კომენტარი: მიზეზს ეძებენ, რომ გააჩერონ არასამთავრობო ორგანიზაციები და მოქალაქეები ჩაგვრის წინაშე მარტო დატოვონ
ენჯეოების დაყადაღება
“საერთაშორისო გამჭვირვალობა – საქართველოს” აღმასრულებელმა მდივანმა, ეკა გიგაურმა ე.წ. საბოტაჟის საქმეზე მიმდინარე გამოძიებასთან დაკავშირებით ისაუბრა და განაცხადა, რომ ხელისუფლება მიზეზს ეძებს, რომ გააჩეროს არასამთავრობო ორგანიზაციები და მოქალაქეები დატოვონ უკანონობისა და ჩაგვრის წინაშე მარტო, დახმარების გარეშე.
კითხვაზე, შესაძლებელია თუ არა უახლოეს მომავალში უკვე არსებულ პატიმრებს არასამთავრობო ორგანიზაციების წარმომადგენლებიც დაემატონ, გიგაურმა განაცხადა, რომ გამორიცხული არაფერია და ყველაფერს ელოდებიან.
თბილისის საქალაქო სასამართლომ რამდენიმე არასამთავრობო ორგანიზაციის საბანკო ანგარიშებზე ყადაღის დადების თაობაზე პროკურატურის შუამდგომლობა დააკმაყოფილა. შესაბამის განცხადებას თავად საქართველოს პროკურატურა ავრცელებს.
საქმე ეხება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე საქართველოს პროკურატურაში მიმდინარე გამოძიებას.
ეკა გიგაური: “მიზანი ზუსტად ეს არის, მიზეზს ეძებენ, რომ გააჩერონ არასამთავრობო ორგანიზაციები. მე მაინც მგონია, რომ პირველ რიგში მათთვის პრობლემურია იურიდიული დახმარება, რომელსაც ჩვენ ვუწევთ მოქალაქეებს, ამიტომ, ეს არის მათი მთავარი მიზანი, რომ მოქალაქეები დატოვონ უკანონობისა და ჩაგვრის წინაშე მარტო, დახმარების გარეშე.
არაფერი არ არის გამორიცხული, ჩვენ ყველაფერს ველოდებით. ამ საქმეების იურიდიულ შეფასებას აზრი არ აქვს, აბსოლუტურად უკანონოა ყველაფერი ისევე, როგორც სინდისის პატიმრებთან დაკავშირებით. მიმდინარე გამოძიებებთან დაკავშირებითაც არაფერი არ არის, არანაირი იურიდიული მტკიცებულებები.
“ქართული ოცნების” ხელისუფლების შეცვლა არის ქართველი ხალხის გადაწყვეტილება, ეს არავის საქმე არ არის გარდა ქართველი ხალხისა. ზუსტად იმიტომ ვითხოვთ ჩვენ სამართლიან არჩევნებს. სამართლიანი არჩევნები უნდა იყოს იმისთვის, რომ ქართველმა ხალხმა გადაწყვეტილება მიიღოს. მთავარი არის ის, რომ აქ იყოს დამოუკიდებელი ინსტიტუტები, ჩატარდეს სამართლიანი არჩევნები და სამართლიანი არჩევნების წესით, თუ ამას ქართველი ხალხი გადაწყვეტს, შეიცვალოს ხელისუფლება, მაგრამ რასაც აკეთებს “ქართული ოცნება” არის ზუსტად ის, რომ მათ მიიტაცეს ინსტიტუტები და არ აძლევენ ქართველ ხალხს საშუალებას, რომ ეს გადაწყვეტილება თავისუფალ გარემოში მიიღონ.
ზუსტად ამას ემსახურება “ქართული ოცნების” პოლიტიკა, რომ ვერ ჩატარდეს აქ სამართლიანი არჩევნები და ვერც ვერავინ ვერ თქვას ამის შესახებ ვერაფერი, ამიტომ ერჩიან მედიასა და არასამთავრობო სექტორს და, განსაკუთრებით, სადამკვირვებლო ორგანიზაციებს, რომ, გარდა იმისა, რომ ისინი გააყალბებენ არჩევნებს და ყველა ინსტიტუტი მათ მოემსახურება, ამაზე არც არავინ არ ილაპარაკოს.
მე მახსენდება, როდესაც ათი არასამთავრობო ორგანიზაციის ლიდერი ვიდექით ხოლმე სასამართლოს წინ, როდესაც მურუსიძე უვადოდ დანიშნეს. მაშინ კი გავავრცელეთ ეს ინფორმაციას, რომ იქ ვაპირებდით აქციის მოწყობას და ჩვენ კი მივედით პლაკატებით, მაგრამ სულ ათი კაცი ვიყავით და ზუსტად ვიცოდით, რომ ეს გადაწყვეტილება იყო პრობლემური იმიტომ, რომ ამ კაცის დატოვება სასამართლო სისტემაში არ შეიძლებოდა. იგივე იყო, როდესაც დანიშნეს ჩინჩალაძე, რომელიც ასევე წინა ხელისუფლების ძალიან გავლენიანი მოსამართლე იყო.
დღეს არის ძალიან სამწუხარო რეალობა, როდესაც ძალიან ბევრს შეეხო ეს, მაგრამ ჩვენი მხრიდან ყოველთვის ვსაუბრობდით ამაზე. რა თქმა უნდა, უნდა ყოფილიყო უფრო მეტი რეაქცია თავის დროზე, მაგრამ ამას ჰქონდა ასევე საფუძველი იმიტომ, რომ მაშინ ეს ასე მასიურად არ ეხებოდა ხალხს, თუმცა, ისინი არ შეცვლილან, ასეთები იყვნენ ყოველთვის, წინა ხელისუფლების დროსაც ასეთები იყვნენ და ახლაც ასეთები არიან. ახლა, ყველაფერთან ერთად, კორუფციაში არიან ჩართულები, გამდიდრებულები არიან, უკვე თავის ქონებასაც იცავენ ყველაფერთან ერთად.
მე მგონია, რომ მოვა დრო ამ ქვეყანაში როდესაც ყველა ამ მოსამართლეს ამ ტკივილისთვის, რასაც ისინი ანიჭებენ, ყველა იმ გადაწყვეტილებისთვის, რასაც ისინი იღებენ, პასუხი მოეთხოვებათ.”
