ისტორია იმის შესახებ, როგორ გადაარჩინეს ჩრდილოეთ ოსეთში პატარა გოგონა
წლინახევრის არნელა პერსაევას ისტორია დღეისათვის ჩრდილოეთ ოსეთში სიმბოლოდ იქცა.
რამდენიმე თვის განმავლობაში, ერთობლივი ძალისხმევით, მისთვის 2 100 000 დოლარი შეგროვდა. ამდენი ღირს ერთი ნემსი, რომელმაც გოგონა იშვიათი გენეტიკური დაავადებისგან – ზურგის კუნთის ატროფიისგან – უნდა განკურნოს.
ფულს ფაქტობრივად ყველა აგროვებდა. ადამიანები რიცხავდნენ, ზოგი 2 დოლარს, ზოგი – 300-ს. ათასობით დოლარი გადარიცხეს ვარსკვლავმა არტისტებმა და ფეხბურთელებმა, მათ შორის, მოსკოველებმა.
და აი, 24 მაისს, არნელა პერსაევასთვის შექმნილი ეს საქველმოქმედო ანგარიში დაიხურა – საჭირო თანხა შეგროვდა. საერთო რაოდენობისთვის საჭირო ბოლო 54 მილიონი რუბლი (თითქმის 800 000 დოლარი) გადარიცხა საფეხბურთო კლუბ “ალანიას” პრეზიდენტმა, ვლადიმირ გურიევმა და მისმა ბიზნესპარტნიორმა, ტამერლან ძაგოევმა.
ეს ძალიან დროულად მოხდა – გადასარჩენად საჭირო სპეციალური ინექცია ბავშვმა 2 წლის ასაკამდე უნდა მიიღოს.
პრეპარატს, რომელმაც შეიძლება არნელა გადაარჩინოს, “ზოლგენსმა” (Zolgensma) ეწოდება, ის რუსეთში რეგისტრირებული არ არის და აშშ-ში აწარმოებენ.
ამ რამდენიმე თვის განმავლობაში, არნელას დახმარება ერთგვარ ეროვნულ იდეად იქცა. შემოსავლის ნაწილს რიცხავდნენ სილამაზის სალონების, მაღაზიებისა და კაფეების თანამშრომლები. აქციას შეუერთდნენ ოსი ჩინოვნიკები და პოლიტიკოსები.
ცნობილმა რეპერებმა ჩრდილოეთ ოსეთიდან, MiyaGi-მ და Andy Panda-მ განაცხადეს, რომ პერსაევების ოჯახს გადაურიცხავენ მთელ შემოსავალს თავიანთი ახალი ევროპული ტურიდან.
«ჩვენი ჯერ კიდევ 2019 წელს დაანონსებული ტური, რომელიც ევროპის ქალაქებში უნდა გაიმართოს, ახლა უკვე ოფიციალურად ატარებს არნელას სახელს -Miyagi & Andy Panda Arnella”s Tour», – ნათქვამია მუსიკოსების ოფიციალურ ინსტაგრამგვერდებზე გამოქვეყნებულ განცხადებაში.
- ბავშვები, რომლებიც აუტიზმის გადალახვას ცდილობენ. წარმატების საიდუმლო
- „ოჯახური კერის დამცველები“ თუ უუფლებო გოგოები?
- ბულინგი საქართველოს სკოლებში: როდესაც არ შეიძლება იყო განსხვავებული
როდესაც კორონავირუსის პანდემიის გამო მუსიკოსების ევროპული ტური გაუქმდა, რეპერებმა არნელას მხარდასაჭერად სპეციალური ჩელენჯი წამოიწყეს. მათ განაცხადეს, რომ თავისუფალ წვდომაში გამოუშვებენ ახალ ალბომს YAMAKASY და მისი მოსმენა უფასოდ იქნება შესაძლებელი – თუკი ისინი დაახლოებით 50 მილიონ რუბლს (დაახლოებით 640 დოლარს) მოაგროვებენ.
ევროპაში, გერმანელმა ბლოგერმა ტერომ არნელას სამკურნალოდ გადარიცხა საკუთარი მაღაზიის გაყიდვებიდან მიღებული შემოსავლის 25%. ასე მოახდინა მან რეაგირება ოსი რეპერების სიმღერაზე – «Utopia», რომელიც მუსიკოსებმა პატარა გოგოს მიუძღვნეს.
ამ ისტორიაში ბევრი ასეთი მონაწილეა. ცნობილმა ფეხბურთელმა, ალექსანდრ კოკორონმა წამოიწყო ჩელენჯი და რუსეთის პრემიერლიგის ფეხბურთელებს გოგოს სამკურნალოდ ფინანსური დახმარების გაღებისკენ მოუწოდა. ანალოგიური განცხადებები გააკეთეს მსოფლიო ფეხბურთის ვარსკვლავებმა, რობერტო კარლოსმა და სამუელ ეტოომ.
მსოფლიოს სხვადასხვა წერტილში მოთამაშე ფეხბურთელებმა საერთოდ მასშტაბური ლატარია წამოიწყეს. აქციის ფარგლებში ვარსკვლავების ავტოგრაფიანი მაისურები თამაშდებოდა.
მსხვილი თანხები გადარიცხეს ანონიმურმა მეცენატებმა.
«მადლობა თქვენი რწმენისთვის, ლოცვებისა და მხარდაჭერისთვის! არნელა იცეკვებს! დაე, სიკეთე დაგბრუნებოდეთ!» – დაწერეს ინსტაგრამის გვერდზე, სადაც თანხის შეგროვების შესახებ დებდნენ ინფორმაციას.
არნელა პერსაევას დედამ დაწერა, რომ გოგონას მოსკოვში, პედიატრიის ინსტიტუტში ათავსებენ. ოჯახი ახლა ამერიკულ კომპანიასთან აწარმოებს მოლაპარაკებას, რომელიც საკუთარ თავზე აიღებს პრეპარატ Zolgensma-ს რუსეთში ჩამოტანის ვალდებულებას.
ამ ბედნიერ ისტორიას ტრაგიკული ნაწილიც აქვს. არნელას უმცროს ძმას, ალიხანსაც ანალოგიური დაავადება გამოუვლინდა – ზურგის კუნთის ატროფია.
