"ე.წ. მეორე ფრონტზე დეზინფორმაციის მიზანი საზოგადოების მოწამვლაა" - რა თქვა ბორელმა პრემიერთან შეხვედრაზე
ბორელი ღარიბაშვილთან შეხვედრაზე
საქართველოს პრემიერმინისტრთან, ირაკლი ღარიბაშვილთან ერთად გამართულ პრესკონფერენციაზე საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა ჯოზეფ ბორელმა განაცხადა, რომ ე.წ. მეორე ფრონტზე დეზინფორმაციის მიზანი საზოგადოების მოწამვლვა და უნდობლობის გაზრდაა.
ასევე, ევროკავშირის უმაღლესმა წარმომადგენელმა გურიაში სტიქიის შედეგად ბავშვის დაღუპვის გამო მწუხარება გამოთქვა.
საგანგებო სიტუაციების მართვის სამსახურის ცნობით, აჭარასა და გურიაში ძლიერი ნალექის შედეგად დაიტბორა საცხოვრებელი სახლები, საველე საბარგულები, მოტეხილია ხეები, ჩამოშლილია მიწის მასები, გარე სამყაროს მოწყდა გურიის რეგიონის რამდენიმე სოფელი.
საგანგებო სიტუაციების მართვის სამსახურის ცნობით, მაშველებმა სოფელ ჯუმათში ერთი არასრულწლოვანის ცხედარი იპოვეს, შინაგან საქმეთა სამინისტროს ინფორმაციით მაშველებმა კიდევ ერთი, 80 წლის ქალი ცხედარი სოფელ სილაურში აღმოაჩინეს, ხოლო ერთი მოზარდის სამძებრო სამუშაოები ამ დრომდე გრძელდება.
აღსანიშნავია, რომ ირაკლი ღარიბაშვილმა ჯოზეფ ბორელთან ერთად გამართული პრესკონფერენციაზე ევროკავშირის უმაღლესი წარმომადგენლის თანდასწრებით საქართველოსთვის აქამდე ევროკავშირის სტატუსის არმიცემას უსამართლო უწოდა.
“ვფიქრობთ, ეს (კანდიდატის სტატუსის არმიცემა საქართველოსთვის) იყო უსამართლო, იმიტომ, რომ საქართველომ ძალიან ბევრი რამ გააკეთა, ბოლო ათ წელიწადში განსაკუთრებით.” – თქვა პრემიერმა.
აღნიშნულზე კი ევროკავშირის უმაღლესმა წარმომადგენელმა პრესკონფერენციის ბოლოს უპასუხა:
“ბატონო პრემიერმინისტრო, ყველა ქვეყანა განსხვავებულია, ყველა ქვეყანას განსხვავებული პოლიტიკური, სოციოეკონომიკური სიტუაცია გააჩნია. მინდა გარწმუნოთ და ქართველები მინდა ვარწმუნო, რომ ქართული ძალისხმევა ევროკავშირის კანონმდებლობასთან და რეფორმების მიმართულებით, იქნება დაფასებული და ევროპული ინსტიტუტები და ყველა ის ანალიტიკური ანგარიში, რომელიც არის წარმოებული, ყველაში იქნება ეს აღნიშნული და ობიექტური გზით გაკეთებული.”
ღარიბაშვილის თქმით, 1-2 კვირაში საქართველო მიიღებს დეოლიგარქიზაციის სამოქმედო გეგმას. მან ასევე იმედი გამოთქვა, რომ ევროკომისია საქართველოს მთავრობას დაუფასებს ერთგულებას.
საქართველოს პრემიერი შეეხო მედია პლურალიზმსაც და განმარტა, რომ დღეს საქართველოში “გვაქვს” თავისუფალი მედია, ძალიან ძლიერი ოპოზიციური არხები, მედიასაშუალებები და, რა თქმა უნდა, “ჩვენ ვაკეთებთ ყველაფერს”, რომ პოლარიზაცია შემცირდეს.
რაც შეეხება პრეზიდენტის იმპიჩმენტს, ღარიბაშვილმა ხაზი გაუსვა, რომ ეს სამართლებრივი საკითხია და არა პოლიტიკური.
● ჯოზეფ ბორელი: კანდიდატის სტატუსი რეფორმებით უნდა დაიმსახურონ – ამ კუთხით ბევრი რამაა გასაკეთებელი
● პაატა ზაქარეიშვილის კომენტარი: ხელისუფლებაში ყველაფერს აკეთებენ, რათა კანდიდატის სტატუსის მიღების ყოველგვარი შანსი მოანგრიონ
● ზურაბ ბატიაშვილის მოსაზრება: ბორელი სიცხადის შეტანისთვის ჩამოდის, რათა საბოლოოდ გაირკვეს, სად არის საქართველოს ხელისუფლება
მთავარი, რაც ჯოზეფ ბორელმა პრესკონფერენციაზე თქვა
ე.წ. მეორე ფრონტზე
“ეს არის ხმაური, პროპაგანდა, დეზინფორმაცია. სიგიჟე იქნება ევროკავშირში ვინმემ იფიქროს, რომ საქართველოში ვინმეს ომი უნდა. მე ძალიან ვწუხვარ, რომ ასეთი მცდარი ხმები ვრცელდება, რადგან ეს ხალხის მოსაწამლად ხდება და უნდობლობა წარმოიქმნას ქვეყანაში. რუსული პროპაგანდა ძალიან ინტენსიურია და ამ მიმართულებით მათ თავი გამოიჩინეს მსოფლიოში.”
პრეზიდენტის იმპიჩმენტზე
“ნება მიბოძეთ, დავამატო ერთი რამ, რაც შეეხება პრეზიდენტის იმპიჩმენტის საკითხს – ეს არის რისკი, რაც კიდევ უფრო დაძაბავს სიტუაციას და პოლარიზაციას გაზრდის, ყველა ინსტიტუტი უნდა მუშაობდეს ერთად და ძლიერად უნდა უჭერდეს მხარს ქვეყანას ევროპულ გზაზე, საქართველოს აქვს ამის პოტენციალი, წარმატებული იყოს ამ პროცესში.”
● შეძლებს თუ არა “ოცნება” პრეზიდენტის იმპიჩმენტს და რატომ წავიდა ამაზე მმართველი პარტია?
● ანალენა ბერბოკი: უკრაინა, მოლდოვა, ბალკანეთის ქვეყნები და გრძელ ვადაში საქართველო შევლენ ევროკავშირში
“თქვენ შეასრულეთ 3 რეკომენდაცია, დანარჩენი 9 პროცესშია, შესასრულებელია“
“ამოცანები არის კარგად და მკაფიოდ გაწერილი 12 პრიორიტეტის სახით. ჩვენ უკვე განვაცხადეთ ეს ჩვენს დასკვნაში. ივნისის შემდეგ თქვენ შეასრულეთ 3 მათგანი და დანარჩენი 9 პროცესშია, შესასრულებელია, თუმცა დრო მაინც გვაქვს მათ შესასრულებლად.
უპირველეს ყოვლისა უნდა მოხდეს დეპოლარიზაცია პოლიტიკური ლანდშაფტის, დეოლიგარქიზაცია, ეკონომიკური, პოლიტიკური და სოციალური სფეროების, სასამართლო სისტემის რეფორმა, საარჩევნო სისტემის რეფორმა, მედიის პლურალიზმი და ადამიანის უფლებები.
მოკლე გზა ამ ყველაფრის მისაღწევად არ არსებობს. ყველაფერს სჭირდება ძალიან დიდი გულდასმით მუშაობა, პოლიტიკური ნება და მკაფიო ერთგულება ევროკავშირის ფასეულობებისადმი. ჩემი გამოცდილებით ეს მუშაობა ნამდვილად ღირს შედეგად.
12 პრიორიტეტი გვაქვს ჯამში და ყველა მნიშვნელოვანია. ისინი ეხება რეფორმებს, რომელიც უნდა განხორციელდეს ქვეყანაში – არა ბრიუსელისთვის, არამედ იმისთვის რომ გაუმჯობესდეს ცხოვრება, დემოკრატია.”
“თბილისში ევროკავშირის ბევრი დროშა ფრიალებს, კიდევ უფრო მეტი – ვიდრე ბრიუსელში”
“როდესაც ჩამოვედი, დავინახე ასეთი ძლიერი სულისკვეთება ქართველი ხალხის, 80% მხარს უჭერს ევროკავშირში გაწევრიანებას, ეს შთამბეჭდავი რიცხვია, მაგრამ ეს არამარტო რიცხვია, მე ძალიან მიხარია, რომ ვხედავ, ბევრი ევროპული დროშა ფრიალებს საქართველოს და თბილისის ქუჩებში, უნდა ვთქვა, რომ კიდევ უფრო მეტია, ვიდრე ბრიუსელში.“
რუსეთთან ფრენების აღდგენაზე
“მნიშვნელოვანია, რომ ჩვენი ყველაზე მჭიდრო პარტნიორები კოორდინირებულად მუშაობდნენ საერთაშორისო დონეზე, რომ იზოლირებული იყოს რუსეთი და მივესალმებით იმ მჭიდრო თანამშრომლობას, რომელიც სანქციების გვერდის ავლის წინააღმდეგაა მიმართული ქვეყანაში. მნიშვნელოვანია, რომ მკაფიოდ ითქვა ეს.
ასევე უნდა ვთქვათ, რომ ძალიან ვწუხვართ, რომ ფრენები აღდგა საქართველოსა და რუსეთს შორის. ეს არის ის გზავნილი, რომელიც უკავშირდება საქართველოს საგარეო პოლიტიკას. ასოცირების შეთანხმების ფარგლებში საქართველომ მიიღო გარკვეული ვალდებულება და უნდა ევროკავშირის წევრობა. ამ ეტაპზე, ნამდვილად ბევრი მიმართულება არის გასაუმჯობესებელი. ჩვენ გვჭირდება რუსეთის ჰიბრიდული საქმიანობის აღკვეთა. საომარი პროპაგანდის და სხვა ინიციატივების.”
“საქმეა გასაკეთებელი, გააკეთეთ და ნუ იფიქრებთ მის მიტოვებაზე”
“მთელი ძალისხმევა და ენერგია ჩადეთ ამ ვალდებულებების შესრულებაში, ეს არის კარგი და სწორი მიდგომა, ევროკავშირი საქართველოს არ ტოვებს, არ მიატოვებს. ჩვენ გვაქვს ეკონომიკური და საინვესტიციო გეგმა, სადაც 1.3 მილიარდი ევროა მობილიზებული და ეს მოხმარდება საქართველოში კონკურენტუნარიანობის გაუმჯობესებას. საქართველოსთან გეგმები გვაქვს, ჩვენ ყველაფერი გესმის, გვესმის ის ინტერესები რაც საქართველოსთან ასოცირდება […]
თქვენ კი არ გვემუდარებით, ჩვენ გვინდა, რომ თქვენ იყოთ ევროკავშირის წევრი, ამიტომ არის რომ ჩამოვედი და გესაუბრებით. საქმეა გასაკეთებელი, გააკეთეთ , ნუ იფიქრებთ საქმის მიტოვებაზე.”
“არასოდეს არ თქვათ, რომ ევროკავშირი მიატოვებს საქართველოს”
“არასოდეს არ თქვათ, რომ ევროკავშირი მიატოვებს საქართველოს, არასოდეს, ეს პოზიცია ჩემთვის მიუღებელია, არც მიუტოვებია, არც მიატოვებს. ამავდროულად უნდა ვთქვა, რომ ეს პროცესი არის დამსახურებაზე დაფუძნებული, თქვენ უნდა შეასრულოთ გარკვეული პირობები, თქვენზეა ეს საქმე, მე ნუ მეუბნებით, ბავშვი რომ მიდის გამოცდაზე, პროფესორმა მიმტყუნაო, ხომ არ იტყვის? თვითონ უნდა აჩვენოს, რომ იცის ეს თემა, ეს საგანი.
ამიტომ ჩვენი შეფასება არის ობიექტური, ნუ გექნებათ ეს განწყობა, თქვენ არავინ არ მიგატოვებთ, მთელი ძალისხმევა და ენერგია ჩადეთ ამ ვალდებულებების შესრულებაში, ეს არის კარგი და სწორი მიდგომა, ევროკავშირი საქართველოს არ ტოვებს, არ მიატოვებს.”
● “არსად არ წავალ, ჩემს გადადგომაზე ოცნება ყველამ უნდა დაივიწყოს” – სალომე ზურაბიშვილის მიმართვა
● ლაშა ტუღუშის კომენტარი: გახდე ამ ქვეყნის პირველი პირი, საფრთხის მატარებელი და სიკვდილ-სიცოცხლის საკითხია
საქართველოში ევროკავშირის უმაღლესი წარმომადგენელი, ჯოზეფ ბორელი ოფიციალური ვიზიტით გუშინ ჩამოვიდა. მისი ვიზიტი 7-8 სექტემბერს გაგრძელდება.
გავრცელებული ინფორმაციის თანახმად, ევროკავშირის უმაღლესი წარმომადგენელი და ვიცე-პრეზიდენტი, ასევე გამოიყენებს შესაძლებლობას, შეხვდეს პარლამენტში მყოფ ყველა პოლიტიკური პარტიის წარმომადგენელს და გამართოს დისკუსიები სამოქალაქო საზოგადოების წარმომადგენლებთან.
ევროკავშირის საგარეო ქმედებათა სამსახურის ინფორმაციით, ქვეყანაში მისი პირველი ოფიციალური ვიზიტი ამჟამინდელი უფლებამოსილებით საშუალებას მისცემს განიხილოს საქართველოს ევროინტეგრაციის გზაზე პროგრესი, ასევე, გაცვალოს აზრები უფრო ფართო საგარეო პოლიტიკასა და რეგიონულ საკითხებზე.
საქართველოში ვიზიტის წინ, ევროკავშირის უმაღლესმა წარმომადგენელმა Civil.ge-სთან მიცემულ ინტერვიუში საქართველო-ევროკავშირის ურთიერთობებზე ისაუბრა.
უმაღლესი წარმომადგენელი ბორელი შეეხო ისეთ საკითხებს, როგორებიცაა მიმდინარე წლის ბოლოს საქართველოსთვის ევროკავშირის წევრობის კანდიდატის სტატუსის მინიჭების პერსპექტივა, საქართველოს პრეზიდენტის იმპიჩმენტის პროცესი და საქართველოსა და ევროკავშირის საგარეო პოლიტიკის შესაბამისობა.
