აზერბაიჯანში მერვე ჟურნალისტი დააკავეს ბოლო ერთ თვეში
ჟურნალისტების დევნა აზერბაიჯანში
აზერბაიჯანში კიდევ ერთი ჟურნალისტი ჰაფიზ ბაბალი დააკავეს. წინასწარი მონაცემებით, ის Abzas Media-ს საქმეზეა დაკავებული. ეს მედიის მერვე წარმომადგენელია, რომელიც ბოლო ერთ თვეზე ნაკლებ დროში დააკავეს. მუქარის გზით გამოძალვის ბრალდებით ჟურნალისტი თეიმურ კარიმოვი გუშინ დააკავეს.
Abzas Media-ს საქმეზე მეხუთე პირია დაკავებული
13 დეკემბერს პოლიციამ საინფორმაციო სააგენტო Turan-ის ეკონომიკური დეპარტამენტის ხელმძღვანელი, გამომძიებელი ჟურნალისტი ჰაფიზ ბაბალა დააკავა.
ბაბალას ოჯახის ინფორმაციით, დღეს ბაქოს საქალაქო პოლიციის დეპარტამენტის გამომძიებელმა და რვა პოლიციელმა მისი სახლი გაჩხრიკეს.
„ჰაფიზი სამსახურში მიდიოდა, როცა პოლიციამ გააჩერა და ხელბორკილები დაადო. შემდეგ ორ საათზე მეტ ხანს ჩხრეკდნენ ჩვენს სახლს. საბავშვო წიგნებსაც კი ამოწმებდნენ. წაიღეს ჰაფიზის კომპიუტერი, ტელეფონი და მის საქმიანობასთან დაკავშირებული არაერთი დოკუმენტი“, – განუცხადა ჟურნალისტის ნათესავმა ამერიკის ხმას.
დაკავებისა და ჩხრეკისას ის ადვოკატის გარეშე იმყოფებოდა.
ჯერჯერობით უცნობია, კონკრეტულად რაში ედება მას ბრალი. აზერბაიჯანის შსს-ს პრესსამსახურიდან ჰაფიზ ბაბალას დაკავების შესახებ ინფორმაციის მოპოვება ჯერჯერობით ვერ მოხერხდა.
რამდენიმე დღის წინ, ჰაფიზ ბაბალი ბაქოს საქალაქო პოლიციის სამმართველოში ონლაინ გამოცემა Abzas Media-ს საქმიანობასთან დაკავშირებით დაკითხეს. ასევე გაყინულია მისი საბანკო ანგარიში და ინვალიდობის საპენსიო ანგარიშიც კი.
ბაბალი არის მრავალი კვლევის ავტორი მაღალი თანამდებობის პირების კორუფციულ საქმიანობაზე. ამ კვლევიბისთვის მას საერთაშორისო ჯილდოც მიენიჭა.
პოლიციაში დაკითხვის შემდეგ ჰაფიზ ბაბალმა სოციალურ ქსელში დაწერა:
„ამ კვლევების მომზადებისას, ჟანრის ხასიათიდან გამომდინარე, ხშირად მიწევდა ასობით წყაროსთან და დოკუმენტთან მუშაობა, როგორც პროფესიონალ მკვლევარს. რასაც პროკურატურა „ვერ ხედავს“, დეტალურად აღვწერე და ყველაფერი წარვუდგინე მკითხველს. მაგრამ ისინი, ვინც სარკეში ხედავენ თავიანთ თავებს, თითქოს გამოსავალს პოულობენ მის გატეხაში.
სხვა ქვეყანაში რომ მეცხოვრა, სახელმწიფო დონეზე მადლიერებას მივიღებდი ამ სტატიებისთვის. მაგრამ ჩემი ბედი აზერბაიჯანში, როგორც ხედავთ, ზუსტად საპირისპიროა: ხელისუფლება სდევნის მათ, ვინც მას აკრიტიკებს“.
შეგახსენებთ, რომ Abzas Media-ის საქმეზე უკვე დაკავებულია ოთხი ჟურნალისტი: გამოცემის დირექტორი ულვი ჰასანლი, დირექტორის მოადგილე მუჰამედ კეკალოვი, მთავარი რედაქტორი სევინჯ ვაგიფკიზი, რეპორტიორი ნარგიზ აბსალამოვა.
YouTube არხის ხელმძღვანელს გამოძალვაში ედება ბრალი
12 დეკემბერს ბაქოს ნარიმანოვსკის რაიონულმა სასამართლომ YouTube არხის „Kanal-11“-ის ხელმძღვანელის, თეიმურ კარიმოვის წინააღმდეგ აღკვეთის ღონისძიების სახით პატიმრობა ოთხთვიანი ვადა მოითხოვა.
მას ბრალი წაუყენეს აზერბაიჯანის გამოძალვის მუხლით.
კერიმოვმა ბრალდება უარყო და სისხლის სამართლის საქმე მის პროფესიულ საქმიანობას დაუკავშირა. ადვოკატის თქმით, კერიმოვმა განაცხადა, რომ მას პოლიციის განყოფილებაში სცემეს.
კერიმოვის კოლეგები დარწმუნებულნი არიან, რომ მას დევნიან ჟურნალისტური საქმიანობის, აქტუალურ სოციალურ საკითხებზე რეპორტაჟების მომზადებისა და ადამიანის უფლებების დაცვის გამო. ბოლო შვიდი წლის განმავლობაში იგი არაერთხელ დაექვემდებარა დაკავებასა და ფიზიკური ზეწოლას ჟურნალისტურ საქმიანობასთან დაკავშირებით.
Amnesty International-მა გამოთქვა შეშფოთება დამოუკიდებელი მედიის შევიწროების გამო
საერთაშორისო უფლებადამცველმა ორგანიზაციამ Amnesty International შეშფოთება გამოთქვა აზერბაიჯანში დამოუკიდებელი მედიის წინააღმდეგ მზარდი რეპრესიების გამო. ორგანიზაციამ ამ ტენდენციის უახლეს მაგალითად დაასახელა YouTube არხის Kanal-11-ის ხელმძღვანელის, თეიმურ კერიმოვის დაკავება ბაქოში.
