"ნაციონალური მოძრაობა" უკრაინაში გენოციდის აღიარებაზე პარლამენტში დადგენილებას არეგისტრირებს
ენმ გენოციდის აღიარებაზე პარლამენტში დადგენილებას არეგისტრირებს
ოპოზიციური პარტია “ნაციონალური მოძრაობა” უკრაინაში გენოციდის აღიარების თაობაზე პარლამენტში დადგენილებას არეგისტრირებს. როგორც პარტიის თავმჯდომარემ, ნიკა მელიამ დღეს გამართულ ბრიფინგზე განაცხადა, დადგენილება იქნება ერთგვარი პოლიტიკური შეფასება – ბუჩაში ნანახმა დაარწმუნა თუ არა ქართული ოცნება, რომ უკრაინაში ნამდვილად არის გენოციდი.
“მაშინ, როდესაც ევროპული ქვეყნის არაერთმა პარლამენტმა მიიღო დადგენილება უკრაინაში გენოციდის აღიარების თაობაზე, ჩვენი პარლამენტის თავმჯდომარე, რომელიც ადგილზე იყო ჩასული და ნახა, როგორ არის დახვრეტილი ხალხი, ხელებშეკრული ფეხმძიმე ქალები, ბავშვები, ვერ ბედავს თქვას, რა მოხდა სინამდვილეში.” – ამბობს ნიკა მელია.
მისივე განმარტებით, ეს უნდა გახდეს მორიგი ლაკმუსის ქაღალდი ბიძინა ივანიშვილისთვის, შალვა პაპუაშვილისთვის და სხვებისთვის:
“ეს ბუნებრივია, არ იქნება იურიდიული და სამართლებრივი დეტალების გამორკვევის პროცესი, ეს იქნება პოლიტიკური შეფასება – ან კი ან არა. ბუჩაში ნანახმა ან დაარწმუნა ქართული ოცნება, რომ იქ ნამდვილად არის გენოციდი, ან ისინი ამ ყველაფერს უარყოფენ.”
ყველაზე მსხვილი ოპოზიციური პარტია ამ ინიციატივას აყენებს მაშინ, როცა რამდენიმე დღით ადრე ქვეყნდება ქვეყნის არაფორმალური მმართველის, ბიძინა ივანიშვილისა და რუსი ოლიგარქის, ვლადიმერ ევტუშენკოვს შორის სატელეფონო აუდიოჩანაწერი, სადაც ევტუშენკოვი ივანიშვილს სთხოვს სანქციების გვერდის ავლაში დახმარებას, თუ მასაც აქვს ამის სურვილი. ჩანაწერში ისმის კონკრეტული სახელები და გვარები – მათ შორის ახსენებენ სანქცირებული ევტუშენკოვის კომპანიაში ვიცე-პრეზიდენტის, ალი უზდენოვის ვიზიტს საქართველოში.
ჩანაწერს უკვე გამოეხმაურა უკრაინის მმართველი პარტიის, “ხალხის მსახურის” თავმჯდომარე, დავით არახამია. მისი თქმით, ის მიმართავს ევროკავშირსა და ამერიკას, განიხილონ ივანიშვილისთვის პერსონალური სანქციები.
ევტუშენკოვის სახელმა საქართველოში ჯერ კიდევ “კარტოგრაფების საქმეში” გაიჟღერა. მაშინ პარტია “დროას” ლიდერმა ელენე ხოშტარიამ საგამოძიებო ვიდეო გამოაქვეყნა, საიდანაც ვიგებთ, რომ სწორედ ევტუშენკოვია დავით ხიდაშელის საკომუნიკაციო კომპანიის, “სისტემის” დამფუძნებელი და აქციების საკონტროლო პაკეტის მფლობელი.
