აფხაზეთში კვლავ არ არის შუქი. ოპოზიცია დარწმუნებულია, რომ ფული მოიპარეს
ენერგოკრიზისი აფხაზეთში
აფხაზეთში ოპოზიციამ ხელისუფლებას შეახსენა, რომ გენერალური პროკურატურა უკვე ერთი წელია აჭიანურებს აჩიგვარას ელექტროგადამცემი ხაზის შეკეთებისას შესაძლო ქურდობისა და სახელმწიფო ქონების მიტაცების ფაქტების გამოძიებას. არადა, ასლან ბჟანიამ სამართალდამცავებს გამოძიების უმოკლეს დროში დასასრულებლად ერთი წლის წინ ორ კვირიანი ვადა მისცა.
ამის გამო ოპოზიცია გენერალურ პროკურატურას დაუპირისპირდა და ეს დაპირისპირება მორიგი ენერგეტიკული კრიზისის ფონზე მიმდინარეობს.
ოპოზიციის ლიდერმა ადგურ არძინბამ ჯერ კიდევ 2022 წლის ნოემბრის შუა რიცხვებში სპეციალურად გამართულ პრესკონფერენციაზე გამოთქვა ეჭვი, რომ აჩიგვარას ელექტროგადამცემი ხაზის შეკეთებისას მოხდა მასშტაბური ქურდობა.
მან წარმოადგინა მასალების შესაძენად მთავრობის მიერ დამტკიცებული ოფიციალური ხარჯთაღრიცხვა და შეადარა სიაში მითითებული მაჩვენებლები საბაზრო ფასებს.
ხარჯთაღრიცხვაში 70 პუნქტია და თითოეულ მათგანზე, არძინბას თქმით, ფასები გაბერილი იყო ერთნახევრჯერ, ორჯერ და ზოგან სამჯერაც კი. შედეგად, არძინბას გათვლებით, აჩიგვარას ელექტროგადამცემი ხაზების რემონტისთვის გამოყოფილი ბიუჯეტის სახსრების მინიმუმ მესამედი მოიპარეს.
ამ პრესკონფერენციიდან მეორე დღეს პრეზიდენტმა ასლან ბჟანიამ დაიბარა გენერალური პროკურატურის ხელმძღვანელობა და ორი კვირა მისცა მათ მოწოდებული მასალების შესასწავლად და იმის დასადგენად, არსებობს თუ არა სისხლის სამართლის საქმის აღძვრის საფუძველი.
თუმცა, არც ორი კვირის შემდეგ, არც ორი თვის და არც ერთი წლის შემდეგ, გენერალურ პროკურატურას აღნიშნულის თაობაზე დასკვნა არ დაუდია. თუმცა, ინსპექტირების სხვა ორგანომ, კონტროლის პალატამ – რომელიც ამ საკითხს ასევე სწავლობს – კორუფციული ელემენტები აღმოაჩინა.
- თბილი საბანი და ცირკი სახლში – როგორ გადააქვთ აფხაზეთის მცხოვრებლებს უშუქობა
- როგორ მუშაობენ ქართველები და აფხაზები ერთად? | ენგურჰესის დირექტორი ლევან მებონია
გენერალურმა პროკურატურამ დავიანება იმით ახსნა, რომ შესასწავლია დიდი რაოდენობით მასალები და ჩასატარებელია უამრავი ექსპერტიზა, რომელთა უმრავლეოსობა რუსეთში ტარდება.
თუმცა, ოპოზიციას ეს არგუმენტი არ აკმაყოფილებს. ოპოზიცია დარწმუნებულია, რომ ხელისუფლება უბრალოდ ცდილობდა საქმის მიჩქმალვას გამოძიების გაჭიანურებით. 2023 წლის მაისში ადგურ არძინბამ საჩივარი შეიტანა გენერალური პროკურორისა და მისი მოადგილის წინააღმდეგ და მოიგო საქმე: სასამართლომ დაადგინა, რომ პროკურატურა მართლაც ავლენს უმოქმედობას.
ახლა, როდესაც აფხაზეთში მორიგი ენერგეტიკული კრიზისია, აღნიშნული თემა კიდევ უფრო აქტუალური გახდა და ოპოზიცია რეგულარულად ახსენებს ხელისუფლებას გამოუძიებელ საქმეს. მიმდინარე ენერგეტიკული კრიზისის მიზეზადაც უხარისხოდ ჩატარებული სამუშაოები და მიტაცებული ქონება სახელდება.
2023 წლის ოქტომბრის დასაწყისისთვის, აფხაზეთმა სრულად გამოიყენა ენგურჰესის მთლიანი გენერაციის 40 პროცენტიანი უფასო კვოტა. ახლა მთავრობა ეძებს 900 მილიონ რუბლს [დაახლოებით 9 მილიონ 900 ათასი აშშ დოლარი], რათა გადაიხადოს რუსეთიდან შემოსული ელექტროენერგიის ფული და ამით დაფაროს დავალიანება.
მანამდე მოსკოვი აფხაზეთს ჰუმანიტარული დახმარების სახით უსასყიდლოდ აწვდიდა ელექტროენერგიას. თუმცა, ამჯერად მოსკოვმა მოითხოვა ამაში ფულის გადახდა. ბევრი ამას უკავშირებს იმ ფაქტს, რომ რუსეთი უკმაყოფილოა აფხაზეთში ენერგეტიკული რეფორმის ტემპით.
ამ რეფორმის ერთ-ერთ კომპონენტი უნდა ყოფილიყო ენერგეტიკული ინდუსტრიის დენაციონალიზაცია, რათა რუსულ კომპანიებს მასში ინვესტირების საშუალება მისცემოდათ.
თუმცა, აფხაზეთის კანონმდებლობაში შესაბამისი ცვლილებები არ შეუტანიათ.
აჩიგვარას ელექტროგადამცემი ხაზების შეკეთებისას შექმნილი ვითარებიდან გამომდინარე, ოპოზიცია მიიჩნევს, რომ მოქმედი ხელისუფლებას ზოგადად არ შესწევს უნარი რაიმე ტიპის მნიშვნელოვანი რეფორმა გაატაროს ენერგეტიკის სფეროში.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
