"ჩალის ფასი", "ფეიკი", "ომში ჩათრევა" - ხელისუფლება ევროპარლამენტის რეზოლუციაზე
ხელისუფლება ევროპარლამენტის რეზოლუციაზე
“ამ რეზოლუციას ჩალის ფასი აქვს”, “ევროპარლამენტი ფეიკების მსხვერპლი გახდა”, “ევროპარლამენტარებს საქართველოში მეორე ფრონტის გახსნა სურთ” – ამ და მსგავსი განცხადებებით გამოეხმაურა საქართველოს ხელისუფლება ევროპარლამენტის კრიტიკულ რეზოლუციას საქართველოს შესახებ.
რეზოლუცია, საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ, ევროპარლამენტმა 9 ივნისს დაამტკიცა.
-
რა წერია ევროპარლამენტის 8 ივნისის რეზოლუციაში:
8 ივნისს ევროპარლამენტმა ხუთი პოლიტიკური ჯგუფის მიერ ინიცირებული რეზოლუცია მიიღო, რომელიც საქართველოში მედიის თავისუფლებების დარღვევებსა და ჟურნალისტების უსაფრთხოებას შეეხებოდა.
რეზოლუციაში წერია, რომ ბოლო წლებში საქართველოში მნიშვნელოვნად გაუარესდა მედიის მდგომარეობისა და ჟურნალისტების უსაფრთხოების თვალსაზრისით არსებული მდგომარეობა.
რეზოლუცია მიუთითებს და გმობს ჟურნალისტების დაშინების, მუქარის, ძალადობის და დევნის მზარდ შემთხვევებს.
ევროპარლამენტი საქართველოს ხელისუფლებას მოუწოდებს გადაიხედოს „მთავარი არხის“ დირექტორის, ნიკა გვარამიას განაჩენი. ასევე რეზოლუცია მოუწებს, ექსპრეზიდენტ მიხეილ სააკაშვილის ჰუმანიტარული მიზნით სამკურნალოდ გათავისუფლებისკენ.
ამავდროულად, ევროპარლამენტი მხარს უჭერს საქართველოსთვის ევროკავშირის კანდიდატის სტატუსის მინიჭებას და მოუწოდებს ევროკავშირის ინსტიტუტებს იმუშაონ საქართველოსთვის ამ სტატუსის მინიჭებაზე ევროკავშირის შესახებ ხელშეკრულების 49-ე მუხლის შესაბამისად, დამსახურების საფუძველზე და იმ პირობით, რომ საქართველოს ხელისუფლება შეასრულებს ყველა კრიტერიუმს.
ამავე რეზოლუციაში საუბარია ბიძინა ივანიშვილზეც. ევროპარლამენტი მოუწოდებს ევროპულ საბჭოსა და დემოკრატიულ პარტნიორებს, ბიძინა ივანიშვილისთვის პერსონალური სანქციების დაწესება განიხილონ.
ამ დოკუმენტით, ევროპარლამენტმა მოუწოდა ევროკავშირის ინსტიტუტებს, იმუშაონ საქართველოსთვის ევროკავშირის კანდიდატის სტატუსის მინიჭებაზე. თუმცა, იმ პირობით, რომ საქართველოს ხელისუფლება შეასრულებს ყველა კრიტერიუმს. და იქვე, ევროპულ საბჭოს მოუწოდა, განიხილონ პერსონალური სანქციების დაწესება ბიძინა ივანიშვილისთვის.
ევროპარლამენტის რეზოლუციას, საქართველოში ხელისუფლების წევრების მყისიერი, მკაცრი და უარყოფითი განცხადებები მოჰყვა. JAMnews-მა შეკრიბა მმართველი პარტია “ქართული ოცნების” წევრების განცხადებები:
ირაკლი კობახიძე, მმართველი პარტია “ქართული ოცნების” თავმჯდომარე:
“უაღრესად შემაშფოთებელია, როდესაც თანამედროვე სამყაროს ერთ-ერთი უმთავრესი სენის – ე.წ. “ფეიკის” მსხვერპლი ევროკავშირის ასეთი მაღალი რანგის ინსტიტუტიც კი ხდება…
რეზოლუციას, რომელიც ქართული დემოკრატიისა და მედიის თავისუფლების მტრების – სააკაშვილისა და გვარამიას გათავისუფლებისკენ მოგვიწოდებს და ბიძინა ივანიშვილს, რომელიც დღეს პოლიტიკიდან სრულად არის დისტანცირებული და რომელმაც ქართველ ხალხს 2012 წელს დემოკრატია, მედიის თავისუფლება და მედიაპლურალიზმი დაუბრუნა, ქართული დემოკრატიის ლამის მთავარ პრობლემად აცხადებს და მის სანქცირებას ითხოვს, არაფერი აქვს საერთო ევროპულ ღირებულებებთან და ასეთ რეზოლუციას, პირდაპირ ვიტყვით, ჩალის ფასი აქვს“.
კობახიძე იყო პირველი, ვინც რეზოლუციას გამოეხმაურა. მისი განცხადება რეზოლუციის გამოქვეყნებისთანავე, 9 ივნისს, 15:00 საათზე, სპეციალურად ჩანიშნულ ბრიფინგზე მოვისმინეთ.
არჩილ თალაკვაძე, საქართველოს პარლამენტის ვიცე-სპიკერი:
“ევროპარლამენტის რეზოლუცია პოლიტიკური ჯგუფების ნაწილმა მიიღო და მას 200-ზე მეტმა ევროპარლამენტარმა მხარი არ დაუჭირა – ჩვენც მიგვაჩნია, რომ ევროპარლამენტის რეზოლუცია აბსოლუტურად აცდენილია რეალობას, მოკლებულია სამართლიანობას და მასში მოყვანილია დამახინჯებული ფაქტები.
ქართულმა საზოგადოებამ და ევროპაში ბევრმა ადამიანმა ძალიან კარგად იცის, რომ ნიკა გვარამია არანაირი თავისუფალი მედია არ არის, ხოლო მიხეილ სააკაშვილი – საქართველოში დემოკრატიის გარანტი და დემოკრატიის სიმბოლო”.
მამუკა მდინარაძე, საპარლამენტო ფრაქცია “ქართული ოცნების” თავმჯდომარე:
პარლამენტის ვიცე-სპიკერი რეზოლუციას მის მიღებამდე ერთი დღით ადრე, 8 ივნისს გამოეხმაურა. ამ დღეს ევროპარლამენტში რეზოლუციაზე მსჯელობდნენ და უკვე ცნობილი იყო, ის კრიტიკული იქნებოდა:
“არსებობენ ადამიანები, საქართველოს ფარგლებს გარეთაც, რომლებიც მუშაობენ გეგმაზე, რომელიც მეორე ფრონტის გახსნაზე მიდის. რადაც არ უნდა დაუჯდეს ხელისუფლებას, სულ რომ სუბიექტურად, რომ საქართველოს ხელისუფლებას უმძიმესი შედეგები ჰქონდეს გათვლილი, სუბიექტურად მხოლოდ “ქართულ ოცნებაზე” ვსაუბრობ, ამ პროცესებიდან ის მაინც არ დაუშვებს ომს, დესტაბილიზაციას, განვითარების შეჩერებას და იმ პოლიტიკას გააგრძელებს, რასაც დღეს ვაწარმოებთ“.
რეზოლუციაზე კომენტარები გაგრძელდა მეორე დღეს, 10 ივნისსაც.
ნიკოლოზ სამხარაძე, პარლამენტის საგარეო ურთიერთობათა კომიტეტის თავმჯდომარე:
“თუ ვერ წარმოადგენენ ვერანაირ დამადასტურებელ ფაქტებს იმისა, რომ ბიძინა ივანიშვილს აქვს პოლიტიკური ან ბიზნესკავშირი კრემლთან, მაშინ ეს შეფასდება როგორც ცილისწამება, ტყუილი და შეტევა როგორც პირადად ბიძინა ივანიშვილზე, ასევე მის მიერ დაფუძნებულ პარტიაზე[…]
დიმიტრი ხუნდაძე, საქართველოს პარლამენტის დეპუტატი:
“ასეთი უსამართლო ევროპა საქართველოს დამოუკიდებლობის პერიოდში ჯერ არ გვინახავს. სტატუსის მისაღებად ღირსებას ვერ დავთმობთ!..
თუკი საქართველო კანდიდატის სტატუსს ისეთივე უსამართლო ვალდებულებებით მიიღებს, როგორი უსამართლო ბრალდებებიც რეზოლუციაში იყო ასახული, მაშინ ქვეყანამ საპასუხოდ სამართლიანი უარი უნდა თქვას”.
რეზოლუციის პროექტზე ევროპარლამენტში 8 ივნისს იმსჯელეს. “იმედგაცრუებულები ვართ”, “ნიკა გვარამია”, “სანქციები”, “ბიძინა ივანიშვილი”, “5 ივლისი”, “საქართველომ უკან დაიხია” – ძირითადად ეს სიტყვები ისმოდა მსჯელობისას. ხუთი პოლიტიკური ჯგუფის მიერ ინიცირებული, ერთობლივი რეზოლუცია ევროპარლამენტმა 9 ივნისს მიიღო.
ევროპარლამენტი, ევროკავშირში გაწევრიანების გზაზე გადაწყვეტილების მიმღები სტრუქტურა არ არის, მაგრამ, მისი მხარდაჭერა მნიშვნელოვანი პოლიტიკური სიგნალია.
ახლა საქართველო ელოდება ევროკომისიის მოსაზრებას (ე.წ. Opinion), რომელიც, JAMnews-ის წყაროს ინფორმაციით, 17 ივნისს უნდა გასაჯაროვდეს.
ევროკომისია მოსაზრებას ევროკავშირის კითხვარის საფუძველზე ამზადებს. საქართველომ ევროკომისიის 2700-მდე შეკითხვას უპასუხა. მაგრამ რა ჩაწერა დოკუმენტში, არ ვიცით – შევსებული პასუხები მთავრობას არ გაუსაჯაროებია.
ამის შემდეგ კი, უკვე 24-25 ივნისის სამიტზე, ევროკავშირის წევრი ქვეყნის ლიდერები მიიღებენ გადაწყვეტლებას, მიანიჭებს თუ არა ევროკავშირი საქართველოს კანდიდატი ქვეყნის სტატუსს.
ხელისუფლება ევროპარლამენტის რეზოლუციაზე
