ბრიტანეთის ხაზინის მდივანი: სანქციების დარღვევის გამოვლენის შემთხვევაში, გატარდება შესაბამისი ზომები
დიდი ბრიტანეთის სანქციები
2 მარტს ლორდთა პალატის წევრმა, ბარონესა მარგარეტ პატრიცია კურანმა კითხვით მიმართა ლორდთა პალატის წევრს და ამავე დროს დიდი ბრიტანეთის ხაზინის მდივანს, ბარონ სპენსერ ელიოტ ლივერმორს დასანქცირებული ტელეკომპანიების, იმედის და პოსTV-ის შესახებ.
კურანის კითხვები ორი მიმართულებით იყო ფოკუსირებული:
• სანქციების გამოცხადების შემდეგ, მიიღო თუ არა ლონდონის საფონდო ბირჟაზე წარმოდგენილმა ქართულმა საბანკო ინსტიტუტებმა ინფორმაცია იმ შედეგებზე, რაც სანქციების შეუსრულებლობას შეიძლება მოჰყვეს?
• იგეგმება თუ არა ლონდონში შეხვედრა ქართულ ბიზნეს-საზოგადოებასთან, რათა განიხილონ სანქციების შესრულებასთან დაკავშირებული ვალდებულებები?
ლივერმორის პასუხი, რომელიც 17 მარტს გახდა ცნობილი, ხაზს უსვამს ბრიტანეთის სანქციების აღსრულების სტრუქტურას და პასუხისმგებლობის განაწილებას.
“დიდი ბრიტანეთის ფინანსური სანქციების აღსრულების სამმართველო (OFSI), რომელიც ხაზინის ნაწილია, არის გაერთიანებული სამეფოს კომპეტენტური ორგანო, რომელიც პასუხისმგებელია ფინანსური სანქციების განხორციელებაზე.
გაერთიანებული სამეფოს ყველა ფიზიკური პირისა და ორგანიზაციის (მათ შორის კომპანიების) ვალდებულებაა, სრულად დაიცვან ბრიტანეთის ფინანსური სანქციები. OFSI რეგულარულად არ გასცემს ინდივიდუალურ რეკომენდაციებს კონკრეტული ინსტიტუტებისთვის სანქციების შეუსრულებლობის შედეგების შესახებ.
OFSI მუდმივად თანამშრომლობს ინდუსტრიის წარმომადგენლებთან და აქვეყნებს ამომწურავ სახელმძღვანელო მითითებებს, რათა უზრუნველყოს ფინანსური სანქციების სწორად გაგება და ეფექტური დაცვა სხვადასხვა სექტორში, მათ შორის საბანკო და ფინანსურ სფეროებში. გაერთიანებული სამეფოს ფინანსური სანქციების დარღვევის გამოვლენის შემთხვევაში, OFSI გაატარებს შესაბამის, პროპორციულ სამართლებრივ ზომებს”, – აღნიშნულია პირველი კითხვის პასუხში.
რაც შეეხება მეორე შეკითხვას – უშუალოდ ქართულ ბიზნესთან კომუნიკაციის შესახებ – ლივერმორი უფრო პირდაპირია: მისი თქმით, ამ ეტაპზე ლონდონში მსგავსი შეხვედრა არ იგეგმება.
“ამჟამად არ არის დაგეგმილი შეხვედრა ლონდონში არსებულ ქართულ ბიზნეს-საზოგადოებასა და ხაზინას შორის, რომელიც პასუხისმგებელია ფინანსური სანქციების განხორციელებაზე.
გაერთიანებული სამეფოს ყველა პირს, მათ შორის კომპანიებს, ეკისრებათ ვალდებულება სრულად დაიცვან ბრიტანეთის ფინანსური სანქციები.
დიდი ბრიტანეთის ფინანსური სანქციების აღსრულების სამმართველო (OFSI) რეგულარულად თანამშრომლობს ინდუსტრიასთან და აქვეყნებს დეტალურ სახელმძღვანელოებს, რათა ფინანსური სანქციები სწორად იყოს გაგებული და ეფექტურად შესრულებული სხვადასხვა სექტორში. იმ შემთხვევაში, თუ გამოვლინდება სანქციების დარღვევა, OFSI იღებს პროპორციულ აღმასრულებელ ზომებს”, – ნათქვამია პასუხში.
კონტექსტი
დიდმა ბრიტანეთმა 24 თებერვალს სანქციები დაუწესა ტელეკომპანია “იმედსა” და POSTV-ს, რუსეთის წინააღმდეგ სანქციების რეჟიმის ფარგლებში.
სანქციების სიის დოკუმენტის მიხედვით, TV იმედსა და POSTV-ს შეეხებათ აქტივების გაყინვა, ტრასტის მომსახურების სანქციები და დირექტორის დისკვალიფიკაციის სანქცია, რომელიც ინდივიდს კომპანიის დირექტორობას, მის დაარსებას ან მართვას გარკვეული პერიოდით უზღუდავს, სანქციის დარღვევა კი სისხლის სამართლის დანაშაულად ითვლება.
დიდი ბრიტანეთის მიერ პროსამთავრობო პროპგანადისტული მედიების, TV იმედისა და POSTV-ის დასანქცირების შემდეგ, “ქართული ოცნების” პრემიერ-მინისტრმა ირაკლი კობახიძემ განაცხადა, რომ გადაწყვეტილება “არასერიოზული და სამარცხვინოა“. მისი თქმით, ლონდონში “აღარაფერი აღარ ფასობს“, მათ შორის – მედიის თავისუფლება.
კობახიძემ სანქციები ფორმალურად მედიის თავისუფლების შელახვად შეაფასა, თუმცა დაამატა, რომ პრაქტიკულ შედეგს ისინი ვერ გამოიღებს. მისი განცხადებით, ხელისუფლება იღებს სრულ პასუხისმგებლობას იმაზე, რომ არცერთ ჟურნალისტს არცერთ ტელეკომპანიაში მდგომარეობა არ გაუუარესდეს.
“რა თქმა უნდა, ბუნებრივია, ყველა სახელმწიფო და არასახელმწიფო კომპანიამ TV იმედთან და POSTV-სთან თანამშრომლობა უნდა გააგრძელოს.” – თქვა კობახიძემ.
