ეკონომიკის სამინისტრო “ფრონტერას” მოლაპარაკებას სთავაზობს

საქართველოს ეკონომიკისა და მდგრადი განვითარების სამინისტრო კომპანია “ფრონტერას” კომპრომისს სთავაზობს – საუბარია შეხვედრაზე და გარკვეული პირობებით მუშაობის განახლების უფლების მიცემაზე.  სამინისტრომ კომპანიას მოლაპარაკება და თანამშრომლობის გაგრძელება მას შემდეგ შესთავაზა, რაც ამერიკელმა სენატორებმა აშშ-ის სახელმწიფო მდივანს, მაიკ პომპეოს წერილი მისწერეს და საქართველოში დასავლური ბიზნესის შევიწროების გამო შეშფოთება გამოთქვეს. მანამდე სამინისტროში აცხადებდნენ, რომ საქართველოს სახელმწიფოსა და “ფრონტერას” შორის არსებული დავა საარბიტრაჟო სასამართლომ საქართველოს სასარგებლოდ გადაწყვიტა და კომპანიასთან გასარკვევი არაფერი იყო. 

რას გულისხმობს ეკონომიკის სამინისტროს შეთავაზება? 

ეკონომიკისა და მდგრადი განვითარების მინისტრის მოადგილე დავით თვალაბეიშვილი ამბობს, რომ ორი თვის წინ დასრულდა დავა საერთაშორისო არბიტრაჟში და ის ქართული მხარის სასარგებლოდ გადაწყდა, თუმცა,  არბიტრაჟის გადაწყვეტილებების მიღების შემდეგ დარჩა გარკვეული კითხვები, როგორც კომპანია „ფრონტერას“, ისე ამერიკელი პარტნიორების მხრიდან.

“მინდა განვაცხადო, რომ ჩვენ მზად ვართ, ეს საკითხები გავიაროთ კომპანიასთან და ვეცადოთ, გამოვნახოთ იმგვარი კომპრომისი, რომ შესაძლებელი იყოს კომპანია „ფრონტერას“ მიერ არსებულ საბადოებზე გარკვეული პირობებით მუშაობის გაგრძელება, რა თქმა უნდა, მისი მხრიდან შესაბამისი გარანტიის მიღებით. ამასთან დაკავშირებით, ჩვენ მოვუწოდებთ კომპანია „ფრონტერას“, რომ შეხვედრა შედგეს, რათა ეს საკითხები განვიხილოთ,” – აცხადებს ეკონომიკის მინისტრის მოადგილე, დავით თვალაბეიშვილი. 

რას საქმიანობს “ფრონტერა”

ფრონტერა აშშ-ში დაფუძნებული კომპანიაა, რომლის მიზანიც ნავთობისა და გაზის მოპოვებაა. მან საქართველოში მუშაობა 1997 წლიდან დაიწყო. ამ ხნის განმავლობაში კომპანიამ არაერთხელ განაცხადა, რომ გაზის დიდ მარაგს მიაგნო. 

• ივანიშვილის კავშირი რუსეთის მთავრობასთან, დასავლური ბიზნესის შევიწროება – რას წერენ სენატორები აშშ-ს სახელმწიფო მდივანს
• 2013 წლიდან ჩვენ ვხედავთ მზარდ ანტიამერიკულ განწყობას – “ფრონტერა”

სახელმწიფო და ფრონტერა ერთმანეთს საარბიტრაჟო სასამართლოში ედავებოდნენ, რაც არაერთხელ გახდა პოლიტიკური სპეკულაციების საგანი.

საქართველოს მთავრობა აცხადებს, რომ საერთაშორისო არბიტრაჟში მიმდინარე დავა ქართული მხარის გამარჯვებით დასრულდა. თავის მხრივ, “ფრონტერა” ამტკიცებს, რომ მთავრობა ცრუობს და საარბიტრაჟო დავა მათ სასარგებლოდ გადაწყდა. 

ქართული მხარე აცხადებს, რომ მზადაა, გაასაჯაროოს არბიტრაჟის გადაწყვეტილება, თუმცა მხარეთა შეთანხმების საფუძველზე, ცალმხრივად ამის უფლება არ აქვს და უკვე მიმართეს კომპანიას შედეგების გასაჯაროვებაზე თანხმობის მისაღებად.

როგორც საქართველოს ნავთობისა და გაზის სახელმწიფო სააგენტოში აცხადებენ, საარბიტრაჟო ტრიბუნალმა დაადგინა „ფრონტერას“ მხრიდან კონტრაქტის არსებითი დარღვევის ფაქტი და კომპანიას ქართული მხარისთვის 6 მლნ აშშ დოლარის გადახდა დააკისრა. 

საქართველოს ნავთობისა და გაზის სახელმწიფო სააგენტოსა და  „ფრონტერას“ შორის გაფორმებული კონტრაქტი 2020 წლის 27 ივლისს შეწყდება. 

ამერიკელი ინვესტორებისთვის, მათ შორის „ფრონტერასთვის“ საქართველოში შექმნილ პრობლემებზე საუბარია ამერიკელი სენატორების და კონგრესმენების ჯგუფის წერილში, რომელიც მათ 15 მაისს გაუგზავნეს შეერთებული შტატების სახელმწიფო მდივანს და ფინანსთა მინისტრს.

2 ივნისს კომპანია “ფრონტერას” ხელმძღვანელებმა საქართველოს პრემიერ-მინისტრს, გიორგი გახარიას წერილით მიმართეს. წერილში აღნიშნულია, რომ საქართველოში გაუარესდა ბიზნესგარემო,  რომელიც არ ცნობს კანონის უზენაესობას და იყენებს სასამართლოს, როგორც იარაღს და ნაცვლად ამერიკულ ინვესტიციებთან პარტნიორობისა, უპირატესობას ანიჭებს სახელმწიფოს მიტაცებას. 

წერილში ისინი გიორგი გახარიას თანამშრომლობის გაგრძელებისკენ მოუწოდებენ და აცხადებენ, რომ “ფრონტერასთან” თანამშრომლობის გაგრძელება “წამახალისებელი სიგნალი იქნება ამერიკული კომპანიებისთვის”.