საქართველოს ელჩი საფრანგეთსა და მონაკოში რუსული კანონის გამო გადადგა

ელჩი საფრანგეთსა და მონაკოში რუსული კანონის გამო გადადგა

საქართველოს ელჩი საფრანგეთსა და მონაკოში, გოჩა ჯავახიშვილი თანამდებობას ტოვებს. ჯავახიშვილი აღნიშნავს, რომ ევროპა უპირველესად ღირებულებათა ერთობლიობაა და ევროპელობა ნიშნავს, ამ ღირებულებათა ერთგულებას.

დიპლომატის თქმით, განწყობა, რომელიც კანონპროექტის გარშემო არსებობს ჩვენს მეგობრებთან და უცხოელ პარტნიორებთან მიმართებით, უკიდურესად ართულებს მისი, როგორც “საფრანგეთის რესპუბლიკასა და მონაკოში საქართველოს საგანგებო და სრულუფლებიანი ელჩის მისიას” და ამის ნიადაგზე, ის მიმართავს  ხელმძღვანელობას თხოვნით, ვადამდე შეუწყდეს დაკავებულ თანამდებობაზე უფლებამოსილება.

“30 წელია ვმსახურობ ქართულ დიპლომატიაში, 10 წელი ვასწავლიდი ევროპულ ინტეგრაციას. მეც მჯერა და სტუდენტებსაც ვარწმუნებდი, რომ ევროპული კულტურისა და მომავლის ქვეყანა ვართ. ევროპაა ჩვენი ადგილი. ვარწმუნებდი, რომ ევროპას ჩვენ სტერილური ერი კი არ ვჭირდებით, არამედ ჩვენი თავისებურებებით, ჩვენი უნიკალური ენით, ანბანითა და პოლიფონიით, ჩვენი მდიდარი ტრადიციებითა და უძველესი კულტურით, ჩვენი ხიბლითა და ლაზათით უნდა გავამდიდროთ ევროპა მეთქი. ამის გულწრფელად რომ არ მჯეროდეს, აქამდეც ვერავინ გამაჩერებდა ამ სამსახურში.

იმასაც დავამატებ, რომ მტკიცედ მჯერა, საქართველო უკვე საკმარისად გაძლიერდა ეროვნულ ღირებულებებში, თავისუფლებისა და დამოუკიდებლობის ფასი ვიცით. ქართველმა ერმა რუსეთისაგან იმდენი ნახა და განიცადა, რომ ქართული მიწა ვეღარასოდეს იქნება ნოყიერი რუსული თესლისა და ნერგისთვის.

პირადად მე არავის ვიცნობ ჩემს ირგვლივ, არც მთავრობაში და არც დიპლომატებში ღიად პრორუსს, მესმის, რომ ეს შეიძლება ერთგვარი ტაქტიკა იყოს, გარკვეული მიზნის მისაღწევად. თუმცა, მე ვეღარ ვხედავ ჩემს როლსა და რესურსს ამ მიმართულებით: ევროპისკენ მივდიოდე და ევროპისგან ვიცავდე თავს.” – წერს ჯავახიშვილი.

● ევროკავშირის სპეციალური წარმომადგენელი სამხრეთ კავკასიაში: საით მიდიხარ, საქართველო?
● “ვიწყებთ ბაზის შექმნას, სადაც თავს მოიყრის ინფორმაცია შანტაჟში ჩართულ პირებზე” – შალვა პაპუაშვილი
● თავდასხმების სერია “ქართული ოცნების” ოპონენტებზე – ოპოზიციონერებს და აქტივისტებს სადარბაზოებთან ხვდებიან

მისივე განმარტებით, ის გარემო და განწყობა, რომელიც რეინკარნირებული კანონპროექტის გამო “ჩვენს მეგობრებთან” და უცხოელ პარტნიორებთან ურთიერთობაში შეიქმნა, უკიდურესად ართულებს პირადად მის, როგორც საფრანგეთის რესპუბლიკასა და მონაკოში საქართველოს საგანგებო და სრულუფლებიანი ელჩის მისიას.

ჯავახიშვილი ხაზს უსვამს, რომ “პროტესტიცა და კმაყოფილებაც არჩევნებზე უნდა გამოვხატოთ”. დიპოლმატის თქმით, არ უნდა რომ მისი გულწრფელი აზრი პოლიტიკურ დემარშად იქნას აღქმული ვინმეს სასარგებლოდ ან ვინმეს საზიანოდ.

“მინდა, დიდი ხნის ყოყმანის შემდეგ გავთავისუფლდე იმ ტვირთისგან, რომელსაც ვგრძნობ ვეღარ ვერევი.

თუნდაც ვცდებოდე, არ ვინანებ. მხოლოდ საკუთარი სინდისის კარნახით ვიქცევი. იმასაც ვაცნობიერებ, ბევრს გულს ვატკენ ამ გადაწყვეტილებით და ამას უფრო განვიცდი.

მომავალშიც, სადაც არ უნდა ვიყო, მუდამ ვიქნები საქართველოს ევროპული მომავლის მხარდამჭერი და გულშემატკივარი”. – წერს გოჩა ჯავახიშვილი, სოციალურ ქსელში.