აზერბაიჯანში 18 წელზე უფროსი ასაკის მოქალაქეების ვაქცინაცია იწყება

2021 წლის 10 მაისიდან, 18 წელზე უფროსი ასაკის აზერბაიჯანის ყველა მოქალაქე შეძლებს კორონავირუსის საწინააღმდეგო ვაქცინის გაკეთებას. რამაზანის დღესასწაულის დღეებში, ქვეყანაში მკაცრი შეზღუდვები არ დაწესდება. მაგრამ მთელი კვირა აკრძალული იქნება საზოგადოებრივი ტრანსპორტის მუშაობა.

• ხმაურიანი დაკავებები ბაქოში: რა ღირს პაციენტის კოვიდკლინიკაში განთავსება?
• საქართველოში, ორჯერ აცრილი ადამიანებისთვის, შესაძლოა კომენდანტის საათი გაუქმდეს
• სომხეთში ვაქცინის გაკეთება არ სურთ. მინისტრები მოსახლეობას მაგალითს მისცემენ

„მოვუწოდებ, 18 წელზე უფროსი ასაკის აზერბაიჯანის ყველა მოქალაქეს, შემოუერთდეს ვაქცინაციის პროცესს“, – ამის შესახებ მინისტრთა კაბინეტთან არსებული კორონავირუსის წინააღმდეგ ბრძოლის ოპერატიული შტაბის დღევანდელ ბრიფინგზე, აზერბაიჯანის ჯანდაცვის მინისტრის მოვალეობის შემსრულებელმა, ტეიმურ მუსაევმა განაცხადა.

მისი თქმით, ამ კამპანიასთან შეერთებით, მოკლე დროში უზრუნველყოფილი იქნება ნორმალური ცხოვრების დაბრუნება: „მაგრამ ვაქცინაცია არ ნიშნავს სიფრთხილის სხვა ნორმებზე უარის თქმას. დღეისათვის, ნიღბის ტარება, ჰიგიენური ნორმებისა და სოციალური დისტანციის დაცვა სავალდებულოა“.

მკაცრი შეზღუდვები არ იქნება

9-დან 15 მაისამდე პერიოდი, აზერბაიჯანში, უქმე დღეებად არის გამოცხადებული. ამ დღეებში მკაცრი შეზღუდვების დაწესება ერთ-ერთი მთავარი კითხვა იყო, რომელიც ხანგრძლივი არდადეგების წინ, მოქალაქეებს აინტერესებდათ. ისეთებიც კი გამოჩნდნენ, რომლებიც ლოკდაუნის გამოცხადებას ითხოვდნენ.

„დღეს ველოდებით ოპერატიული შტაბის ბრიფინგს. სადღესასწაულო დღეებში სრულ ლოკდაუნს ვითხოვ! როგორც მოქალაქე! როგორც ჟურნალისტი! როგორც ადამიანი! ჩვენ ყველანი ჯერ კიდევ ვგრძნობთ ნოვრუზის დღესასწაულის დღეების შედეგებს. რამდენმა უბედურმა ადამიანმა დატოვა ჩვენი სამყარო ჩვენივე ექსპერიმენტების გამო!

სრული ლოკდაუნი!!! მხოლოდ მკაცრი და სრული ლოკდაუნი!“, – დაწერა Facebook-ის საკუთარ გვერდზე ცნობილმა ჟურნალისტმა, შაჰინ აგაევმა.

მაგრამ სადღესასწაულო დღეებში ერთადერთი შეზღუდვა საზოგადოებრივ ტრანსპორტს შეეხება, აღნიშნა ბრიფინგის დროს ჯანდაცვის მინისტრის მოვალეობის შემსრულებელმა.

ტეიმურ მუსაევმა დასძინა, რომ ქვეყანაში ვაქცინაციის პროცესი წარმატებით მიმდინარეობს და „მედიკოსების თითქმის 90 პროცენტი ვაქცინირებულია. განათლების სფეროშიც ასევე ვუახლოვდებით ამ რიცხვს. უკანასკნელი ორი კვირის განმავლობაში, მცირდება დაავადებულების რაოდენობა, რომლებსაც საავადმყოფოებში აქვთ დაკავებული საწოლი ადგილები“.

მთელი კვირა ავტობუსების გარეშე

სადღესასწაულო დღეებში, აზერბაიჯანის მოსახლეობა მხოლოდ ერთადერთ შეზღუდვას შეეჯახება, ავტობუსების გაჩერების სახით.

2020 წლის ოქტომბრიდან მოყოლებული, შაბათ-კვირას, მთელი ქვეყნის მასშტაბით არ მუშაობს ავტობუსები. გარდა ამისა, იმ დროიდან გაჩერებულია ბაქოს ძირითადი საზოგადოებრივი ტრანსპორტი – მეტრო.

კარანტინი მთელ ქვეყანაში პირველ ივნისს სრულდება. თუკი მას არ გაახანგრძლივებენ, ამ დღიდან უნდა მოიხსნას კორონავირუსის პანდემიასთან დაკავშირებული ყველა შეზღუდვა.

მილიონი ვაქცინირებული

2021 წლის 5 მაისის მონაცემებით, კორონავირუსის პანდემიის დაწყებიდან, ქვეყანაში, სულ 323 841 ადამიანი დაინფიცირდა, მათგან 298 949 პაციენტი გამოჯანმრთელდა, 4 617 – გარდაიცვალა.

2021 წლის 18 იანვარს, აზერბაიჯანში COVID-19-ის საწინააღმდეგო ვაქცინაცია დაიწყო. ამ დროისთვის, 1 მილიონ 566 ათასი დოზა ვაქცინაა გამოყენებული. მათი რიცხვი, ვისაც ვაქცინის პირველი დოზა გაუკეთეს 988 ათასს შეადგენს, ორი დოზით აიცრა 578 ათასი ადამიანი. 

დღეისათვის, ქვეყანაში, ჩინური წარმოების Sinovac-ის ვაქცინას იყენებენ. აზერბაიჯანმა სამხრეთ კორეიდან AstraZeneca-სა და რუსეთიდან Sputnik V-ის იმპორტიც განახორციელა. ჯანდაცვის სამინისტრომ უკვე დაუშვა ამ ვაქცინების გამოყენება.

AstraZeneca-ს 60 წელზე უფროსი ასაკის ადამიანების აცრისთვის გამოიყენებენ. რუსულ ვაქცინასთან დაკავშირებით კი ჯერჯერობით კონკრეტული გადაწყვეტილება მიღებული არ არის.