ბაჩალიაშვილის საქმე: გამოძიება და ვერსიები

23 წლის თამარ ბაჩალიაშვილის გარდაცვალების საქმეს ოჯახის მოთხოვნის საფუძველზე დღეიდან შსს-ს ცენტრალური კრიმინალური დეპარტამენტი გამოიძიებს. აქამდე ბაჩალიაშვილის საქმეს ქვემო ქართლის სამხარეო პოლიციის დეპარტამენტი იძიებდა.

23 წლის თამარ ბაჩალიაშვილი18 ივლისს დაიკარგა. 4-დღიანი ძებნის შემდეგ, 22 ივლისს მისი ცხედარი თეთრიწყაროს მუნიციპალიტეტში, სოფელ მაწევანის ტერიტორიაზე, სამანქანო გზიდან ასიოდე მეტრის მოშორებით გაჩერებულ მისსავე ავტომობილში ნახეს. 

თამარ ბაჩალიაშვილის დედა, თეონა თამაზაშვილი მედიასთან საუბარში ამბობს, რომ თამარის გარდაცვალების შემდეგ, მის საქმეში ყოველდღიურად კიდევ უფრო მეტი პასუხგაუცემელი კითხვა ჩნდება. 

ბაჩალიაშვილის გარდაცვალების საქმეში მართლაც ბევრი გაურკვევლობა და დაუდგენელი ფაქტია. ასე მაგალითად, დაუდგენელ ვითარებაში გაქრა მისი კუთვნილი პროფილი სოციალურ ქსელ ფეისბუკიდან. 

თამარის პროფილი ფეისბუკში 28 ივლისს, დღის მეორე ნახევარში გაუქმდა. ახალგაზრდა ქალის პროფილის გაუქმება ემთხვევა იმ დროს, როცა ბაჩალიაშვილების ოჯახის ადვოკატი, მიხეილ რამიშვილი სამხარაულის ექსპერტიზის ბიუროში, თამარ ბაჩალიაშვილის კუთვნილი კომპიუტერის გახსნაზე დასასწრებად მივიდა. 

როგორ წაიშალა გარდაცვლილის პროფილი ფეისბუკიდან, არავინ იცის. ფეისბუკის წესების მიხედვით, ნებისმიერ მომხმარებელს შეუძლია შეარჩიოს ნდობით აღჭურვილი პირი, რომელსაც მისი გარდაცვალების შემთხვევაში მისი გვერდის გაუქმება შეეძლება. 

ჰყავდა თუ არა თამარ ბაჩალიაშვილს ასეთი ნდობით აღჭურვილი პირი, უცნობია. ცნობილია მხოლოდ ის, რომ ოჯახს ფეისბუკის ადმინისტრაციისთვის თამარის გარდაცვალების შესახებ არ უცნობებია და არც მისი გვერდის გაუქმება მოუთხოვია. 

არსებობს ფეისბუკის გვერდის გაუქმების კიდევ ერთი გზა  –  ამისთვის ვინმეს გარდაცვლილის ანგარიშის ექაუნთში ან კომპიუტერში უნდა შეეღწია.

ბაჩალიაშვილის პირადი კომპიუტერი ამ დროს პოლიციაში იყო.

თამარის გაუჩინარების პირველივე დღიდან მისი ოჯახი ითხოვდა, რომ გამოძიებას კომპიუტერი გაეხსნა. ერთ-ერთმა გამომძიებელმა 21 ივნისს ოჯახს უთხრა, რომ თამარის პირად კომპიუტერს რთული პაროლი ედო და სპეციალისტები მის “გატეხვას” ვერ ახერხებდნენ. 

სრულიად საწინააღმდეგო ინფორმაცია მიაწოდა თამარის მამას, ჯუმბერ ბაჩალიაშვილს ქვემო ქართლის სამხარეო პოლიციის უფროსის მოადგილემ, ლადო ბაჭულაშვილმა.  

ჯუმბერ ბაჩალიაშვილის თქმით,  მას ბაჭულაშვილმა დაურეკა და უთხრა, რომ კომპიუტერი გახსნეს, ნახეს თამარის ინფორმაცია და გაარკვიეს. რომ ის “ძალიან დიდი პრობლემების წინაშე იდგა”. თუმცა, რა პრობლემების წინ იდგა თამარი, ეს შსს-ს თანამშრომელს არ დაუკონკრეტებია. 

მოგვიანებით ბაჭულაშვილმა, რომელიც გამოძიებაში ჩვენების მისაცემად დაიბარეს, ჯუმბერ ბაჩალიაშვილთან დარეკვის შესახებ ინფორმაცია უარყო. 

თუმცა, სამხარაულის ექსპერტიზიდან გამოსვლის შედეგ, ბაჩალიაშვილების ადვოკატმა, მიხეილ რამიშვილმა, რომელიც იქ კომპიუტერის გახსნაზე დასასწრებად მიიწვიეს,  განაცხადა, რომ თამარის პირად კომპიუტერს ლუქი არ ედო და ის გახსნილი იყო.

ამოღებულია თუ არა კომპიუტერიდან რაიმე სახის ინფორმაცია, რამიშვილმა არ იცის. ის ახლა კომპიუტერის ექსპერტიზასაც მოითხოვს. ადვოკატი ამბობს, რომ ამჟამად კომპიუტერში არსებული ინფორმაციის კოპირება მიმდინარეობს, რასაც, სავარაუდოდ, რამდენიმე დღე დასჭირდება.

ბაჩალიაშვილების ოჯახი დარწმუნებულია, რომ კომპიუტერში მათთვის და გამოძიებისთვის ბევრი საინტერესო ინფორმაცია ინახება. 

თამარ ბაჩალიაშვილი პროფესიით პროგრამისტი და თსუ-ს ინფორმატიკის ფრანგულ-ქართული სკოლის სტუდენტი იყო. მან, როგორც ერთ-ერთმა წარჩინებულმა სტუდენტმა, Erasmus+ სტიპენდია მოიპოვა და გაცვლითი პროგრამის ფარგლებში, ორი სემესტრის განმავლობაში ინფორმატიკას სწავლობდა საფრანგეთში, ქალაქ რენის გამოყენებითი მეცნიერების ეროვნულ ინსტიტუტში.

მუშაობდა შპს ზეგ-ში – ეს პროგრამული უზრუნველყოფის კომპანიაა, 5 წლის ისტორიით, რომელიც ძირითადად  სხვა ქვეყნიდან შემოსულ დაკვეთებზე მუშაობს. LinkedIn-ის თანახმად, ბაჩალიაშვილი დეველოპერად მუშაობდა ავსტრიულ Spryflash-შიც, თუმცა, ამ კომპანიის ხელმძღვანელობამ განაცხადა, რომ თამარი მათთან კონტრაქტით მუშაობდა და ეს კონტრაქტი 2020 წლის თებერვლის ბოლოს დასრულდა. 

შპს ზეგ-ში აცხადებენ, რომ თამარ ბაჩალიაშვილის ზეგ-ის გარდა სხვა კომპანიაშიც მუშაობდა და ხშირად ამბობდა, რომ სწავლის და პარალელურად 2 სამსახურის ერთმანეთთან შეთავსება ძალიან უჭირდა. კონკრეტულად რომელ სამსახურში მუშაობდა კიდევ თამარ ბაჩალიაშვილი, ეს ზეგ-ში არ იციან. 

თამარ ბაჩალიაშვილის მეორე სამსახურის შესახებ ინფორმაცია არ აქვს არც ბაჩალიაშვილების ოჯახს. მშობლებმა არ იციან, კონკრეტულად რას საქმიანობდა თამარი. დედა ამბობს, რომ მას კომპიუტერული ენა არ ესმის. იცის, რომ თამარი პროგრამებს წერდა, თუმცა, როგორ აკეთებდა ამას, არ იცის და შვილისთვის არც ის უკითხავს არასოდეს, რა ანაზღაურებას იღებდა სამსახურში. 

ფულიც საინტერესო თემაა თამარ ბაჩალიაშვილის საქმეში. პოლიციამ მის ჩანთაში ქაღალდის პატარა ფურცელი ნახა, სადაც წერია: ანაბარზე თანხაა, გამოიყენეთ.

მედიაში გავრცელებული, მაგრამ დაუდასტურებელი ინფორმაციით, თამარის ანაბარზე სოლიდური თანხაა – 75 000 ლარი. 

ადვოკატი მიხეილ რამიშვილი ამბობს, რომ საგამოძიებო საქმეში ბაჩალიაშვილის ანაბრის შესახებ არაფერი იძებნება  და იმის დასადგენად, ჰქონდა თუ არა თამარს საბანკო ანგარიში და თანხა ანგარიშზე, მან ინფორმაცია საქართველოში მოქმედი ბანკებისგან გამოითხოვა. 

ჰქონდა თუ არა თამარს ანაბარი, ეს არც ოჯახმა იცის. თამარ ბაჩალიაშვილის დედა, თეონა თამაზაშვილი ამბობს, რომ თამარს ანაზღაურებაზე და სამსახურზე საუბარი არ უყვარდა და ყოველთვის, როცა ამ თემაზე მასთან საუბარს ცდილობდა, თამარი სიტყვას ბანზე უგდებდა და საუბარი სხვა თემაზე გადაჰქონდა. 

5 დღის წინ დაკარგული თამარ ბაჩალიაშვილი გარდაცვლილი იპოვეს

თეონა თამაზაშვილი დარწმუნებულია, რომ მისი შვილის სიკვდილი მის სამსახურს და საქმიანობას უკავშირდება. ოჯახს თვითმკვლელობის ვერსიის არ სჯერა. 

თამუნა ბაჩალიაშვილის მამა მედიასთან ამბობს, რომ დარწმუნებულია, მისი შვილი სახლიდან მოტყუებით გაიყვანეს და მოკლეს. 

თამარის გარდაცვალებას ისიც მის საქმიანობას უკავშირებს. მისი თქმით, სამსახურიდან თამარი ხშირად გაღიზიანებული ბრუნდებოდა.  რამდენჯერმე სახლში ის ნამტირალევიც დაბრუნდა. გაუჩინარებამდე 2 დღით ადრე კი, მან სამსახური დატოვა.

“ვერ დავიჯერებ, რომ თავი მოიკლა. ამბიციური გოგო იყო, ისეთი გეგმები ჰქონდა. შეიძლება თვითმკვლელობამდე მიიყვანეს, მაგას უფრო დავიჯერებ. შეიძლება ისეთი ინფორმაცია გაიგო, რაც არ უნდა სცოდნოდა და  ოჯახის და ჩვენს დასაცავად საკუთარი თავი გაწირა,” – ამბობს თეონა თამაზაშვილი ერთ-ერთ სატელევიზიო ინტერვიუში.  

მოკლეს თუ თავი მოიკლა – რა გახდა სიკვდილის მიზეზი?

თამარ ბაჩალიაშვილის საქმეში ჩართული დამოუკიდებელი სასამართლო-სამედიცინო ექსპერტის, გალინა კარმუშინას თქმით, ცხედრის აღმოჩენის დროისთვის ბაჩალიაშვილი სავარაუდოდ, 3-5 დღის გარდაცვლილი იყო. 

ცხედარს, რომელიც მანქანის უკანა სავარძელზე, მწოლიარე მდგომარეობაში იყო, ფიზიკური ძალადობის კვალი არ აღენიშნებოდა.  

თუმცა, იგივე ექსპერტი ამბობს, რომ ცხედარზე ზედაპირული ტრავმული დაზიანებების აღმოჩენა შეუძლებელი იყო, რადგან ჩაკეტილ მანქანაში  და მაღალ ტემპერატურაზე ცხედრის დიდი ხნის განმავლობაში ყოფნის გამო გვამური პროცესები უკვე შორს იყო წასული. 

შსს-ს ვერსია

შინაგან საქმეთა სამინისტრომ თამარ ბაჩალიაშვილის ცხედრის პოვნიდან მხოლოდ მეორე დღეს გააკეთა პირველი განცხადება. ამ განცხადებიდან ირკვევა, რომ 23 წლის პროგრამისტს ჰყავდა ფსიქოლოგი, რომელიც გამოძიებამ უკვე გამოკითხა. 

რატომ გააკეთა აქცენტი შსს-მ იმ ფაქტზე, რომ გარდაცვლილს ფსიქოლოგი ჰყავდა? საზოგადოების ნაწილი ფიქრობს, რომ ეს იყო მითითება, რომ ბაჩალიაშვილს ფსიქოლოგიური პრობლემები ჰქონდა და შესაძლოა, თავი მოეკლა.

შსს-ს ცენტრალური კრიმინალური პოლიციის დეპარტამენტის დირექტორმა, მამუკა ჭელიძემ განაცხადა, რომ გაუჩინარებამდე ერთი დღით ადრე, 17 ივლისს თამარ ბაჩალიაშვილმა აფთიაქში წამლები იყიდა. 

სიკვდილის ერთ-ერთ შესაძლო ვერსიად მედიკამენტოზური ინტოქსიკაცია განიხილება, რადგან გარდაცვლილის ჩანთაში გულისთვის განკუთვნილი წამლის ცარიელი კოლოფი ნახეს. 

ახლა გამოძიებამ უნდა დაადგინოს, არის თუ არა ეს ის წამალი, რაც ბაჩალიაშვილმა აფთიაქში იყიდა. 

რისგან გარდაიცვალა თამარ ბაჩალიაშვილი, ამას ტოქსიკოლოგიური კვლევა დაადგენს. ექსპერტიზისთვის ნიმუშები აღებულია.

თამარ ბაჩალიაშვილის გაუჩინარების შემდეგ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონოდ აღკვეთას გულისხმობს.

ცხედრის პოვნის შემდეგ შეიცვალა საქმის კვალიფიკაცია და თავისუფლების უკანონო აღკვეთას თვითმკვლელობამდე მიყვანის მუხლი დაემატა.