აშშ-ს სახელმწიფო მდივანმა, ენტონი ბლინკენმა წარმომადგენელთა პალატის საგარეო საქმეთა კომიტეტის წინაშე გამართული განხილვის დროს განაცხადა, რომ საქართველოს პარლამენტის მიერ მესამე მოსმენით მიღებული კანონი “უცხოური გავლენის გამჭვირვალობის” შესახებ რუსული სახელმძღვანელოდანაა გადმოტანილი და აღნიშნა, რომ აშშ, სავარაუდოდ, საპასუხო ზომებს მიიღებს.
ამას გარდა, ბლინკენმა ხაზი გაუსვა, რომ კანონის უარყოფით გავლენებს საქართველოს ევროინტეგრაციაზე ევროკავშირშიც განიხილავენ. მისი თქმით, არსებობს მოლოდინი, რომ მომავალში ევროკავშირისგანაც საპასუხო “ნაბიჯებს ვიხილავთ.”
“ძალიან შეშფოთებულები ვართ “უცხოეთის აგენტების კანონით”, რომელიც [საქართველოში] მიიღეს. ვფიქრობ, სამწუხაროდ, ეს პირდაპირ მოსკოვის სახელმძღვანელოდანაა გადმოწერილი. ეს აშკარად ეწინააღმდეგება ქართველი ხალხის უმეტესობის სურვილს, იარონ ევროკავშირისკენ და ევროინტეგრაციისკენ. ძალიან ბევრს ვმუშაობთ იმაზე, თუ რისი გაკეთება შეგვიძლია ამაზე საპასუხოდ და ჩვენ ნამდვილად ვიმოქმედებთ. ევროკავშირიც განიხილავს, რა გავლენა ექნება ამ კანონს საქართველოს გაწევრიანების პროცესზე, ასე რომ, მოველი, რომ ამ კანონის მიღებას შედეგები მოჰყვება.” – აღნიშნა აშშ-ს სახელმწიფო მდივანმა.
“რადიო თავისუფლება” ვაშინგტონიდან ანონიმურ წყაროზე დაყრდნობით წერს, რომ ამერიკის შეერთებული შტატები ფლობს ინფორმაციას, რომელსაც “ქართული პოლიტიკური ელიტის წარმომადგენლების რეპუტაციის გაცამტვერება შეუძლია”.
წყაროს ცნობით, MEGOBARI Act-ზე მუშაობა უკვე რამდენიმე თვეა მიმდინარეობს, რადგანაც კონგრესში ექსპერტები მოელოდნენ, რომ საქართველოს მმართველი პარტია შარშან პროტესტის ფონზე გაწვეული რუსული კანონპროექტის ხელახლა მიღებას შეეცდებოდა.
გამოცემას წყარო უყვება, რომ ქართულ პოლიტიკურ ელიტაში “რუსი აგენტების გამოაშკარავება, ისევე როგორც ჩინეთის გავლენის” შემთხვევების გამოვლენა, საფუძველს გამოაცლის ქართული ოცნების ნარატივს, რომ თითქოს ის “უცხოური აგენტების” კანონპროექტით ქვეყნის “სუვერენიტეტს” იცავს.
