ბაქოს ბავშვთა სახლის მოსწავლე კრიტიკისთვის ფსიქიატრიულ საავადმყოფოში მოათავსეს
ბავშვთა სახლის მოსწავლე ფსიქიატრიულ საავადმყოფოში მოათავსეს
აზერბაიჯანში დიდი სკანდალია, რომლის ეპიცენტრში ბაქოს ერთ-ერთი ბავშვთა სახლი და მისი მოსწავლე, მაგომედ ჰაჯიევია. მოზარდმა სოციალურ ქსელებში ბავშვთა სახლის ხელმძღვანელობა კორუფციის ფაქტების გამო გააკრიტიკა. მას შემდეგ, რაც ვიდეო სოციალურ ქსელებში გავრცელდა, ბავშვთა სახლის აღსაზრდელი ფსიქიატრიულ საავადმყოფოში გადაიყვანეს, თუმცა საავადმყოფოს მთავარმა ექიმმა განაცხადა, რომ ბავშვი ფსიქიკურად დაავადებული არ იყო. ექიმი მეორე დღეს სამსახურიდან გაათავისუფლეს.
- ვინ როგორ არღვევს და იცავს ადამიანის უფლებებს აფხაზეთში. ომბუდსმენი ყველაზე გახმაურებულ ისტორიებს ჰყვება
- “რატომ არ გესმით ხალხის მოთხოვნა? მათ უნდათ ევროპა და არა რუსეთი” – საქართველოს პრეზიდენტის გამოსვლა პარლამენტში
მთელი ეს ამბავი გასულ კვირას დაიწყო, როდესაც სოციალურ ქსელებში გავრცელდა ვიდეო, სადაც 16 წლის მოზარდი ჰყვებოდა კორუფციის იმ ფაქტების შესახებ, რომელსაც ჰაჯიევი თავად შეესწრო.
ბავშვები იპარავენ საკვებს
ადგილობრივ ტელეარხთან ინტერვიუში მაგომედ ჰაჯიევმა ისაუბრა იმაზე, რომ ბაქოს მე-3 ბავშვთა სახლის აღსაზრდელები ნახევრად მშივრები ცხოვრობენ.
„ჩვენ სათანადოდ არ ვიკვებებით. საუზმეზე გვაძლევენ პურის ნაჭერს, რომელზედაც უსმევენ ძალიან ცოტა კარაქს, რომელიც თითქმის შეუმჩნეველია. ბავშვები სკოლის ბუფეტში მიდიან, რათა თავისი მეგობრებისთვის საკვები ითხოვონ“, – თქვა მოზარდმა.
მისი განმარტებით, ბავშვთა სახლი უზრუნველყოფილია ყველა საჭირო ნივთით, მაგრამ მენეჯმენტი იპარავს აბსოლუტურად ყველაფერს:
„აქ კარგი ხორცი შემოაქვთ, თუმცა ჩვენ გვაძლევენ მხოლოდ ძვლებს და ცხიმს. ასევე, ბავშვებს მხოლოდ დამპალ ხილს აჭმევენ.“
ამ ინტერვიუს გავრცელებიდან მეორე დღეს მაგომედ ჰაჯიევი ბაქოს No1 ფსიქიატრიულ საავადმყოფოში აღმოჩნდა.
“ის ფსიქიკურად დაავადებულია”
მე-3 ბავშვთა სახლის დირექტორის მოადგილემ, ულკერ ბაბაევამ ინტერვიუში აღნიშნა, რომ მაგომედი ყოველთვის გამოირჩეოდა „ცუდი ყოფაქცევით“.
”მთელი სიმართლე ის არის, რომ მაგომედი არაერთხელ დაიჭირეს ბავშვთა სახლში ქურდობისთვის. ის არ ემორჩილება დაწესებულების ქცევის წესებს. ამის შესახებ შესაბამის ორგანოებს რამდენჯერმე ვაცნობეთ.
ის არაერთხელ მკურნალობდა ფსიქიატრიულ საავადმყოფოში ქცევითი დარღვევების დიაგნოზით.“
ფსიქიატრიული საავადმყოფოს მთავარი ექიმი: „მოზარდი ავად არ არის“
sitat.az-თან ინტერვიუში ბაქოს #1 ფსიქიატრიული საავადმყოფოს მთავარმა ექიმმა აგასან რასულოვმა განაცხადა, რომ მოზარდი მაგომედ ჰაჯიევი ავად არ არის:
„მას აქვს გარკვეული ფსიქოლოგიური გადახრები, მაგრამ ეს ძალიან უმნიშვნელოა. ასეთი გადახრები შეიძლება აღმოჩნდეს ქალაქის მოსახლეობის ნახევარზე მეტში. და რა, მოსახლეობის ნახევარი ჩვენთან უნდა დააწვინონ?
ის ბავშვთა სახლიდან გამოგზავნეს და ჩვენ უკან ვაბრუნებთ, მაგრამ იქ აღარ იღებენ. მათ უნდათ, რომ ჰაჯიევმა უარყოს საკუთარი სიტყვები და მხოლოდ ამის შემდეგ დააბრუნებენ.”
ამის შესახებ ექიმმა წინა დღით განაცხადა, დღეს კი ჯანდაცვის მინისტრის ბრძანებით ის თანამდებობიდან გაათავისუფლეს. ოფიციალური მიზეზი ექიმის ასაკია.
სამსახურიდან გათავისუფლების შემდეგ ექიმმა რასულოვმა ადგილობრივ გამოცემებთან ინტერვიუში განაცხადა, რომ სიტყვებს უკან არ წაიღებს: „ეს მოზარდი ფსიქიკურად ჯანმრთელია!“.
ბავშვთა სახლის დირექტორი უარყოფს
„მე ეს არ მითქვამს. ბავშვია, რა ქნას?”– განაცხადა მედიასთან ინტერვიუში მე-3 ბავშვთა სახლის დირექტორმა მახბუბა ჰუსეინოვამ.
მისი თქმით, მას პირადად არც კი უნახავს ფსიქიატრიული საავადმყოფოს მთავარი ექიმი:
„დიახ, ბავშვი ისევ აქ გამოგზავნეს, მაგრამ საბუთები არ იყო წესრიგში. ოჯახის, ქალთა და ბავშვთა სახელმწიფო კომიტეტიდან მოვიდნენ და უთხრეს, რომ მის საბუთებს მოაწესრიგებდნენ და თავშესაფარში წაიყვანდნენ.
ანუ ფსიქიატრიულ კლინიკაში კი არ დარჩება, აქ დაბრუნდება.
მაჰბუბა ჰუსეინოვა ბოლო ორი წლის განმავლობაში ორჯერ გახდა იმ მოვლენების ანტიგმირი, რომლებზეც აზერბაიჯანულ მედიაში წერდნენ.
2021 წელს სოციალურ ქსელებში გამოჩნდა კადრები ამავე ბავშვთა სახლიდან, სადაც აღლუმი ტარდებოდა იქ, სადაც ბავშვების საკვები და თეთრეულია. ამ ვიდეოს გამოქვეყნების შემდეგ ჰუსეინოვა მხოლოდ საყვედურით დასაჯეს.
გასულ წელს გულჯან ნაგიევამ, რომელიც მანამდე ამავე ბავშვთა სახლში ასისტენტ მასწავლებლად მუშაობდა, გამოაქვეყნა ვიდეო, სადაც მახბუბა ჰუსეინოვას ხორცის ქურდობაში ადანაშაულებდა.
ოთხი ძმის მწარე ბედი
20 წლის ალი გაჯიევმა, მაგომედის უფროსმა ძმამ, ჟურნალისტებს ოჯახის მძიმე ბედზე უამბო.
„ჩვენ, ოთხი ძმა, დედაჩემთან ვცხოვრობდით. ჩემსა და მაგომედის გარდა კიდევ ორი უმცროსია – ერთი 13 წლის, მეორე 12 წლის. ჩვენი დედა ავად იყო, საწოლს იყო მიჯაჭვული.
იმისთვის, რომ უსახლკაროდ არ დავრჩენილიყავით, 2014 წელს გადავწყვიტე ერთ-ერთი არხის ეთერში გასულიყო რეპორტაჟი და ჩვენზე მესაუბრა. ჩვენ მაშინ პირდაპირ ეთერში ვითხოვეთ ბავშვთა სახლში გადაყვანა და ეს ასეც მოხდა. დირექტორის წყალობით სახელმწიფო დედაჩემს მკურნალობაშიც დაეხმარა, მაგრამ დედა 2016 წელს გარდაიცვალა.
უმცროსი ძმები იშვილეს. 13 წლის ძმას ბოლოს ერთი წლის წინ ვესაუბრე, უმცროსთან არანაირი კავშირი არ მაქვს. მათი მშობლები ეწინააღმდეგებიან ჩვენს კომუნიკაციას. მაგრამ ვიცი რომ კარგად არიან.
მაგომედიც იშვილეს ერთხელ, მაგრამ ოჯახმა ის მალევე მიატოვა.“ – თქვა ალიმ.
