"ქართველ კოლეგას მკაფიოდ განვუცხადე, რომ ძალადობა მიუღებელია" - ავსტრიის საგარეო მინისტრი
ავსტრიის საგარეო მინისტრის პრესკონფერენცია
“ქართული ოცნების” საგარეო საქმეთა მინისტრი, მაკა ბოჭორიშვილი ვენაში ავსტრიის საგარეო საქმეთა მინისტრს ბეათე მაინლ-რაიზინგერს შეხვდა. რაიზინგერმა პრესკონფერენციაზე აღნიშნა, რომ მან შეხვედრაზე ივანიშვილის მთავრობის მიერ ევროინტეგრაციის შეჩერებაზე, 2024 წლის საპარლამენტო არჩევნებზე დარღვევებსა და საპროტესტო აქციების დროს სამართალდამცავების მხრიდან მშვიდობიანი მომიტინგეებისა და მედიის წარმომადგენლების მიმართ ძალადობაზე გაუსვა ხაზი.
საქართველოს საგარეო საქმეთა სამინისტროს ცნობით, “მინისტრებმა მიმოიხილეს როგორც ორმხრივი ურთიერთობების, ისე საერთაშორისო ფორმატებში თანამშრომლობის, რეგიონალური უსაფრთხოებისა და სხვა მიმდინარე აქტუალური საკითხები.”
მათივე მტკიცებით, შეხვედრაზე აღინიშნა, რომ ავსტრია საქართველოს მნიშვნელოვან პარტნიორად განიხილავს და დადებითად აფასებს ორი ქვეყნის დინამიკურ ურთიერთობებს.
რა თქვა ავსტრიის საგარეო საქმეთა მინისტრმა
“სამწუხაროდ, დღეს ჩვენ განსახილველ თემებში ბევრი რთული საკითხიც გვქონდა. როცა საქმე ევროკავშირში გაწევრიანების გზას ეხება, საქართველომ უკუსვლა დაიწყო. ეს როგორც ავსტრიული, ასევე ევროპული პერსპექტივიდან, დასანანია. ჩვენ ვხედავთ რეფორმების უკუსვლას სამართლიანობის, კანონის უზენაესობისა და ადამიანის უფლებების საკითხებშიც.
სამოქალაქო საზოგადოების შემზღუდავი კანონების მიღება შემაშფოთებელია და ამ და ზემოაღნიშნული მიზეზების გამო ევროკავშირმა საქართველოს მთავრობის 120 მილიონი ევროს ღირებულების პირდაპირი დახმარება შეაჩერა
ჩემს ქართველ კოლეგას მკაფიოდ განვუცხადე, რომ ჩვენ მკაცრად ვგმობთ მშვიდობიანი მომიტინგეებისა და მედიის წარმომადგენლების წინააღმდეგ ძალადობას. საქართველოს ხელისუფლებამ პატივი უნდა სცეს შეკრებისა და გამოხატვის თავისუფლება და ძალის გამოყენებისგან თავი შეიკავოს. ძალადობის ყველა აქტი უნდა იქნას გამოძიებული, ხოლო დამნაშავეები – პასუხისგებაში მიცემული.
ქვეყნის შიგნით ოპოზიციასა და სამოქალაქო საზოგადოებასთან საუბარი უმნიშვნელოვანესი და უალტერნატივოა. ყველა პასუხისმგებელ პოლიტიკურ აქტორს განსხვავებებისა და პოლარიზაციის გადაჭრისკენ მოვუწოდებ.
მე წინააღმდეგი ვარ კარის მთლიანად დახურვის. ვფიქრობ, დღევანდელი შეხვედრით ეს მკაფიოდ განვაცხადე. აუცილებელია, შევინარჩუნოთ კომუნიკაციის ღია არხები. ვენა დიდი ხნის განმავლობაში იყო დიალოგისა და დიპლომატიის ცენტრი, და ჩვენი დღევანდელი შეხვედრაც, ისევე როგორც ქართველი კოლეგების ვიზიტი ვენაში, ამ როლს კიდევ ერთხელ უსვამს ხაზს.
ჩვენ მზად ვართ, ქართველი ხალხის ევროპულ მისწრაფებებსა და საქართველოს [ევროკავშირში] გაწევრიანების გზას მხარი დავუჭიროთ, თუკი ხელისუფლება შეცვლის ამჟამინდელ კურსს. კურსის შეცვლა ასევე ასახავდა იმ ფაქტს, რომ საქართველოს მოსახლეობის უმრავლესობა, 80%-ზე მეტი, მხარს უჭერს ევროკავშირში გაწევრიანებას, რაზეც ჩვენ ასევე ვისაუბრეთ.
უკრაინის წინააღმდეგ განგრძობადი რუსული აგრესიული ომის კონტექსტში, ჩვენ ორივეს გვჭირდება, რომ გავაძლიეროთ მდგრადობა. ვისაუბრეთ იმაზე, რომ რუსეთი აგრძელებს მცდელობებს, დააზიანოს ჩვენი ინსტიტუციები და საზოგადოებები და საჭიროა, გავაერთიანოთ ძალები, რათა დავუპირისპირდეთ რუსეთის მცდელობებს მცდარი ნარატივებისა და დეზინფორმაციის გავრცელების მიმართულებით.
რუსეთს არ უნდა მიეცეს უფლება, დაუსჯელად დაარღვიოს საერთაშორისო სამართალი. თუ საერთაშორისო წესრიგი აღარ დაეფუძნება წესებს და იარსებებს მხოლოდ ძალის უპირატესობის ხარჯზე, შედეგები ისეთი ქვეყნებისთვის, როგორიც არის ავსტრია და საქართველო, ძალიან სერიოზული იქნება. ამიტომ, ავსტრია, რაზეც ვისაუბრეთ კიდეც, მხარს უჭერს საქართველოს ტერიტორიულ მთლიანობას და სუვერენიტეტს.”
