ბათუმის სასამართლომ პროფესორი და ოთხი სტუდენტი პატიმრობაში დატოვა. ისინი პროტესტების აქტიური მონაწილეები იყვნენ
ბათუმელი პროფესორის და ოთხი სტუდენტის საქმე
მოსამართლე ლევან ყოლბაიას გადაწყვეტილებით, აღმკვეთ ღონისძიებად პატიმრობა შეეფარდათ ბათუმის ხელოვნების უნივერსიტეტის ოთხ სტუდენტსა და მათ დეკანს, მამუკა ჯორბენაძეს.
“პროფესორისა და ოთხი სტუდენტის” საქმე ბათუმის საქალაქო სასამართლომ დღეს, 11 დეკემბერს განიხილა. გამოძიება დაკავებულებს ჯგუფურ თავდასხმას ედავება, თუმცა დუმს იმ ფაქტზე, რომ დაპირისპირებას უნივერსიტეტში წინ უძღოდა პოლიტიკური საკითხის გამო შეხლა-შემოხლა.
ბრალის დადასტურების შემთხვევაში დაკავებულებს ორ წლამდე თავისუფლების აღკვეთა ემუქრებათ.
პროფესორი მამუკა ჯორბენაძე და მისი სტუდენტები – 22 წლის გიორგი დავითაძე, 20 წლის ანდრო კაკაბაძე, 21 წლის დავით გვიანიძე, 20 წლის გურამ მიქელაძე, საქართველოში მიმდინარე პროევროპული საპროტესტო მოძრაობის აქტიური მხარდამჭერები და აქციების მონაწილეები არიან. ჯორბენაძე უნივერსიტეტის სტუდენტებს გვერდში ედგა გაფიცვის ორგანიზების თვალსაზრისითაც.
შემთხვევა, რომლის გამოც პროფესორი და სტუდენტები დააკავეს, 3 დეკემბერს ხელოვნების უნივერსიტეტში მოხდა.
სტუდენტებმა უნივერსიტეტის შენობაში საპროტესტო ბანერი გააკრეს. ამ ფაქტმა უნივერსიტეტის ლექტორი, თეა ცაგურია აღაშფოთა. ცაგურიამ ბანერი ჩამოხსნა, რასაც სტუდენტების პროტესტი მოჰყვა.
სასამართლოზე სტუდენტებმა ასე გაიხსენეს მომხდარი, მათ სიტყვებს ონლაინ-გამოცემა “ბათუმელები” ციტირებს:
„თეა ცაგურია წინააღმდეგი იყო ჩვენი გაფიცვის, გვიწოდებდა ნაცებს და მოძალადეებს… მან 2012 წელს გადაღებული კადრებიც გვაჩვენა. ამ დროს მამუკა ჯორბენაძემ ჩვენ, სტუდენტები დაგვიცვა”
პროფესორი სტუდენტებს გამოესარჩლა. ჯორბენაძესა და თეა ცაგურიას შორის სიტყვიერი შელაპარაკება მოხდა. ცაგურიამ ამის შესახებ თავის ქმარს, ბათუმის მერიის მაღალჩინოსანს, ირაკლი დევაძეს შეატყობინა (დევაძე ბათუმის მერიის მუნიციპალური სერვისების განვითარების სააგენტოს დირექტორის მოადგილეა). დევაძე საქმის გასარკვევად უნივერსიტეტში თავის მეგობართან, ირაკლი ნაკაშიძესთან ერთად მივიდა.
გამოძიების ვერსიით, მამუკა ჯორბენაძე სტუდენტებთან ერთად უნივერსიტეტში შეხვედრაზე მისულ ირაკლი დევაძეს და მის მეგობარს თავს დაესხა.
ადვოკატმა პროცესზე რამდენიმე მნიშვნელოვან გარემოევაზე გაამახვილა ყურადღთება, თუმცა სასამართლომ ისინი არ გაითვალისწინა:
პირველი გარემოება: დაკავებულების ადვოკატი ამბობს, რომ ირაკლი დევაძე ჯერ კიდევ უნივერსიტეტში მისვლამდე, ტელეფონით დაემუქრა მამუკა ჯორბენაძეს და ამ მიმოწერის სქრინიც არსებობს.
“ნაძირალა ხარ და ფაშისტიო, წერდა მანამდე ირაკლი დევაძე პროფესორს, კაცებთან გაგსინჯავ როგორი ხარო“, – ამბობს ადვოკატი.
მეორე გარემოება: დეტალი, რომელზეც ადვოკატი განსაკუთრებით ამახვილებს ყურადღებას არის ის, რომ ინციდენტი 3 დეკემბერს მოხდა, გამოძიება კი მხოლოდ სამი დღის შემდეგ, 6 დეკემბერს დაიწყო.
“ბათუმელების” ჟურნალისტმა სასამართლოზე ჰკითხა პროკურორ პაატა ცეცხლაძეს, რატომ დაიწყო გამოძიება ინციდენტიდან სამი დღის შემდეგ და როგორ დადგინდა ფიზიკური ძალადობის კვალი, როცა ექსპერტიზა დაპირისპირებიდან მინიმუმ სამი დღის დაგვიანებით ჩატარდა? ჟურნალისტებმა ამ კითხვაზე პასუხი ვერ მიიღეს.
მესამე გარემოება: ადვოკატმა სხდომაზე ყურადღება გაამახვილა ვიდეო ჩანაწერზე, სადაც ფიზიკური დაპირისპირებაა ასახული. ვიდეო უნივერსიტეტის სათვალთვალო კამერითაა გადაღებული. ადვოკატის მტკიცებით, კადრებში კარგად ჩანს, რომ ფიზიკური ძალადობა უნივერსიტეტში საჯარო მოხელის თანმხლებმა პირმა – ირაკლი ნაკაშიძემ წამოიწყო.
„ეს იყო ზონდერი, თუ ტიტუშკა, რომელიც იქ სპეციალურად მიიყვანა… სტუდენტები კი შეესწრნენ კონფლიქტს, როცა მათ ლექტორს ურტყამდნენ და ცხადია, მისი დაცვა სცადეს. უნივერსიტეტში შევარდნილმა დევაძემ შეაგინა პროფესორს, ჩხუბი დაიწყო ირაკლი ნაკაშიძემ, რომელიც იქ მიიყვანეს ურჩი პროფესორის დასასჯელად” – ციტირებს ადვოკატის სიტყვებს “ბათუმელები”
მეოთხე გარემოება: ადვოკატები არგუმენტირებულად ამტკიცებდნენ სასამართლო პროცესზე, რომ ბრალდებულების წინასწარ პატიმრობაში ყოფნის არავითარი აუცილებლობა არ არსებობდა:
„3 დეკემბერს მოხდა ეს შემთხვევა, 6 დეკემბერს იწყება გამოძიება, 7 დეკემბერს მიიღო სასამართლომ გადაწყვეტილება მათ დაკავებაზე და 9-ში აკავებენ“, – მოვლების ქრონოლოგიის ჩამოთვლით ადვოკატმა შოთა ხორავამ ხაზი გაუსვა, რომ პატიმრობის შეფარდების საფუძველი არ არსებობს.
“ბათუმელების” ჟურნალისტი, რომელიც სასამართლო პროცესს ესწრებოდა, წერს, რომ “პროკურორი პაატა ცეცხლაძე იმდენად ხმადაბლა საუბრობდა, დარბაზში მისი პოზიცია ვერ გავიგეთ”.
პროცესის შემდეგ ბათუმის საქალაქო სასამართლოსთან ბათუმელები შეიკრიბა პროფესორისა და სტუდენტების მხარდასაჭერად.
დაკავებული სტუდენტები 20-22 წლის ახალგაზრდები არიან. ერთ-ერთი მათგანი, ანრი კაკაბაძე ნიჭიერი პიანისტი და არაერთი კონკურსის გამარჯვებულია.
თბილისის სახელმწიფო კონსერვატორიის ასოცირებული პროფესორი, პიანისტი ნინო ჟვანია ფეისბუქზე ეხმიანება სტუდენტების დაკავებას. ის წერს, ანრი კაკაბაძეზე წერს: „მოგეხსენებათ, რომ რომ დღეს ბათუმში დაპატიმრებულ ხელოვნების უნივერსიტეტის დეკანსა და ოთხ სტუდენტს წინასწარი პატიმრობა შეუფარდეს. ახლა აღმოვაჩინეთ, რომ ერთ-ერთი სტუდენტი ჩვენი პირველკურსელი, საფორტეპიანო მიმართულების სტუდენტი, პროფესორ ნინო ქათამაძის მოსწავლე ანრი კაკაბაძეა! ანრი უნიჭიერესი პიანისტია, არაერთი ეროვნული თუ საერთაშორისო კონკურსის გამარჯვებული! მე ვიჯექი მისაღები გამოცდის კომისიაში, როდესაც კომისიის ხუთივე წევრმა მას უმაღლესი 100 ქულა დავუწერეთ! ახლა კი ანრი 2 თვით ციხეში უნდა დარჩეს! ჩემთვის მიუღებელია ხუთივეს წინასწარი პატიმრობა, მაგრამ ახლა ამ მოვლენამ ძალიან პირადი ხასიათი მიიღო! მოვითხოვ, სასწრაფოდ გათავისუფლდეს ხუთივე დაკავებული! ის ხომ მაინც იყო შესაძლებელი, რომ მათ გირაო შეეფარდებოდათ?! სადამდე მოვედით?! მეტი რა დავწერო, არ ვიცი!” – წერს ნინო ჟვანია.
