"ეს ნაბიჯები დამატებით ძირს უთხრის დემოკრატიის საფუძვლებს საქართველოში" - ევროკომისრების განცხადება
ევროკომისრების განცხადება
საგარეო საქმეთა და უსაფრთხოების საკითხებში ევროკავშირის უმაღლესი წარმომადგენელი, ევროკომისიის ვიცე-პრეზიდენტი კაია კალასი და გაფართოების საკითხებში ევროკომისარი მარტა კოსი საქართველოზე ერთობლივ განცხადებას ავრცელებენ და “ქართული ოცნების” მიერ ბოლო დროს მიღებულ რეპრესიულ კანონმდებლობას ეხმიანებიან.
მათი თქმით, ეს ნაბიჯები დამატებით ძირს უთხრის დემოკრატიის საფუძვლებს საქართველოში და მსგავსი ქმედებები ფუნდამენტურად შეუსაბამოა ევროკავშირის ღირებულებებთან დემოკრატიის, კანონის უზენაესობისა და მედია პლურალიზმის მიმართებით.
ამასთან, განცხადებაში აღნიშნულია, რომ ეს კანონები რისკის ქვეშ აყენებს სამოქალაქო აქტივისტების საქმიანობას, სამოქალაქო საზოგადოებისა და დამოუკიდებელი მედიის გადარჩენას.
განცხადება
“ახალი კანონმდებლობა, მათ შორის უცხოელი აგენტების რეგისტრაციის აქტი და კანონი მაუწყებლობის შესახებ, რომელიც პარლამენტმა მიიღო, სათანადო საჯარო კონსულტაციების გარეშე, დამატებით ინსტრუმენტებს აძლევს საქართველოს ხელისუფლებას განსხვავებული აზრის დასათრგუნად და რეპრესიების პოლიტიკის გასამკაცრებლად. ეს კანონები რისკის ქვეშ აყენებს სამოქალაქო აქტივისტების საქმიანობას, სამოქალაქო საზოგადოებისა და დამოუკიდებელი მედიის გადარჩენას, ადამიანის უფლებების დაცვას, ძირს უთხრის ფუნდამენტურ თავისუფლებებსა და დემოკრატიული გადაწყვეტილებების მიღების პროცესს.
ეს ნაბიჯები დამატებით ძირს უთხრის დემოკრატიის საფუძვლებს საქართველოში. მსგავსი ქმედებები ფუნდამენტურად შეუსაბამოა ევროკავშირის ღირებულებებთან დემოკრატიის, კანონის უზენაესობისა და მედია პლურალიზმის მიმართებით, და შორს არის იმისგან, რასაც ჩვენ მოველით კანდიდატი ქვეყნისგან. ისინი ნეგატიურად აისახება საქართველოს ევროკავშირის გზაზე. ამ ფასეულობების დაცვა არ არის მოლაპარაკებების საგანი.
ქართველი ხალხის უმრავლესობას სურს, რომ საქართველო გახდეს ევროკავშირის წევრი. ჩვენ მოვუწოდებთ ხელისუფლებას, გამოხატოს ევროკავშირის გზაზე დაბრუნების მკაფიო და შეუქცევადი ერთგულება. ამისათვის საჭიროა, შეწყდეს ძალადობა მოქალაქეების წინააღმდეგ, გათავისუფლდნენ უკანონოდ დაკავებული პირები, შეჩერდეს რეპრესიული კანონები, გაიმართოს კონსულტაციების ვენეციის კომისიასთან, დიალოგში მონაწილეობა სამოქალაქო საზოგადოებისა და ყველა პოლიტიკური აქტორის, რათა მოიძებნოს ქვეყანაში არსებული კრიზისიდან გამოსავალი.
საქართველოს ევროკავშირში გაწევრიანების გზაზე დაბრუნება სრულად საქართველოს ხელისუფლების ხელშია.
ევროკავშირი მზადაა მხარი დაუჭიროს ქართველი ხალხის ევროპულ მისწრაფებებს და ყველა ძალისხმევას საქართველოს დემოკრატიული, სტაბილური და ევროპული მომავლისკენ.” – ნათქვამია განცხადებაში.
პირველ აპრილს საქართველოს ერთპარტიულ პარლამენტში შემდეგი კანონები მიიღეს:
● „უცხოეთის აგენტების რეგისტრაციის აქტი“, – ასე ჰქვია კანონს, რომელსაც საფუძვლად უდევს ამერიკული FARA. თუმცა, განსხვავებით ამერიკული ანალოგისგან, რომლის სამიზნე ძირითადად ლობისტური ორგანიზაციები არიან, ქართული ვარიანტი მიზანში იღებს მედიას და სამოქალაქო ორგანიზაციებს.
● ცვლილებები შევიდა მაუწყებლობის კანონში. ახალი კანონმდებლობა სრულად უკრძალავს მაუწყებლებს უცხოური დაფინანსების მიღებას, რაც ისედაც კრიზისში მყოფი კრიტიკული ტელევიზიების მდგომარეობას კიდევ უფრო გაართულებს. ამავე კანონის თანახმად, შემოდის ახალი შეზღუდვები ჟურნალისტების პროფესიულ საქმიანობაში, მათ შორის წყაროებთან დაკავშირებით, მკაცრდება კონტროლი და სადამსჯელო ზომები; ამასთან, კანონი ეხება მაუწყებლების ონლაინ პლატფორმებსაც.
● სისხლის სამართლის კოდექსში დაბრუნდა „სამშობლოს ღალატის“ მუხლი. ეს მუხლი 2007 წელს გააუქმეს, თუმცა ყველაფერი, რასაც ეს მუხლი ითვალისწინებდა, კვლავ დასჯადი იყო. მაშინ ამ მუხლს “სახელმწიფოს ღალატი” ერქვა, ახლა კი “სამშობლოს ღალატი” ერქმევა.
● 15 მოქმედი კანონიდან გაქრა სიტყვა „გენდერი“. ფრაზა „გენდერული თანასწორობა“ იცვლება „ქალისა და კაცის თანასწორობით“; კანონმდებლობიდან ქრება ცნება „გენდერული იდენტობაც“ – ამ ცვლილებებს გენდერის მკვლევრები აფასებენ, როგორც „ხარკს ულტრამემარჯვენე ამომრჩევლისათვის“.
● უქმდება კანონშემოქმედებით პროცესში არასამთავრობო ორგანიზაციების ჩართულობის ვალდებულება, რის მიზეზადაც „ქართული ოცნება“ „ანტიდემოკრატიულ“ და „ძირგამომთხრელ“ საქმიანობას ასახელებს.
