საქართველომ სრულად შეასრულა თორმეტიდან სამი რეკომენდაცია, ნათქვამია შუალედურ მოხსენებაში, რომელიც აფასებს, რამდენად შეასრულა საქართველომ ევროკავშირის კანდიდატი ქვეყნის სტატუსის მისაღებად განსაზღვრული 12 პრიორიტეტი.
მოხსენება 22 ივნისს ევროკავშირის წევრი სახელმწიფოების საგარეო საქმეთა მინისტრებს სტოკჰოლმის შეხვედრაზე წარედგინათ. მანამდე, 21 ივნისს ევროკომისიამ ანგარიში ბრიუსელში ევროკავშირის ელჩებს წარუდგინა.
რაც შეეხება მოლდოვას და უკრაინას, რომელთა პროგრესიც ასევე საქართველოსთან ერთად იქნა შეფასებული – მოლდოვას ცხრა პრიორიტეტი ჰქონდა შესასრულებელი და სრულად შეასრულა სამი (დემოკრატიულ რეფორმები, სამოქალაქო საზოგადოებასთან დიალოგი და ადამიანის უფლებების დაცვა). რაც შეეხება უკრაინას, მან ამ დრომდე სრულად შეასრულა შვიდიდან ორი რეკომენდაცია, რომლებიც სასამართლო რეფორმას და მედიის შესახებ კანონმდებლობას ეხება.
უკრაინამაც უნდა შეასრულოს ვენეციის კომისიის რეკომენდაციები, რომლებიც ეხება კანონმდებლობას დეოლიგარქიზაციისა და ეროვნული უმცირესობების შესახებ, ასევე საკონსტიტუციო სასამართლოში შერჩევის პროცედურის დაწყებას.
შუალედური ზეპირი ანგარიში მნიშვნელოვანი სიგნალი ქვეყნებისთვის და მიანიშნებს იმაზე, თუ რომელ სფეროებს უნდა მიაქციოს ქვეყანამ განსაკუთრებული ყურადღება, ვიდრე ოქტომბერში ევროკომისია გაფართოების პაკეტს და რეკომენდაციებს წარადგენს.
კომენტარები
ევროკომისიის შუალედური მოხსენების შემდეგ გამართულ პრესკონფერენციაზე შვედეთის ევროპის მინისტრმა, ჯესიკა როსვალმა განაცხადა, რომ საქართველოს რეკომენდაციების შესრულების კუთხით “რაღაც პროგრესი აქვს”, მაგრამ “გარკვეული სამუშაოები კვლავ ჩასატარებელია”.
როსვალის თქმით, ევროკავშირმა საქართველოს უნდა გაუგზავნოს ერთობლივი გზავნილი, რომ მას სჭირდება რეფორმები.
“იყო, რა თქმა უნდა, რაღაც პროგრესი, მაგრამ საქართველოს კვლავ აქვს გარკვეული სამუშაოები ჩასატარებელი და ერთიანი გზავნილი უნდა გავუგზავნოთ საქართველოს, რომ მას სჭირდება მომავალი რეფორმები” – განაცხადა ჯესიკა როსვალმა.
ევროპული სამეზობლო პოლიტიკისა და გაფართოების საკითხებში ევროკომისარმა ოლივერ ვარჰეიმ სტოკჰოლმში პრესკონფერენციაზე აღნიშნა, რომ თუ ვინმეს ევროკავშირში შესვლა სურს, “ახლა არის მომენტი და დაიჭირეთ ის, გამოიყენეთ” შესაძლებლობა
მან ასევე ხაზი გაუსვა, რომ ევროსტრუქტურაში გასაწევრიანებლად საჭიროა რეფორმების განხორციელება.
“გამიმართლა, რომ წინა კვირას ბრიუსელში პრემიერ-მინისტრს [ღარიბაშვილს] შევხვდი და ეს იყო მესიჯი – თქვენ იცით, რა არის საჭირო, ასე რომ, შეასრულეთ ეს! გააკეთეთ, ვინაიდან ეს უნიკალური შესაძლებლობაა, ყველამ მაქსიმალურად უნდა ისარგებლოს ამით. ჩვენ მზად ვართ დაგეხმაროთ ამ მიზნამდე მისვლაში, მაგრამ კრიტერიუმები ყველას მიერ უნდა იქნას დაკმაყოფილებული.ასე რომ, ჩემი რეკომენდაცია [საქართველოს] მთავრობისადმი არის ის, რომ ყველა მიმართულებით დააჩქარონ სამუშაო, რათა ოქტომბერში შესრულებული ანგარიში გვქონდეს საქართველოზე, უკრაინაზე, მოლდოვაზე. ჩვენ მზად ვართ, როდესაც საქმე გაკეთებული იქნება,” – განაცხადა ვარჰეიმ.
საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე ევროკომისიამ დასკვნა 2022 წლის 17 ივნისს მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.
