"აზერბაიჯანს დახმარება არ სჭირდება - ფაქტის აღიარებას ითხოვს" - ბაქომ რამზან კადიროვს უპასუხა
აზერბაიჯანი ფაქტის აღიარებას ითხოვს
აზერბაიჯანის გენერალური პროკურატურის თანამშრომლები გროზნოში გაემგზავრნენ აქტაუში მომხდარი ავიაკატასტროფის გამოძიების ფარგლებში. გუშინ აზერბაიჯანულმა მხარემ ოფიციალურად დაადასტურა, რომ გროზნოს თავზე სამგზავრო თვითმფრინავი რუსეთის საჰაერო თავდაცვის სისტემამ ჩამოაგდო.
27 დეკემბერს, პრო-სამთავრობო მედიამ გაავრცელა ინფორმაცია, რომ აზერბაიჯანის ხელისუფლებამ უარი თქვა ჩეჩნეთის ხელმძღვანელობის შეთავაზებულ დახმარებაზე.
ჩეჩნეთის ხელისუფლებამ ერთი დღით ადრე განაცხადა, რომ რამზან კადიროვის სახელით მზადაა ფინანსური და სხვა სახის დახმარება გაუწიოს ბაქოდან გროზნოში მიმავალი თვითმფრინავის ჩამოვარდნისას დაღუპულთა და დაშავებულთა ყველა ოჯახს. სააგენტო Trend-ის ცნობით, ამის შესახებ აზერბაიჯანის პრეზიდენტის ადმინისტრაციაში განაცხადეს.
“აზერბაიჯანს არავითარი დახმარება არ სჭირდება. ასეთ დახმარებას არც სახელმწიფო მიიღებს და არც მოქალაქეები. ჩვენ ვუწევთ და გავაგრძელებთ საჭირო დახმარებას ჩვენი მოქალაქეებისთვის. აზერბაიჯანი ითხოვს ფაქტის აღიარებას, ბოდიშის მოხდას და შესაბამისი კომპენსაციის გადახდას“, – განაცხადა ადმინისტრაციის წყარომ.
25 დეკემბერს ყაზახეთის ტერიტორიაზე ჩამოვარდა რეისი, რომელიც ბაქოდან გროზნოში მიფრინავდა. ბორტზე 67 მგზავრი, აქედან 5 ეკიპაჟის წევრი იმყოფებოდა. კატასტროფას გადაურჩა 29 ადამიანი.
გადარჩენილი მგზავრებიდან 12 აზერბაიჯანში გადაიყვანეს. გავრცელდა ინფორმაცია, რომ შვიდი პირი, რომელთა მდგომარეობა დამაკმაყოფილებელია, რეგულარული რეისით გადაიყვანენ, ხოლო ხუთი მგზავრი, რომელთა მდგომარეობა შეფასებულია საშუალო სიმძიმით, აზერბაიჯანის საგანგებო სიტუაციების სამინისტროს სპეციალური თვითმფრინავით ცალკე სამედიცინო ჯგუფის თანხლებით გადააფრინეს.
თვითმფრინავის “შავი ყუთი“ უკვე აღმოჩენილია და მიმდინარეობს მისი ანალიზის პროცედურები საერთაშორისო საავიაციო კონვენციების შესაბამისად. ამ დროისთვის ტრაგედიის გამომწვევი მიზეზების გამოძიება მიმდინარეობს. საბოლოო დასკვნები გაკეთდება ყველა საჭირო კვლევისა და მონაცემთა ანალიზის დასრულების შემდეგ.
კომპანია AZAL-მა გაავრცელა ინფორმაცია, რომ აჩერებს ფრენებს რუსეთის რიგ ქალაქებში – მინვოდიში, სოჭში, ვოლგოგრადში, უფაში, სამარაში, გროზნოსა და მახაჩკალაში. ამავდროულად, ის გააგრძელებს ფრენებს მოსკოვში, სანკტ-პეტერბურგში, ეკატერინბურგში, ასტრახანში, ყაზანსა და ნოვოსიბირსკში „ფრენის უსაფრთხოების ყველა მოთხოვნისა და წესის დაცვით“.
„რუსული მხარის პოზიციის ფონზე, დღის წესრიგში შეიძლება დადგეს მოკავშირეთა ურთიერთობების გადახედვა“
“რა თქმა უნდა, ძალიან რთულია იმის მიღება, რაც მოხდა.
მაშინაც კი, თუ თვითმფრინავზე თავდასხმა შემთხვევითი იყო, რუსი და ჩეჩენი ოფიციალური პირები პასუხისმგებელნი არიან იმაზე, რაც მოხდა შემდეგ. კერძოდ: მათ გააუქმეს მოთხოვნა ავარიული დაშვების შესახებ და თვითმფრინავი გადაამისამართეს აქტაუში იმ იმედით, რომ მოწმეები და კვალი კასპიის ზღვაში დაიკარგებოდა”. – აცხადებენ ანალიტიკოსები.
როგორც ისინი აღნიშნავენ, “ეს არის რუსეთი და მათი ასეთ საქციელი პირველი არ არის, და არ იქნება უკანასკნელი“.
აზერბაიჯანელი ანალიტიკოსების აზრით, რუსეთთან ურთიერთობაში ილუზიების გაფანტვამ შეიძლება ძალიან სერიოზულ შედეგებამდე მიგვიყვანოს.
“თუმცა, ორმხრივ ურთიერთობებში შეუმჩნეველი არ უნდა დარჩეს ბოლო მოვლენა – ღირს თუ არა საერთოდ “მეგობრობის” გაგრძელება?
2022 წლის 22 თებერვლის მოსკოვის დეკლარაციის პრეამბულაში, რომელიც არეგულირებს ურთიერთმოკავშირეების საქმიანობას, საუბარია ორ ქვეყანას შორის ყოვლისმომცველ და თანაბარ თანამშრომლობაზე, ურთიერთპატივისცემისა და ნდობის პრინციპებზე დაფუძნებულ ალიანსზე. თუმცა მივიღეთ სრულიად საპირისპირო შედეგი.
კრიზისი, რომლის გადაჭრაც მოკლე დროში შეიძლებოდა სწრაფი ნაბიჯებით, რუსეთის ხელისუფლების გამო ფერხდება, ისინი არ იღებენ პასუხისმგებლობას.
ჩვენ ვიმედოვნებთ, რომ ის, რაც მოხდა ბაქო-გროზნოს რეისზე 2024 წლის 25 დეკემბერს, მნიშვნელოვან როლს შეასრულებს აზერბაიჯანსა და რუსეთს შორის ორმხრივი ურთიერთობების შემდგომ შენარჩუნებაში“, – ამბობენ Look East-ის ანალიტიკოსები.
