covid-19-ის სამკურნალოდ საქართველოში სისხლის პლაზმას გამოიყენებენ

პლაზმის შეგროვება საქართველოში უკვე დაიწყო. თბილისის ინფექციური საავადმყოფოს დირექტორი, თენგიზ ცერცვაძე აცხადებს, რომ პლაზმით მკურნალობა ძალიან ეფექტიანია, თუმცა, მკურნალობის ეს მეთოდი დონორთა სიმცირის გამო საქართველოში მასობრივი ვერ გახდება  და მას მხოლოდ განსაკუთრებით მძიმე შემთხვევებში გამოიყენებენ. 

30 აპრილის მონაცემებით, საქართველოში კორონავირუსით ინფიცირების   შემთხვევაა  539 დადასტურებული. კარანტინის რეჟიმშია 5247 ადამიანი, ხოლო სტაციონარში მეთვალყურეობის ქვეშ – 532 პირი. კორონავირუსით ინფიცირებულთაგან 178 გამოჯანმრთელდა და 6  გარდაიცვალა.

ამ მეთოდით მკურნალობისას, კორონავირუსით ინფიცირებული პაციენტის ორგანიზმში შეჰყავთ გამოჯანმრთელებული პაციენტის სისხლის პლაზმა, რომელიც დიდი რაოდენობით ანტისხეულს შეიცავს და ორგანიზმს ვირუსის წინააღმდეგ ბრძოლაში ეხმარება. 

ცერცვაძე განმარტავს, რომ დონორად მხოლოდ გამოჯანმრთელებული ადამიანის სისხლის გამოყენება შეიძლება, მაგრამ არა ყველასი.  სამკურნალოდ გამოსადეგია მხოლოდ იმ ადამიანების სისხლის პლაზმა, ვისაც ძლიერი იმუნიტეტი გამოუმუშავდა და სისხლში ანტისხეულების დიდი რაოდენობა აქვს. 

“ჩვენი წინასწარი მონაცემებით, ასეთი არის 20-დან ერთი. ახლა 160 გამოჯანმრთელებული გვყავს და პოტენციურად მხოლოდ რვა დონორი შეიძლება გვყავდეს. ამიტომ ამ მეთოდს ჩვენ გამოვიყენებთ ცალკეულ შემთხვევებში, როდესაც სხვა მედიკამენტები არ მუშობს და იმედი გვაქვს, რომ გადავარჩენთ რამდენიმე პაციენტს, მაგრამ ეს ვერ გახდება მასობრივი გამოყენების საშუალება“, – აცხადებს ცერცვაძე.

• თბილისი კარანტინში: მანქანები მოძრაობენ, მაგრამ ქალაქი მაინც ცარიელია
• მთავრობის ანტიკრიზისული გეგმა: ვინ რა დახმარებას მიიღებს
• საქართველო: რა ბედი ელის ტურიზმს?
• როგორ მოიხსნება შეზღუდვები – მთავრობის გეგმა

ცერცვაძე ამბობს, რომ პლაზმით მკურნალობა ძალიან ეფექტიანი მეთოდია და მას  “ისპანკის”, ებოლას ვირუსის, ფრინველის გრიპისა თუ H1N1-ის სამკურნალოდაც იყენებდნენ. 

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.