covid-19-ით 385 ადამიანია დაავადებული საქართველოში. ბოლნისში კარანტინი გამკაცრდა

ბოლო 24 საათში საქართველოში კორონავირუსით ინფიცირების 15 ახალი შემთხვევა გამოვლინდა.

18 აპრილის 10:00 საათისთვის, საქართველოში კორონავირუსით ინფიცირების 385 შემთხვევაა დადასტურებული. კარანტინის რეჟიმშია 4971 ადამიანი, ხოლო სტაციონარში მეთვალყურეობის ქვეშ – 519 პირი. კორონავირუსით ინფიცირებულთაგან 79 გამოჯანმრთელდა და 3 გარდაიცვალა. 

უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.

ვითარება გაუარესდა ბოლნისის რაიონში. მხოლოდ ერთი დღის განმავლობაში ამ მუნიციპალიტეტში კორონავირუსით  დაინფიცირების 19 ახალი შემთხვევა გამოვლინდა. უმრავლესობა სასწრაფო დახმარების ბრიგადის კლასტერიდანაა. covid-19 დაუდგინდა ბოლნისის სიონის მღვდელმსახურსაც. მოძღვრის ინფიცირების წყარო უცნობია.

სულ ამ დროისთვის ბოლნისში კორონავირუსით ინფიცირებულია 47 ადამიანი. 

დაავადებულთა მკვეთრი მატების შემდეგ, ბოლნისში, სადაც კარანტინი 23 მარტს გამოცხადდა, დამატებით კიდევ ოთხი დასახლება: ბალიჭები, კაზრეთი, სავანეთი და რაჭისუბანი  ჩაიკეტა.

“ეს გადაწყვეტილება განაპირობა იმან, რომ უკვე მკვეთრად გაიზარდა უშუალოდ ბოლნისში ინფიცირებულთა რიცხვი. რაც ყველაზე მნიშვნელოვანია, აქ ინფიცირებულია არაერთი სამედიცინო პერსონალი და ვინაიდან სამედიცინო პერსონალს ბევრ ადამიანთან უწევთ ურთიერთობა, ბუნებრივია, გაჩნდა საფრთხე,“ – განაცხადა რეგიონული განვითარების საკითხებში პრემიერ-მინისტრის მრჩეველმა სოზარ სუბარმა.

კორონავირუსით ინფიცირებულთა რაოდენობა გაიზარდა ქობულეთის კლასტერშიც. მათ შორის 6 ბავშვია. ისინი თბილისის ინფექციურ საავადმყოფოში გადაიყვანეს. ექიმების თქმით, ბავშვები კარგად არიან. 

• კორონავირუსი უკვე ეკლესიაშია. რას აპირებს საპატრიარქო სააღდგომოდ?
• თბილისი, რუსთავი, ბათუმი და ქუთაისი იკეტება
• საქართველო პიკს უახლოვდება. მზად არის თუ არა ქვეყანა
• ყავის სმა კარანტინისას შინ და გარეთ – აფხაზეთი კორონავირუსის დღეებში

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა. კორონავირუსის პანდემიის გავრცელების შეჩერების მიზნით, მარნეულში, ბოლნისში, ლენტეხში და ქობულეთის მუნიციპალიტეტის სოფლებში: გვარაში, მუხაესტატეში, ლეღვასა და წყავრუკაში კარანტინი გამოცხადდა. 15 აპრილიდან 10 დღით თბილისი, რუსთავი, ბათუმი და ქუთაისი დაიკეტა, 17 აპრილიდან კი საქართველოს მთელ ტერიტორიაზე მსუბუქი მანქანების გადაადგილება აიკრძალა.