ცხინვალში კვლავ იხსენებენ ბიბილოვის ნათესავების "ბნელ წარსულს“
ლეონიდ თიბილოვი
ლეონიდ თიბილოვი, სამხრეთ ოსეთის ე.წ. ყოფილი პრეზიდენტი და ამჟამინდელი ე.წ. პრეზიდენტის, ალან გაგლოევის ბიძა, საერთაშორისო საზოგადოებრივი მოძრაობა “ოსთა უმაღლესი საბჭოს“ („Styr Nykhas“) ცხინვალის ფილიალის ახალი ხელმძღვანელი გახდა, მაგრამ, ცხინვალის მრავალი მცხოვრებლის აზრით, თიბილოვს თავისი “ბნელი წარსულით“ არ აქვს უფლება ასეთი ორგანიზაციის ხელმშღვანელი იყოს.
“ოსთა უმაღლესი საბჭო“ შეიქმნა 1990-იანი წლების დასაწყისში, რომლის მიზანი იყო ახალგაზრდების განათლება, ოსური ენისა და ლიტერატურის, ოსი ხალხის ეროვნული ტრადიციებისა და კულტურის შენარჩუნება და განვითარება.
ალაგ გაგლოევი პირადად ლობირებდა თიბილოვის კანდიდატურას. ცხინვალში ამბობენ, რომ მან ეს გააკეთა არა მხოლოდ ოჯახის გამო, არამედ მადლიერებით იმის გამო, რომ თიბილოვი ერთხელ უკვე დაეხმარა მას პოლიტიკური კარიერის გაკეთებაში.
“სრული მარცხი” თუ “ყველაფერი გამოგვივა”? ალან გაგლოევის პირველი ორი წლის შეჯამება
2017 წლის საპრეზიდენტო არჩევნებში წარუმატებლობის შემდეგ, როდესაც თიბილოვი მეორე ვადით აღარ აირჩიეს, ის დიდი ხნით გამოეთიშა სოციალურ და პოლიტიკურ ცხოვრებას.
2019 წელს პარლამენტის წევრად არჩევის მცდელობაც წარუმატებელი აღმოჩნდა – თიბილოვმა არჩევნები თავის ოლქშიც კი, როგორც მაჟორიტარობის კანდიდატმა, ვერ მოიგო. დაბალი რეიტინგი და ხალხში არაპოპულარობა მისი წარუმატებელი საპრეზიდენტო მმართველობის შედეგი იყო.
შედეგად, დაასრულა რა საკუთარი ამბიციები, ლეონიდ თიბილოვმა ინვესტიცია ჩადო თავის ძმისშვილში, ალან გაგლოევში.
თიბილოვსა და გაგლოევს აკავშირებს არა მხოლოდ ოჯახური კავშირები, არამედ საერთო პოლიტიკური და ფინანსური ინტერესებიც. ჯერ კიდევ 2017 წელს, როდესაც თიბილოვი მეორე ვადისთვის იბრძოდა, ტექნიკური კანდიდატი გახდა აქამდე უცნობი ალან გაგლოევი, რომელიც იმ დროს კაგებეს პენსიაზე გასული მოკრძალებული ოფიცერი იყო.
2017 წლის საპრეზიდენტო არჩევნებში თიბილოვის დამარცხების შემდეგ, მის მიერ დაარსებული “ნიხასის” პარტია გაგლოევის კონტროლის ქვეშ მოექცა. ფინანსური და ადმინისტრაციული რესურსები ალან გაგლოევის პოპულარიზაციას დაეთმო და ხუთი წლის შემდეგ ამან დივიდენდებიც მოიტანა – 2022 წელს ის ე.წ. სამხრეთ ოსეთის პრეზიდენტი გახდა.
თიბილოვის არჩევამ “ოსთა უმაღლესი საბჭოს” ე.წ. სამხრეთ ოსეთის განყოფილების ხელმძღვანელად, ცხინვალელების მეხსიერებაში მისი მონაწილეობით დიდი ხნის წინ მომხდარი სკანდალური ამბავი გააცოცხლა.
თვითმხილველების თქმით, 2008 წლის აგვისტოს ომის პიკზე, ლეონიდ თიბილოვი, რომელიც იმ დროს ბანკირი იყო, არ აძლევდა უფლებას გაქცეულ ქალებს და ბავშვებს ბომბსაფარში ჩასულიყვნენ – ამბობდა, რომ თავშესაფარი გადატვირთული იყო და ადგილი აღარ იყო.
გარდა ამისა, გავრცელებული ხმების თანახმად, მან ადგილობრივ მილიციელებს მოუწოდა დაყარონ იარაღი და ჩაბარდნენ ცხინვალში შესულ ქართველ სამხედროებს.
ცხინვალელებმა ეს ეპიზოდები გაახსენეს თიბილოვს 2012 წელს, მისი წინასაარჩევნო კამპანიის დროს. თუმცა მან ყველაფერი უარყო და პრეზიდენტად მაინც აირჩიეს. ახლა კი ეს ეპიზოდი კვლავ ამოტივტივდა.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
