"ბრძოლა“ ახალი ათონის მონასტრისთვის: აფხაზეთის ეკლესიაში განხეთქილებაა
საეკლესიო კონფლიქტი აფხაზეთში
აფხაზეთის მართლმადიდებელი ეკლესია არქიმანდრიტ დოროფეისგან მოითხოვს, დატოვოს ახალი ათონის მონასტერი — ყველაზე დიდი მართლმადიდებლური ტაძარი აფხაზეთში და ერთ-ერთი მთავარი ტურისტული ადგილი.
მთავარი მიზეზი ის არის, რომ ეკლესიის ხელმძღვანელობა, მამა ვისარიონის მეთაურობით, მონასტერზე კონტროლის აღებას ცდილობს. 15 წელზე მეტია, რაც ისინი საპირისპირო ბანაკში მყოფ წმინდა მიტროპოლიას (დოროფეის ჯგუფი) ედავებიან — როგორ უნდა მიაღწიოს აფხაზეთის ეკლესიამ დამოუკიდებლობას: მოსკოვის მეშვეობით, თუ კონსტანტინოპოლის პატრიარქთან მიმართებით.
ამჟამად კი საქმე განსხვავებულ ჭრილშია — სასულიერო პირების ჯგუფმა (18-მა კაცმა) ხელი მოაწერა მოთხოვნას, რომ დოროფეიმ მონასტერი დატოვოს. მათ შორისაა იეროდიაკონი დავით სარსანია, რომელიც ადრე დოროფეის მხარეს იყო, მაგრამ თებერვალში პოზიცია შეიცვალა.
კომენტარში დოროფეიმ განაცხადა, რომ მსგავსი ზეწოლა მის მიმართ ახალი არ არის და თავს “საეკლესიო დისიდენტად“ მოიხსენიებს, რომლის წინააღმდეგაც „უკვე 20 წელია ინტრიგებს ამაოდ ხლართავენ“.
“მე არ ვექვემდებარები წვრილმან პროვოკაციებს. გარემოებების მიუხედავად, ვაგრძელებ ჩემს გზას და სანამ ვცოცხლობ, არ დავტოვებ ჩემს სამწყსოს. ყველაფერს გავაკეთებ აფხაზეთის ეკლესიის ინტერესების დასაცავად — რაც უნდა დაუჯეს ეს ჩემთვის. საბოლოოდ კი — ისტორია განსჯის ყველას“, — თქვა მან.
მიმდინარე მოვლენებს ასევე გამოეხმაურა აფხაზეთისთვის ავტორიტეტული ფიგურა — რესპუბლიკის გმირი ასლან კობახია, რომელსაც ეკლესიის ფორმალურ სტრუქტურებთან კავშირი არ აქვს. მისი განცხადება მკვეთრი იყო და აშკარად არქიმანდრიტ დოროფეის მხარეს იჭერდა.
“წლებია, დამოუკიდებელი აფხაზური ეკლესიის ჩამოყალიბების ნაცვლად, საეკლესიო გაწევრიანებები და დაპირისპირებები გვაქვს. ჩვენ, ვინც თავს პატრიოტებად მივიჩნევთ, მხოლოდ ერთ კითხვას უნდა ვსვამდეთ საკუთარ თავთან — ემსახურება თუ არა ჩემი ქმედება ჩემი სამშობლოს ინტერესებს? ჩემი რჩევაა აფხაზებისადმი: არასდროს გამოიყენოთ თანამემამულე ‘ხალხის მტერი’ თქვენი პირადი ინტერესებისთვის — ამას ცუდი დასასრული აქვს“, — განაცხადა მან.
კობახიამ ასევე ხაზი გაუსვა, რომ დოროფეის წინააღმდეგ მიმართვის ხელმომწერთა შორის რვა სასულიერო პირი აფხაზეთის მოქალაქე არ არის.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
