„ბოდიში, ერდოღანმა ყირიმი არ აღიარა“. რატომ შეწყვიტა რუსეთმა თურქეთთან ავიამიმოსვლა

რუსეთმა შეწყვიტა თურქეთთან ავიამიმოსვლა 15 აპრილიდან 1 ივნისამდე. ოფიციალური მიზეზი – ორივე ქვეყანაში რთული ეპიდემიოლოგიური სიტუაციაა. თუმცა, ცოტა ვინმეს თუ ეპარება ეჭვი, რომ ნამდვილი მიზეზი – პოლიტიკურია. თურქეთში მოგზაურობის დაჯავშნა ნახევარ მილიონზე მეტმა რუსეთის მოქალაქემ მოასწრო. 

„თუ ვილაპარაკებთ ქვეყნებზე, რომლებთანაც ღია ავიამიმოსვლა გვაქვს, ინფიცირების ყველაზე მაღალი რიცხვი თურქეთის რესპუბლიკაშია დარეგისტრირებული. შეგახსენებთ, თუ რუსეთის ფედერაციაში ესაა 45 შემთხვევა 100 ათას მოსახლეზე, თურქეთის რესპუბლიკაში ამ მაჩვენებელმა 100 მოსახლეზე 445 შეადგინა“,  – მოჰყავს რუსულ  “Новая газета»-ს  „როსპოტრებნადზორის“ (უწყება, რომელიც მომხმარებლების უფლებების დაცვაზეა პასუხისმგებელი) ხელმძღვანელის ანა პოპოვას სიტყვები. 

• თურქეთმა დატოვა სტამბოლის კონვენცია, რომელიც ქალებს ძალადობისგან იცავდა
• მოსაზრება: ვინ ებრძვის ერთმანეთს სამხრეთ კავკასიაში – აზერბაიჯანი და სომხეთი თუ პუტინი და ერდოღანი?

რატომ „დაკეტეს“ თურქეთი? 

პოპოვამ ასევე დაამატა, რომ ავიამიმოსვლის გახსნის მომენტიდან, სამი მილიონი რუსეთის მოქალაქიდან, რომლებიც უცხოეთიდან ჩამოვიდნენ, ინფიცირებული აღმოჩნდა 25 ათასი ადამიანი, მათგან 80% კი თურქეთიდან ჩამოფრინდა. 

პოპოვამ აგრეთვე განაცხადა, რომ 2020 და 2021 წლებში ამ ქვეყნიდან შემოტანილ იქნა მალარიის 12 შემთხვევა, თუმცა რატომ შეჩერდა ავიამიმოსვლა სწორედ ახლა, მას არ აუხსნია. 

მარტის ბოლოს თურქეთის კულტურის სამინისტრომ განაცხადა, რომ წლის დასაწყისიდან მილიონზე მეტი ტურისტი მიიღეს, ტურისტული ნაკადით პირველ ადგილზე რუსეთია – 176 ათასი ადამიანით. 

რუსეთის ტუროპერატორების ასოციაციის მონაცემებით, საერთო რაოდენობამ ტურისტებისა, რომლებმაც თურქეთში ტურები 15 აპრილიდან 31 მაისამდე პერიოდისთვის დაჯავშნეს, შეადგინა 533 200. მათგან 40%-ზე მეტი – ბავშვებიანი ოჯახებია. დაჯავშნილი ტურების საერთო ღირებულება კი დაახლოებით 32 მლრდ რუბლია (420 მლნ დოლარი). 

თურქეთთან ავიამიმოსვლის შეჩერების შესახებ გადაწყვეტილების გამოცხადებამდე 2 დღით ადრე, თურქეთის რესპუბლიკის პრეზიდენტმა რეჯეფ ერდოღანმა ჟურნალისტებს უამბო, რომ სტამბოლში, უკრაინის პრეზიდენტ ვლადიმირ ზელენსკისთან მოლაპარაკებებისას მან დაადასტურა ანკარის გადაწყვეტილება, არ ცნოს ყირიმი რუსეთის ნაწილად: „ჩვენ მხარს ვუჭერთ უკრაინის ტერიტორიულ მთლიანობასა და სუვერენიტეტს. ჩვენ დავადასტურეთ ჩვენი პრინციპული გადაწყვეტილება, არ ვცნოთ ყირიმის ანექსია“. 

რუსეთის პრეზიდენტის პრესმდივანმა, დმიტრი პესკოვმა, ჟურნალისტებს დაუდასტურა, რომ თურქეთში რეგულარული და ჩარტერული რეისების შეწყვეტის გადაწყვეტილებაში არანაირი ფარული პოლიტიკური მიზეზი არ იმალება: „სიტუაციას აქვს მხოლოდ ეპიდემიოლოგიური ხასიათი, ის დაკავშირებულია თურქეთში ინფიცირების საკმაოდ მკვეთრ აფეთქებასთან“.

თუმცა, რუსეთის ფედერაციის საბჭოს ვიცე-სპიკერმა კონსტანტინ კოსაჩევმა თავის Facebook-ის გვერდზე დაწერა პოსტი, რომელშიც თურქეთში შვებულებების გაუქმებას „რუსების პატრიოტიზმში გამოცდა“ უწოდა. კოსაჩევის აზრით, „ყირიმთან დაკავშირებით პრეზიდენტ ერდოღანის განცხადების შემდეგ, ამ ქვეყანაში დასვენება რუსეთის მოქალაქეებისთვის მორალურად მიუღებელი უნდა გახდეს“.   

ყველაფრის მიზეზი ყირიმია?

ყველაფერი, რაც კორონავირუსთანაა დაკავშირებული, ყოველთვის მოულოდნელია. და იმის წინასწარ განჭვრეტა, რომ მაინცდამაინც ამ გადაწყვეტილებას მიიღებდნენ, რა თქმა უნდა, რთული იყო, – ამბობს რუსეთის ტუროპერატორების ასოციაციის ვიცე-პრეზიდენტი ვლადიმირ კონტაროვიჩი: 

„იმ ადამიანების რაოდენობა, ვისაც ფრენების აკრძალვა შეეხო, თითქმის ნახევარი მილიონია. მათი დახარჯული ფულის დაბრუნება ძალიან ძნელია, სეიფში ხომ არ არის დაწყობილი, ამ თანხის დიდი ნაწილი უკვე გადახდილია ავიაკომპანიებისთვის, სასტუმროებისთვის. იმისათვის, რომ ტუროპერატორმა ამ ფულის ტურისტებისთვის დაბრუნება შეძლოს, საჭიროა, ავიაკომპანიებმა და სასტუმროებმა ის ტუროპერატორებს დაუბრუნონ. მოხდება კი ეს და, თუ მოხდება, რამდენად სწრაფად, ჩვენთვის სრულიად გაუგებარია. მაგრამ მე დარწმუნებული ვარ, რომ ავიაკომპანიები და ჰოტელები დათანხმდებიან ტურების გადატანას იმ მომენტისთვის, როცა ავიამიმოსვლას აღადგენენ“. 

„Новая газета“-ს მოჰყავს ტურისტების კომენტარები, რომლებსაც რუსეთის ხელისუფლების გადაწყვეტილებამ დაგეგმილი დასვენება ჩაუშალა. 

„საერთოდაც, ეს უკვე ერთგვარ ისტერიულ სიცილს იწვევს. ამ მოგზაურობისთვის მეტისმეტად დიდხანს ვაგროვებდი ფულს, სკოლის მასწავლებლის მიზერული ხელფასიდან, საიმისოდ, რომ ახლა ეთქვათ: „ბოდიში, ერდოღანმა ყირიმი რუსეთის ნაწილად არ ცნო, ამიტომ თურქეთი თქვენთვის დაკეტილიაო“. ჯერჯერობით არ უთქვამთ, რას უზამენ ჩემს ბილეთებს, ფულს დამიბრუნებენ თუ რამეზე გაცვლიან. ჩვენი ხელისუფლების ჭკუაზე სიარულს და რუსეთის კურორტებზე ფულის დახარჯვას, პირადად მე, არ ვაპირებ“, – ამბობს ალინა, რუსული ენის მასწავლებელი.