ეკლესია და Pfizer-ი: რატომ ჩააგდო საქართველომ ვაქცინაციის კამპანია

საქართველოში კორონავირუსის ვაქცინაციის კამპანია ფაქტობრივად ჩავარდა 

საქართველოს ხელისუფლებამ აღიარა, რომ ქვეყანაში უკვე იფეთქა კორონავირუსის ეპიდემიის „მეოთხე ტალღამ“, მაგრამ არ არიან მზად დაეთანხმონ იმას, რომ დღევანდელი კატასტროფული მდგომარეობის მიზეზი – ვაქცინაციის კამპანიის ჩავარდნაა. „მედიაქსელმა“ გააანალიზა ვაქცინაციის დამთრგუნველად დაბალი ტემპის მიზეზები. 

დღეისათვის, საქართველოში აცრილია მოსახლეობის მხოლოდ 4.1 პროცენტი. ნათელია, რომ სწორედ ეს არის კატასტროფულად მძიმე ეპიდემიოლოგიური ვითარების მთავარი მიზეზი.

საქართველოში, რომლის მოსახლეობაც 3.7 მილიონ ადამიანს შეადგენს, კორონავირუსით ინფიცირების ახალ შემთხვევათა რაოდენობამ უკვე გადააჭარბა 3 ათას ადამიანს. ყოველდღიურად, „კორონათი“, დაახლოებით, 20 ადამიანი იღუპება. 

• ექიმებისა და მეცნიერების მიმართვა: “საქართველოში ვაქცინაციის დონე საგანგაშოდ დაბალია”
• ექვსი ქართული სტარტაპი, რომელსაც პანდემიის დროს კარგად მისდის საქმე
• დასავლეთი თუ რუსეთი? საით მიყავს ქვეყანა ქართულ ეკლესიას

Pfizer-ის მომლოდინენი 

დღეისათვის, საქართველოში, დაახლოებით, 420 ათასი ადამიანია აცრილი ერთი დოზით მაინც.

როდესაც ვაქცინაციის დაბალი ტემპის მიზეზებზე საუბრობენ, ხელისუფლება მოსახლეობისკენ იშვერს ხელს – ამბობენ, რომ გაუგებარია, კიდევ რა უნდათ: არის ოთხი ვაქცინის არჩევანი, რეგისტრაციის მოსახერხებელი ონლაინსისტემა, ვაქცინები ჯერ კიდევ მარტში შემოიტანეს, დღეისათვის კი აცრა 16 წელზე უფროსი ასაკის ნებისმიერ მსურველს შეუძლია.

თუმცა, რეალობა საგრძნობლად განსხვავდება ოფიციალური განცხადებებისგან.

რეალურად, მხოლოდ ჩინური ვაქცინები „სინოფარმი“ და „სინოვაკია“ ფართო საზოგადოებისთვის ხელმისაწვდომი და ისიც, მხოლოდ ივლისის დასაწყისიდან, მანამდე ისინიც დიდ დეფიციტში იყო. 

დასავლურ სამყაროში ფართოდ გავრცელებული ვაქცინებიდან საქართველოში მხოლოდ AstraZeneca-სა და Pfizer-ის მიღება შეიძლება, მაგრამ პირველით თქვენ მხოლოდ იმ შემთხვევაში აგცრიან, თუკი 45 წელზე უფროსი ასაკის ხართ, მეორე კი, ბოლო დრომდე ისეთი დეფიციტური იყო, რომ სოციალური ქსელების მომხმარებლები ერთმანეთს ეკითხებოდნენ ფეისბუკში და იმის გარკვევას ცდილობდნენ – არის თუ არა Prizer-ი ქვეყანაში საერთოდ ან ხომ არ არის ეს სახელისუფლებო პროპაგანდის მორიგი ფანტაზია.

ამავდროულად, როგორც ჩანს, Pfizer-ი ყველაზე სასურველი ვაქცინაა; ბევრი ადამიანი თვეების განმავლობაში ელოდა საქართველოში მის გამოჩენას და არ იცრებოდა სხვა არაფრით.

ხელისუფლება, თითქოს, განზრახ ამწვავებდა ამ მოლოდინის რეჟიმს, პერიოდულად აკეთებდა განცხადებებს იმის შესახებ, რომ სულ მალე ქვეყანაში მორიგი პარტია ჩამოვიდოდა. 

ბუნებრივია, არავის არ დაუთვლია, რამდენი Pfizer-ის მომლოდინე დაავადდა ან გარდაიცვალა „კორონათი“ ანაც სხვების ინფიცირების წყარო გახდა ნაცვლად იმისა, რომ შესაძლოა, უფრო დაბალეფექტური, თუმცა ასევე ჯანდაცვის მსოფლიო ორგანიზაციის მიერ დამტკიცებული ჩინური ვაქცინებით აცრილიყო.

რამდენიმეთვიანი მოლოდინის შემდეგ, საქართველოში პირველად აშშ-ის მიერ ნაჩუქარი 500 ათასი დოზა Pfizer-ი შემოვიდა. მომლოდინეები ერთდროულად აწყდებოდნენ რეგისტრაციის ვებგვერდს, რამაც სისტემის პარალიზება გამოიწვია.

ერთი დღის განმავლობაში, საქართველოში, ამ ვაქცინაზე 163 ათასი ადამიანი დარეგისტრირდა. უნდა ითქვას, რომ Pfizer-ი – ერთადერთი ვაქცინაა, რომელიც საქართველოში დაშვებულია ყველაზე ახალგაზრდა კატეგორიისთვის – 16-დან 18 წლამდე ასაკის მოზარდებისთვის.

მითები, ეკლესიის შიში

ჯანდაცვის სფეროს დამოუკიდებელი ექსპერტები მუდმივად აკრიტიკებენ საქართველოს ხელისუფლებას ეპიდემიის არაეფექტიანი მართვის გამო.

ნორვეგიის ჯანდაცვის სამინისტროს უფროსი მრჩევლის, ზაზა წერეთლის აზრით, ეს არაეფექტიანობა პირველ რიგში გამოხატულია იმაში, რომ ქართველ ექიმებს არ ჩაუტარებიათ ვაქცინაციის აუცილებლობის შესახებ ერთიანი საინფორმაციო კამპანია.

„ერთადერთი, რაც შეიძლება ანტივაქსერებს დაუპირისპირო – ინფორმაციაა. მაგრამ საქართველოს ხელისუფლებას ამ მიმართულებით ჯერჯერობით არაფერი გაუკეთებია“, – განაცხადა ექსპერტმა ტელეკომპანია „ფორმულას“ ეთერში გამოსვლისას. 

შიში და მითები ვაქცინის გვერდითი ეფექტების შესახებ ქართულ საზოგადოებაში დიდი ხანია ვრცელდება, სხვადასხვა საეჭვო რეპუტაციის ვებ-გვერდისა და ანტიდასავლური ტელეკომპანიების მიერ.

ბოლო დრომდე ხელისუფლებას არ უწარმოებია ერთიანი კამპანია ანტივაქსერული მესიჯების წინააღმნდეგ.

მეტიც, ჯანდაცვის მინისტრი თავად აკეთებს უმდენად ბუნდოვან განცხადებებს ვაქცინასთან დაკავშირებით, რომ ჟურნალისტებმა იგი ანტვაქსერად მოიხსენიეს, რაზეც მინისტრს მოუხდა საჯარო განმარტება, რომ ის აცრების წინააღმდეგი არ არის.

ბოლო განცხადებაში, რის გამოც მინისტრი გააკრიტიკეს, ეკატერინე ტიკარაძემ თქვა, რომ ვაქცინა არ არის მთავარი ინსტრუმენტი პანდემიის წინააღმდეგ საბრძოლველად, არამედ “დამატებითი ბენეფიტია”.

საქართველოს ჯანდაცვის სამინისტრომ მხოლოდ ამ დღეებში გამოაქვეყნა მონაცემები, რომლის თანახმადაც, ქვეყანაში Covid-19-ით გარდაცვალების მხოლოდ ერთი შემთხვევაა დაფიქსირებული ხელმისაწვდომი ვაქცინის ორი დოზით აცრილ ადამიანებში (საუბარია „სინოვაკსა“ და „სინოფარმზე“, რომლებთანაც პირქუში ჭორები იყო დაკავშირებული).

შეგნებული ექიმების 10 პროცენტი 

ეკლესია ყველაზე აქტიურად უჭერს მხარს საქართველოში არსებულ ანტივაქსერულ განწყობებს. ის ქვეყანაში ერთადერთი ინსტიტუტი გახდა, რომელიც ღიად არ დაემორჩილა კარანტინის მოთხოვნებს ჯერ კიდევ ლოკდაუნის პირველი ტალღის დროს.

ბევრ ქართველ მღვდელს დღემდე ხელთ უპყრია გამარჯვებულის ეს საეჭვო „დაფნის გვირგვინი“ – ისინი გამოდიან ტელეეთერით და ორგანიზებას უკეთებენ ფეისბუკტრანსლაციებს – რომლებზეც თავიანთ აუდიტორიას დაჩიპვასა და ბილ გეიტსის შეთქმულებაზე მოუთხრობენ. 

ქართველმა ანტივაქსერებმა რამდენიმე საპროტესტო აქცია გამართეს, მათგან ერთ-ერთი უკანასკნელი, რომელიც თბილისში ჩატარდა, საკმაოდ მრავალრიცხოვანი იყო. 

ჯანდაცვის სფეროს ექსპერტმა, ვატო სურგულაძემ ტელეკომპანია „ტვ პირველის“ შეკითხვის პასუხად განაცხადა, რომ ანტივაქსერული იდეების გამავრცელებლები მრავლად არიან სამედიცინო მუშაკებში: 

„შიშის მთავარი მიზეზი – არცოდნაა, ამიტომ კრიტიკულად მნიშვნელოვანია პაციენტებთან საუბარი, მათი შიშების გაფანტვა. ვშიშობ, რომ საქართველოში ახლა არც ისე ბევრი სპეციალისტია, რომელსაც ამის კომპეტენტურად გაკეთება შეუძლია, ანტივაქსერულად განწყობილი ადამიანები არცთუ ისე ცოტანი არიან ექიმებს შორისაც“. 

ჯანდაცვის სამინისტროს ოფიციალური ინფორმაციის თანახმად, სულ საქართველოში 71 415 სამედიცინო მუშაკია. 20 ივნისს, მათ შორის აცრილთა რიცხვმა 7 379 ადამიანი შეადგინა – 10 პროცენტზე ცოტათი მეტი.