EPP ბიძინა ივანიშვილის დასანქცირებას ითხოვს. რას პასუხობს ირაკლი კობახიძე
EPP ბიძინა ივანიშვილის დასანქცირებას ითხოვს
ევროპარლამენტის ყველაზე დიდი პარტია, “ევროპის სახალხო პარტია“ (EPP) ევროკავშირს მოუწოდებს, სანქციები დაუწესოს ბიძინა ივანიშვილს და მის ხელშემწყობ პირებს, რომლებიც მონაწილეობენ დემოკრატიის, ადამიანის უფლებებისა და კანონის უზენაესობის დარღვევაში საქართველოში.
“ევროპის სახალხო პარტიის” განცხადებას, მთავრობის ადმინისტრაციის შენობაში გამართულ ბრიფინგზე გამოეხმაურა “ქართული ოცნების” მთავრობის პრემიერმინისტრი ირაკლი კობახიძე.
მისი თქმით, არცერთ ორგანიზაციას თუ სახელმწიფოს, მათ შორის არც აშშ-ს, ევროკავშირსა და ევროკავშირის კონკრეტულ ქვეყნებს, არ გაუკეთებიათ განცხადება, რომლითაც “დაგმობდნენ და გაემიჯნებოდნენ ხალხის მიერ არჩეული ხელისუფლების” დამხობის მცდელობას.
რას ამბობს EPP
“როდესაც ქართველი ხალხი კვლავ აგრძელებს ბრძოლას თავისუფლებისა და ევროპული მომავლისთვის, ოლიგარქ ბიძინა ივანიშვილის პარტიამ – “ქართულმა ოცნებამ“ – 4 ოქტომბერს კიდევ ერთი ფარსი არჩევნები ჩაატარა, რომელშიც აქტივობის რეკორდულად დაბალი მაჩვენებელი დაფიქსირდა და რომელსაც ძირითადმა ოპოზიციურმა ძალებმა ბოიკოტი გამოუცხადეს მასობრივი რეპრესიებისა და რეჟიმის ოპონენტებზე ძალადობის ფონზე.
“ქართული ოცნების“ წარმომადგენელთა მიერ განხორციელებული ბოლო დაკავებები და დევნის მუქარა მიზნად ისახავს ხალხის პროტესტის უფლებების შეზღუდვას, პროევროპული ოპოზიციის განადგურებას და საზოგადოებაში შიშის დამკვიდრებას.
ჩვენ მოვუწოდებთ “ქართულ ოცნებას“, შეწყვიტოს ძალადობა და რეპრესიები და პატივი სცეს ქართველი ხალხის ევროპულ მისწრაფებებს. ასევე, მოვუწოდებთ ევროკავშირსა და მის წევრ ქვეყნებს, დააწესონ მიზნობრივი სანქციები ბიძინა ივანიშვილზე და მის ხელშემწყობ პირებზე, რომლებიც საქართველოში დემოკრატიის, ადამიანის უფლებებისა და სამართლის უზენაესობის შერყევაში მონაწილეობენ.” – წერია განცხადებაში.
რას პასუხობს კობახიძე
“უკვე მეოთხე დღეა, რაც განხორციელდა ძალადობრივი შტურმი საქართველოს პრეზიდენტის სასახლეზე, რომლის წინასწარ გაცხადებული მიზანი ქართველი ხალხის მიერ არჩეული ხელისუფლების დამხობა იყო. თუმცა, ამ დღეების განმავლობაში, არცერთ ორგანიზაციას თუ სახელმწიფოს, რომელსაც საქართველოში განვითარებული შიდაპოლიტიკური მოვლენების მყისიერ შეფასებაზე, ქვეყნის გაკრიტიკებასა და მისთვის მითითებების მიცემაზე აქვს პრეტენზია – მათ შორის აშშ-ს, ევროკავშირს და ევროკავშირის კონკრეტულ ქვეყნებს – არ გაუკეთებია განცხადება, რომლითაც დაგმობდა და გაემიჯნებოდა ხალხის მიერ არჩეული ხელისუფლების დამხობის მცდელობას და ძალადობრივ შტურმს საქართველოს პრეზიდენტის სასახლეზე.
მეტიც, ევროკავშირმა, ოდირმა და სხვა სუბიექტებმა საპირისპირო სულისკვეთების განცხადებების გაკეთებაც კი იკადრეს. ბუნებრივია, დამხობის მცდელობისა და ძალადობისგან არგამიჯვნა და მათი არდაგმობა იოლად განიმარტება, როგორც დამხობისა და ძალადობის მხარდაჭერის ირიბი, მაგრამ მკაფიო გამოხატულება.“ – განაცხადა კობახიძემ.
