა განაცხადა , რომ მედიის თავისუფლება საქართველოს მთავრობის პოლიტიკის მსხვერპლია.
ევროპარლამენტარმა მირიამ ლექსმანმა კი პირდაპირ მოითხოვა, საქართველოს ევროპულის გზის მხარდასაჭერად ივანიშვილს სანქციები დაუწესდეს.
ახლა ევროკავშირის გზაზე მყოფი საქართველო კიდევ ერთ მნიშვნელოვან დოკუმენტს ელოდება – ევროკომისიის მოსაზრებას (ე.წ. Opinion), რომელიც, JAMnews-ის წყაროს ინფორმაციით, 17 ივნისს უნდა გასაჯაროვდეს.
ევროკომისია მოსაზრებას ევროკავშირის კითხვარის საფუძველზე ამზადებს. საქართველომ ევროკომისიის 2700-მდე შეკითხვას უპასუხა. მაგრამ რა ჩაწერა დოკუმენტში, არ ვიცით – შევსებული პასუხები მთავრობას არ გაუსაჯაროებია.
ამის შემდეგ კი, უკვე 24-25 ივნისის სამიტზე, ევროკავშირის წევრი ქვეყნის ლიდერები მიიღებენ გადაწყვეტლებას, მიანიჭებს თუ არა ევროკავშირის საქართველოს კანდიდატი ქვეყნის სტატუსს.
3 მარტს საქართველომ ევროკავშირში გაწევრიანების განაცხადი წარადგინა.
11 აპრილს ევროკავშირისგან თვითშეფასების კითხვარის პირველი ნაწილი მიიღო.
2 მაისს საქართველოს პრემიერ-მინისტრმა ირაკლი ღარიბაშვილმა საქართველოში ევროკავშირის ელჩს, კარლ ჰარცელს კითხვარის პირველი ნაწილის პასუხები გადასცა.
10 მაისს ასევე კარლ ჰარცელს გადასცეს შევსებული კითხვარის მეორე ნაწილი.
17 ივნისს, ცნობილი გახდება ევროკომისიის შეფასება საქართველოს განაცხადზე.
24-25 ივნისის სამიტზე ევროკომისია წარმოადგენს მოსაზრებას საქართველოს, უკრაინისა და მოლდოვის წევრობის განაცხადების შესახებ.
