დააკავეს ბანკზე თავდასხმაში ეჭვმიტანილის ძმა. ოჯახი აცხადებს, რომ ბრალდება აბსურდულია

შსს-მ ზუგდიდში, “საქართველოს ბანკზე” თავდასხმაში ეჭვმიტანილის და ამ დრომდე ძებნილის, ბადრი ესებუას ძმა, ბიძინა ესებუა დააკავა. 

______________________________

● “გამოდი შვილო, ჩაბარდი პოლიციას” – ბანკზე თავდასხმაში ეჭვმიტანილის მამა შვილს მიმართავს

________________________________

სამინისტროს ცნობით, გამოძიება ბიძინა ესებუას ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო ტარებას ედავება. 

უწყების განცხადებით, არსებობდა ვარაუდი, რომ ბიძინა ესებუას კავშირი ჰქონდა თავის ძმასთან, ბადრი ესებუასთან.

დაკავებულის ადვოკატი ბრალდებას უარყოფს და ამბობს, რომ ბიძინა ესებუას იარაღი ჩაუდეს. იოსებ ჯანაშიას თქმით, თავად პოლიციის ქმედებაა აბსურდული და მათსავე ლოგიკას ეწინააღმდეგება. 

ადვოკატის განცხადებით, ბრალდებულს 2 დღის განმავლობაში ეყენა მანქანა სამსახურთან, რომლის საბარგულიც არ იკეტებოდა და სწორედ მაშინ ჩაუდეს საბარგულში პროდუქტები და საბრძოლო მასალა.

“წარმოიდგინეთ, რა მდგომარეობაშია პოლიცია, რომელიც უთვალთვალებს პირს, რომელმაც სამართალდამცველები უნდა მიიყვანოს ბადრი ესებუამდე და ამ დროს ისე, რომ საგამოძიებო მოქმედება არ სრულდება, აკავებენ და ამოაქვთ ეს ნივთები. ეს კიდევ ერთხელ მიუთითებს პოლიციის ვერსიის აბსურდულობას. თუ მათ ლოგიკას გავყვებით, ბადრი ესებუამდე მისასვლელი ერთადერთი ჯაჭვიც კი დაკარგეს”, – ამბობს ადვოკატი.

21 ოქტომბერს, დაახლოებით 14 საათსა და 20 წუთზე შეიარაღებული პირი შეიჭრა ზუგდიდის ცენტრში, გამსახურდიას გამზირზე მდებარე “საქართველოს ბანკის” შენობაში და მძევლად აიყვანა 43 ადამიანი.

თავდამსხმელი ბანკის შენობაში 8 საათზე მეტხანს იმყოფებოდა. იგი ერთ-ერთი მძევლის დახმარებით დაუკავშირდა ტელეკომპანია “მთავარს” და თავისი მოთხოვნები გააცნო – ნახევარი მილიონი დოლარი, უიარაღო მომლაპარაკებელი და უსაფრთხოების გარანტიები.

საღამოს ათი საათისთვის, თავდამსხმელმა მიიღო მოთხოვნილი თანხა და ყველა მძევალი გაათავისუფლა სამის გარდა. სამ ადამიანთან ერთად, რომელთა შორის იყოს სამხარეო პოლიციის უფროსი ავთანდილ გალდავა, თავდამსხმელმა ბანკის შენობა დატოვა და ავტომობილით გაურკვეველი მიმართულებით წავიდა. მოგვიანებით მან ის სამი მძევალიც გაათავისუფლა, თავად კი, მიიმალა.

მომხდართან დაკავშირებით გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.