საქართველო წელს არ დაესწრება არც დავოსის ეკონომიკურ ფორუმს და არც მიუნხენის უსაფრთხოების კონფერენციას
დავოსის ფორუმი და მიუნხენის უსაფრთხოების კონფერენცია
დამოუკიდებელი საქართველოს ისტორიაში პირველად, საქართველო 2025 წელს არ იღებს მონაწილეობას არც დავოსის ეკონომიკურ ფორუმში და არც მიუნხენის უსაფრთხოების კონფერენციაში. ამის შესახებ bm.ge-ს მთავრობის ადმინისტრაციაში განუცხადეს.
დავოსის ეკონომიკური ფორუმი 20-24 იანვარს ტარდება შვეიცარიაში და მასში 60 სახელმწიფო მეთაური და 130 ქვეყანა იღებს მონაწილეობას.
მიუნხენის უსაფრთხოების კონფერენცია კი წელს 14-16 თებერვალსაა დაგეგმილი.
შვეიცარიაში, დავოსის მსოფლიო ეკონომიკურ ფორუმში 60 სახელმწიფოსა და მთავრობის მეთაური მიიღებს მონაწილეობას.
- ღონისძიებაში მონაწილე ლიდერებს შორის არის აშშ-ის არჩეული პრეზიდენტი დონალდ ტრამპი, რომელიც დისკუსიას ონლაინ ჩაერთვება. დავოსის ეკონომიკურ ფორუმზე ჩავლენ სომხეთის პრემიერ-მინისტრი ნიკოლ ფაშინიანი და აზერბაიჯანის პრეზიდენტი ილჰამ ალიევი, ასევე უკრაინის პრეზიდენტი ვოლოდიმირ ზელენსკი, ევროკომისიის პრეზიდენტი ურსულა ფონ დერ ლაიენი, ევროპარლამენტის პრეზიდენტი რობერტა მეცოლა. მსოფლიო ეკონომიკურ ფორუმს დაესწრებიან ესპანეთის პრემიერ-მინისტრი პედრო სანჩესი, გერმანიის კანცლერი ოლაფ შოლცი, ნიდერლანდების პრემიერ-მინისტრი დიკ სხოოფი, პოლონეთის პრეზიდენტი ანჯეი დუდა, შვედეთის პრემიერ-მინისტრი ულფ კრისტერსონი, ბელგიის პრემიერ-მინისტრი ალექსანდრ დე კროო და სხვა ევროპელი ლიდერები.
მიუნხენის უსაფრთხოების კონფერენცია, მთელი მსოფლიოს მასშტაბით, წამყვანი საერთაშორისო ფორუმია. აღნიშნული შეხვედრა ყოველ წელს იმართება. კონფერენციას, როგორც წესი, მაღალი რანგის 450-ზე მეტი გადაწყვეტილების მიმღები პირი ესწრება. მათ შორის არიან სხვადასხვა სახელმწიფოს მმართველები, მინისტრები, საერთაშორისო ორგანიზაციების ხელმძღვანელები და წამყვანი ბიზნესორგანიზაციების, მასობრივი საინფორმაციო საშუალებებისა თუ არასამთავრობო სექტორის წარმომადგენლები.
მიუნხენის უსაფრთხოების კონფერენციის ადმინისტრაციას ფორუმის კონცეფციის ფართომასშტაბიანი განხილვის მნიშვნელობა და აუცილებლობა სრულად გააზრებული აქვს. სწორედ ამიტომ დებატებში საზოგადოების ფართო სპექტრია ჩართული. დისკუსიების უმრავლესობა პირდაპირი ტრანსლაციის თანხლებით მიმდინარეობს. ამ ღონისძიებების შედეგები კი კონფერენციის ანგარიშებში ქვეყნდება.
მიუნხენის უსაფრთხოების კონფერენცია ქვეყნებს შორის ნდობის გაღრმავებასა და კონფლიქტების მშვიდობიან მოგვარებას ისახავს მიზნად. ამავდროულად, ფორუმის ფარგლებში, უსაფრთხოების მიმართულებით გამჭვირვალე და არაფორმალური დიალოგები იმართება. დღეისათვის მიუნხენის უსაფრთხოების კონფერენცია არის წამყვანი ფორუმი, რომელზეც საერთაშორისო უსაფრთხოების აქტუალური საკითხები განიხილება. ექსპერტების შეფასებით, ეს არის ერთგვარი „იდეების ბაზრობა“, სადაც სხვადასხვა წინადადება თუ გადაწყვეტილება განიხილება და მოსაზრებები იცვლება.
კომენტარი
ყოფილი თავდაცვის მინისტრის, თინა ხიდაშელის განცხადებით, 2025 წლის მიუნხენის კონფერენცია იქნება პირველი, რომელსაც საქართველოს თავდაცვის და საგარეო საქმეთა მინისტრები არ დაესწრებიან.
“ყველა წელი იწყება 2 მთავარი პარალელული ღონისძიებით – ერთი ეს არის ეკონომიკაში და ეს არის დავოსის ფორუმი და მეორე ეს არის – დავდაცვა, უსაფრთხოება, სახელმწიფოების გამძლეობა და სიმტკიცე მომატებული საფრთხეების წინაშე და ეს არის მიუნხენის კონფერენცია. არცერთ ამ ორ წლის გამხსნელ ღონისძიებაზე “ოცნება” მიპატიჟებული არ არის და არ მიიღებს მონაწილეობას.
სხვათა შორის, აუცილებლად უნდა ვთქვა, 2012 წელს, როდესაც ხელისუფლება შეიცვალა და ბიძინა ივანიშვილს მაშინ მაინცდამაინც არ იცნობდნენ, შესაბამისად, სათუო იყო დაპატიჟება ამ ორ ფორუმზე, ის კაცი, რომელმაც ივანიშვილი თავად წაიყვანა დავოსის ფორუმზე და წარუდგინა მთელ ცივილიზებულ ბიზნესს იყო ჯორჯ სოროსი, აი ის ჯორჯ სოროსი, რომელზეც დღეს ძალიან ბევრს ლაპარაკობენ.
მან წარადგინა ბიძინა ივანიშვილი დავოსის ფორუმზე, მან გამოუგზავნა მოწვევა და მისი ინიციატივით და მისი მხარდაჭერით მოხდა მისი და იმდროინდელი მთავრობის წარდგენა დავოსის ფორუმზე.
საქართველოს ხელისუფლებას საერთაშორისო ფორუმზე მეგობრები აღარ ჰყავს, არცერთ ბანაკში, მეგობრები, რომლებიც შეძლებენ ასეთი ხიდი გახდნენ მასსა და საერთაშორისო თანამეგობრობას შორის, იმიტომ, რომ ყველა გადაიმტერეს, ყველა გადაიკიდეს. პირველი კონფერენცია იქნება მიუნხენში, სადაც საქართველო საგარეო და თავდაცვის მინისტრები არ იქნებიან მიწვეულები. არვიცი, ეგეთი დღე და წელი მე არ მახსოვს, როდესაც რამე მსგავსი მომხდარიყოს.” – აცხადებს თინა ხიდაშელი.
“ქართული ოცნების“ ხელისუფლება მწვავე კრიზისის წინაშე დგას როგორც საშინაო, ასევე საერთაშორისო პოლიტიკურ ველზე. 50 დღეა, ქვეყანაში მასობრივი საპროტესტო დემონსტრაციები გრძელდება ევროკავშირში ინტეგრაციის გაცხადებული პოლიტიკიდან გადახვევის გამო.
27 დეკემბერს აშშ-მა ფინანსური სანქციები დაუწესა ქვეყნის არაფორმალურ მმართველს, ბიძინა ივანიშვილს. მისი სახელი OFAC-ის სიაში თბილისის დროით 20:00-ზე გამოჩნდა. OFAC-ის სიის თანახმად, ივანიშვილის სანქცირება რუსეთის წინააღმდეგ დაწესებული სანქციების პაკეტის ნაწილია.
როგორც ცნობილია, ივანიშვილის მთელი ქონება, რომელიც შეერთებულ შტატებში და აშშ-ის მოქალაქეების მფლობელობაში ან კონტროლშია, დაიბლოკება.
აღსანიშნავია, რომ “ქართული ოცნების” 110-ზე მეტ ჩინოვნიკს აქვს ამერიკის შეერთებული შტატების სავიზო შეზღუდვა. ეს შეზღუდვა ეხება დასანქცირებული ადამიანების ოჯახის წევრებსაც. შესაბამისად, იმ პირთა რიცხვი, რომლებიც ვერ შეძლებენ ამერიკის შეერთებულ შტატებში მოგზაურობას, რამდენიმე ასეულია.
ასობით ადამიანი (ზუსტი სია არ არსებობს) ვისაც აქვს დიპლომატიური პასპორტები, სანქციები დაუწესა ევროკავშირმა – ისინი ვეღარ შეძლებენ დიპლომატიური პასპორტებით უვიზოდ მოგზაურობას.
6 ადამიანია ე.წ. მაგნისტკის სიაში – ეს არის მკაცრი ფინანსური სანქცია, რომელიც დასანქცირებული პირების მთელი ქონების, წილების და ფინანსების გაყინვას გულისხმობს. ამ ექვს ადამიანს შორის 4 მაღალი თანამდებობის მქონე პირი;
40-ზე მეტი პირი დასანქცირებულია ბალტიის ქვეყნების მიერ, 19 პირს დაუწესა პერსონალური სანქციები უკრაინამ, 5 პირი დაასანქცირა ბრიტანეთმა, ხოლო 9 პირი დაასანქცირა გერმანიამ.
არაერთი ჩინოვნიკი ერთდროულად რამდენიმე სანქციების პაკეტშია. მაგალითად, შინაგან საქმეთა მინისტრი, ვიცე-პრემიერი ვახტანგ გომელაური. ის მოხვდა ყველა ქვეყნის სანქციებში და არის მაგნიტსკის სიაშიც.
