"საბოტაჟი, უცხო ქვეყნის დახმარება" - აქტივისტების და ფონდების ხელმძღვანელების სახლებში დილიდან ჩხრეკა მიმდინარეობს
ჩხრეკები აქტივისტების სახლებში
“ნანუკას ფონდის” დამფუძნებლის, ნანუკა ჟორჟოლიანის და მარიამ ბაჯელიძის (“სირცხვილიას” ყოფილი წევრი) სახელებში ჩხრეკა მიმდინარეობს. ცნობილი ხდება რომ ჩხრეკა ტარდება “ადამიანის უფლებათა ცენტრი“ დირექტორის, ალეკო ცქიტიშვილის საცხოვრებელ სახლშიც.
სამოქალაქო აქტივისტების მიერ გავრცელებული ვიდეოდან ირკვევა, რომ სამივე პირთან პროკურატურის თანამშრომლები მოსამართლის განჩინების საფუძველზე შევიდნენ.
არსებული ინფორმაციით, ალეკო ცქიტიშვილს ჯერ სახლთან პირადი ნივთები, მათ შორის ტელეფონი ჩამოართვეს, რომელიც დალუქეს.
ნანუკა ჟორჟოლიანის ლაივი:
მარიამ ბაჯელიძის ლაივი:
პროკურატურის წარმომადგენლებმა მარიამ ბაჯელიძეს უთხრეს, რომ განჩინებაში მითითებულია სისხლის სამართლის კოდექსის 318-ე და 319-ე მუხლები, რაც იმას ნიშნავს, რომ გამოძიება საბოტაჟის და “უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების” საქმეზე მიმდინარეობს.
აღსანიშნავია, რომ “ქართული ოცნების” პარლამენტმა სისხლის სამართლის კოდექსში “სამშობლოს ღალატის” მუხლის დაამატა, რომლის მიხედვითაც, საბოტაჟი და უცხო ქვეყნისთვის მტრულ საქმიანობაში დახმარება” სამშობლოს ღალატად ჩაითვლება.
ოცნების გადაწყვეტილებით, სამშობლოს ღალატად შემდეგი ქმედებები ჩაითვლება:
- საქართველოს ტერიტორიული ხელშეუხებლობის დარღვევა
- ანტიკონსტიტუციური ხელშეკრულების დადება ან მოლაპარაკების წარმოება
- საქართველოს საგარეო უშიშროების ხელყოფა
- უცხოეთის სადაზვერვო სამსახურში შესვლა
- საქართველოს თავდაცვისუნარიანობის ხელყოფა
- სახელმწიფო საიდუმლოების გაცემა
- ჯაშუშობა
- შეთქმულება ან ამბოხება საქართველოს კონსტიტუციური წყობილების ძალადობით შესაცვლელად
- საბოტაჟი
- უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარება
კანონპროექტი ასევე განმარტავს, თუ ვინ ჩაითვლება 307-ე პრიმა მუხლის მიზნებისთვის თავდაცვის ძალების ან სახელმწიფო ან საზოგადოებრივი უსაფრთხოების დაცვაზე პასუხისმგებელი ორგანოს თანამშრომლად. ასეთ თანამშრომლად მიიჩნევა „მოქალაქეთა პოლიტიკური გაერთიანებების შესახებ“ საქართველოს ორგანული კანონით განსაზღვრული პირი.
17 მარტს საქართველოში დააყადაღეს ფონდები, რომლებიც აქციის დაჯარიმებულ მონაწილეებს და პოლიტპატიმრების ოჯახებს ეხმარებოდნენ – დააყადაღეს ნანუკას ფონდი და მასთან ერთად ნიკა გილაურისა და თბილისის ადამიანის უფლებათა სახლის ფონდები.
პროკურატურის განცხადებიდან ირკვევა, რომ 5 ფონდი “საბოტაჟისა” და “კონსტიტუციური წყობილების წინააღმდეგ მიმართული საქმიანობისთვის” დაწყებული გამოძიების ფარგლებში დააყადაღა.
პროკურატურა წერს, რომ მიმდინარე გამოძიების ფარგლებში, განხორციელდა იმ იურიდიული და ფიზიკური პირების საბანკო ტრანზაქციების დეტალური შესწავლა, რომელთა მიმართაც არსებობდა დასაბუთებული ვარაუდი, რომ მიმდინარე საპროტესტო აქციებთან დაკავშირებით ახორციელებდნენ სხვადასხვა “კანონსაწინააღმდეგო და ცალკეულ შემთხვევებში, დანაშაულებრივი ქმედებების მატერიალურ მხარდაჭერას”.
“სოციალური სამართლიანობის ცენტრის” დირექტორი, თამთა მიქელაძე სოციალურ ქსელში წერს:
“ტერორის დილა გათენდა. დილა უთენია დაიწყო ნანუკა ჟორჟოლიანის, აქტივისტის, მარიამ ბაჯელიძის და “ადამიანის უფლებათა ცენტრის” ხელმძღვანელის, ალეკო ცქიტიშვილის, სახლების ჩხრეკა საბოტაჟის მუხლით მიმდინარე აბსურდული ბრალდების ქვეშ. შიმშილის ზღვარზე მისულ ჭიათურაში დააკავეს 4 მშრომელი, წინააღმდეგობის აქტიური წევრი რაღაც ინციდენტის გამო, რომელსაც უფრო კარგად ცოტა ხანში გავიგებთ.
ჩვენი ადვოკატები გადიან ახლა ადგილზე. აი ასეთ საქართველოს აშენებს “ქართული ოცნება”. სისტემა სჯის ყველას ვინც წინააღმდეგობას გაბედავს. ტყუილად კი არ ამბობენ, პროტესტში ჩართული მოქალაქეები – ვიბრძვით იმისთვის, რომ მომავალში ბრძოლის უფლება არ დავკარგოთ.”
