დრონები აფხაზეთის თავზე: დე ფაქტო ხელისუფლება შესაძლო "დაზვერვით ფრენებზე“ საუბრობს
აფხაზეთის რეაქცია დრონით თავდასხმაზე
აფხაზეთის დე ფაქტო პრეზიდენტმა ბადრა გუნბამ უშიშროების საბჭოს საგანგებო სხდომა მოიწვია მას შემდეგ, რაც 4–5 მარტის ღამეს აფხაზეთის ტერიტორიაზე უპრეცედენტო მასშტაბის დრონების აქტივობა დაფიქსირდა — დაახლოებით 30 უპილოტო საფრენი აპარატი.
ე.წ. ხელისუფლება ვარაუდობს, რომ ეს შესაძლოა დაკავშირებული იყოს უკრაინული დრონების იერიშთან, თუმცა ოფიციალურ განცხადებებში სიტყვა “უკრაინა“ პირდაპირ არ არის ნახსენები.
სხდომის მონაწილეთა შეფასებით, ინციდენტი შესაძლოა წარმოადგენდეს მცდელობას, მოეძებნათ ისეთი მარშრუტები, რომლითაც შესაძლებელი იქნებოდა რუსეთის ქალაქ სოჭთან ახლოს საჰაერო თავდაცვის სისტემების გვერდის ავლა. მათი თქმით, მსგავსი აქტივობა შესაძლოა გამოყენებული ყოფილიყო “სიტუაციის დაზვერვისთვის“.
აფხაზეთის საჰაერო თავდაცვის ძალების მეთაურის, გენერალ-ლეიტენანტ ადგურ გუმბას განცხადებით, თითქმის ყველა დრონი ჩამოაგდეს, ხოლო მათი ფრაგმენტები 11 დასახლებულ პუნქტში აღმოაჩინეს. მისი თქმით, წარსულშიც დაფიქსირებულა 5–7 დრონის იზოლირებული გადაფრენა, თუმცა მსგავსი შემთხვევები საჯაროდ არ გახმაურებულა პანიკის თავიდან ასაცილებლად.
“დღეს, როდესაც დრონების ჩამოვარდნა უკვე რამდენიმე დასახლებულ პუნქტში დაფიქსირდა, ამის დამალვა შეუძლებელია. აფხაზეთისა და რუსეთის საჰაერო თავდაცვის ძალები ერთობლივად მუშაობენ“, — განაცხადა მან.
გუმბას თქმით, დრონები პირდაპირ აფხაზეთის ობიექტებზე არ იყვნენ დამიზნებული. მისივე განმარტებით, მათი ნაწილი რაკეტებითა და ჭურვებით განადგურდა, ნაწილი კი ელექტრონული ბრძოლის საშუალებით იქნა გამორთული, რის შედეგადაც უპილოტო აპარატები უკონტროლო გახდა.
“ჩვენი დანაყოფები ცდილობენ ცეცხლის კორექტირებას ისე, რომ ჩამოგდებული დრონი საცხოვრებელი უბნებისკენ არ გადაადგილდეს. ერთ-ერთმა დრონმა დააზიანა მაღალი ძაბვის ელექტროგადამცემი ხაზი, თუმცა სპეციალისტებმა ელექტროენერგიის მიწოდება სწრაფად აღადგინეს“, — თქვა მან.
თავდაცვის უწყების ინფორმაციით, დრონების განეიტრალების მიზნით დამატებითი ზომებია მიღებული. ე.წ. პრეზიდენტმა უსაფრთხოების სტრუქტურებს დაავალა კოორდინაციის გაძლიერება ყველა იმ უწყებას შორის, რომლებიც მსგავს ინციდენტებზე რეაგირებაში არიან ჩართულნი, ასევე საზოგადოებისთვის უსაფრთხოების წესების შესახებ ინფორმაციის გავრცელება.
ინციდენტმა სკეპტიციზმი გააჩინა ოპოზიციურ ტელეგრამ-არხ Respublika-ში, რომლის ავტორები აცხადებენ, რომ მომხდარი კიდევ ერთი სიგნალია თავდაცვის სისტემების პრობლემების შესახებ.
არხის შეფასებით, თუ დრონები ქვეყნის მასშტაბით შეუფერხებლად გადაადგილდებიან და დასახლებულ უბნებში ვარდებიან, ეს მიუთითებს, რომ თავდაცვის სისტემა ან ახალი საფრთხეებისთვის არ არის მზად, ან სათანადოდ არ იმართება.
“კიდევ რამდენი ასეთი სიგნალი უნდა მივიღოთ, სანამ თავდაცვის სფეროში რეალური რეფორმები დაიწყოს და არა მხოლოდ მათი განხილვა?“ – წერს Respublika
