აზერბაიჯანში TikTok-ზე წვდომა განბლოკეს
TikTok აზერბაიჯანში
დღეს აზერბაიჯანში TikTok სოციალურ ქსელზე წვდომა განიბლოკა. ქვეყნის კავშირგაბმულობისა და მაღალი ტექნოლოგიების სამინისტრომ ამ პლატფორმაზე წვდომის დაბლოკვის შესახებ ყარაბაღში კონტრტერორისტული ოპერაციის დაწყების დღეს განაცხადა.
ექსპერტის მოსაზრება
სოციალური ქსელის დაბლოკვა რეალურად არ უშლის ხელს მის აქტიურ მომხმარებლებს გააგრძელონ საქმიანობა დაბლოკილ პლატფორმაზე, ამბობს საინფორმაციო ტექნოლოგიების ექსპერტი და ბლოგერი ფარიდ ფარდასუნასი.
“ქვეყანაში საომარი მოქმედებები დიდი ხნის წინ დასრულდა, მაგრამ TikTok-ის აკრძალვა კვლავ ძალაში დარჩა.
იმავდროულად, აზერბაიჯანში VPN მომხმარებელთა რაოდენობა თითქმის მილიონს აღწევს. დაბლოკვას რა აზრი აქვს?
მე ვფიქრობ, რომ პლატფორმა ყოველთვის დაუბრკოლებლად უნდა მუშაობდეს, გარდა სამხედრო ოპერაციების მიმდინარეობისა“, – წერს ფარდაშუნასი ფეისბუქის საკუთარ გვერდზე.
თავად TikTok-ის მომხმარებლებიც გამართლებულად მიიჩნევენ წვდომის დაბლოკვას საომარი მოქმედებების დღეებში.
“ზოგიერთი მომხმარებელი სოციალურ ქსელში აქვეყნებს ვიდეოებს სამხედრო აღჭურვილობის გადაადგილების შესახებ, თავად ბრძოლების შესახებ, რაც, რა თქმა უნდა, საფრთხეს უქმნის სამხედრო პერსონალის სიცოცხლეს და მთლიანად ქვეყნის უსაფრთხოებას”, – აღნიშნა ანონიმურმა წყარომ JAMnews-თან საუბარში.
TikTok-ზე კონკურსი მისი დაბლოკვის დღეებში
თუმცა, წვდომის დაბლოკვის პერიოდს ინციდენტის გარეშე არ ჩაუვლია. კომუნიკაციებისა და მაღალი ტექნოლოგიების სამინისტრომ, რომელმაც განაცხადა წვდომის დაბლოკვის შესახებ, თავადვე გამოაცხადა კონკურსი TikTok-ზე.
„როგორც ყველამ ვიცით, TikTok დაბლოკილია კომუნიკაციების სამინისტროს მიერ „გარკვეული“ მიზეზების გამო, მაგრამ ამავე კომუნიკაციების სამინისტროს ერთ-ერთი დეპარტამენტი აწარმოებს კამპანიას იმავე TikTok-ზე.
იმედი მაქვს, სამინისტრო მათ შეცდომას გაიგებს. წინააღმდეგ შემთხვევაში, გამოცხადებულ კონკურსში მონაწილეობის მისაღებად ყველა სტარტაპს დასჭირდება VPN-ის გამოყენება“, – წერდა ბლოგერი ნიჯატ მანაფოვი საკუთარ გვერდზე.
კომენტარები სოციალურ ქსელებში
აზერბაიჯანში სოციალური მედიის მომხმარებლები ძირითადად კმაყოფილნი არიან ქვეყანაში TikTok-ის განახლებით.
აქ არის რამდენიმე კომენტარი:
”საბოლოოდ, TikTok ღიაა. შეგიძლიათ დაემშვიდობოთ VPN-ს.”
„TikTok გაიხსნა. თვეზე მეტი ხნის განმავლობაში ვერ ვუყურებდი რა კერძებს ჭამდა ის ბიჭი მონღოლეთიდან.”
