„ავიასკანდალი“ ცხინვალში: შეშფოთებულია რუსეთსა და საქართველოს შორის ურთიერთობების გაუმჯობესებით
„აზიმუტმა“ სამხრეთ ოსეთში სკანდალი გამოიწვია
რუსულმა ავიაკომპანია „აზიმუტმა“ ცხინვალში სკანდალი გამოიწვია. ჯერ ამ ავიაკომპანიამ, რომელიც საქართველოს მიმართულებით ფრენებს განახორციელებს, თავის საიტიდან ამოიღო სამხრეთ ოსეთისა და აფხაზეთის დამოუკიდებელ ქვეყნებად ნახსენები გრაფა, შემდეგ კი მთლიანად გააუქმა სვეტი „ქვეყანა“.
ახლა ყველა ერთმანეთს ადანაშაულებს: აზიმუტს, რუსეთს, ცხინვალის ხელისუფლებას; რუსი დეპუტატი ავიაკომპანიას ღალატში ადანაშაულებდა, ცხინვალში კი თავად ამ დეპუტატს დასავლეთის ინტერესების “დახვეწილ ლობირებაში” სდებენ ბრალდ.
ამ ყველაფრის უკან კი ერთი „ბუნდოვანი ეჭვი“ დგას: რომ რუსეთი, რომელიც ცდილობს საქართველო თავის მხარეს გადაიბიროს, თითქოსდა „ღალატობს“ აფხაზეთსა და სამხრეთ ოსეთს.
დეპუტატი “აზიმუტის” წინააღმდეგ
რუსეთის სახელმწიფო სათათბიროს დეპუტატმა ჩრდილოეთ ოსეთიდან, ზურაბ მაკიევმა რუსეთის ფედერაციის გენერალურ პროკურორს მიმართა და “აზიმუტი” ღალატში დაადანაშაულა.
ზურაბ მაკიევი წარმოშობით ქართველია და ქართულ-ოსური კონფლიქტის დაწყებამდე თბილისში ცხოვრობდა. მან მიმართა რუსეთის ფედერაციის გენერალურ პროკურორს იგორ კრასნოვს და საჰაერო ტრანსპორტის ფედერალური სააგენტოს ხელმძღვანელს, ალექსანდრე ნერადკოს ავიაკომპანია “აზიმუტის” შემოწმების მოთხოვნით.
მაკევმა გაიხსენა, რომ რუსეთმა აფხაზეთისა და სამხრეთ ოსეთის დამოუკიდებლობა 2008 წელს, აგვისტოს ომის შემდეგ აღიარა:
„სავარაუდოდ, შემოსავლების გაზრდის მიზნით, რუსული გადამზიდავი კომპანია საბოტაჟს უწყობს სახელმწიფოს საგარეო პოლიტიკის საფუძვლებს. ამ ვითარებამ შეიძლება მოიტანოს უკიდურესად უარყოფითი შედეგები, რადგან მსგავსი პრეცედენტის მქონე კომპანია, ხვალ, კომერციული სარგებლის შემთხვევაში, რუსეთის ფედერაციიდან გამორიცხავს ყირიმის, დონეცკის, ლუჰანსკის, ხერსონის და ზაპოროჟიეს რეგიონებს.“
დეპუტატმა თავისი მიმართვა ასე შეაჯამა: „თუ გადამზიდველმა შეგნებულად გაცვალა სინდისი (კანონზე რომ აღარაფერი ვთქვათ) ფულზე, მაშინ რეაქცია უნდა იყოს უფრო მკაცრი!“
- როგორი იყო ალან გაგლოევის პირველი შეხვედრა პუტინთან და რატომ არიან უკმაყოფილო ცხინვალში
- როგორ დააარსა აფხაზეთიდან დევნილმა საქართველოს ახალგაზრდული კავშირი. ვიდეო
- აგვისტო, 2008. რუსეთ-საქართველოს ომის ქრონიკები
ტელეგრამ-არხები დეპუტატის წინააღმდეგ
აღსანიშნავია, რომ აქამდე თავად მაკიევს ბრალს სდებდნენ მიკერძოებასა და პროქართულ პოზიციაში.
ტელეგრამ-არხი kavkaz_leakbez მიუთითებს მაკიევის კავშირზე საქართველოსთან და საყვედურობს მას არაგულწრფელობისთვის:
„შეიძლება ისე ჩანდეს, რომ დეპუტატი ზურაბ მაკიევი მზადაა უარყოს საკუთარი მამაც კი. ბოლოს და ბოლოს, საიდუმლოსგან შორს არის ის, რომ თავად ზურაბ გაიოზოვიჩი თბილისშია დაბადებული, მისი მამა კი ქვემო ქართლიდანაა. მათ, მთელ ოჯახს ასევე უყვარს თავისი ნამდვილი სამშობლო თავდადებული სიყვარულით და დარწმუნებულნი არიან, რომ საქართველოს მომავალი დასავლეთთანაა და არა არა რუსეთთან. და თუ ვინმემ გადაწყვიტა, რომ მაკიევი თავის წერილში საქართველოს ინტერესებს ეწინააღმდეგებოდა, შეცდა. ფაქტობრივად, ის ეწინააღმდეგებოდა რუსეთის ინტერესებს, მოქმედებდა საქართველოში დასავლური ლობის შესაბამისად, რომელიც ითხოვს არ იყოს ფრენები და უვიზო მიმოსვლა საქართველოსა და რუსეთის ფედერაციას შორის.”
„ცხინვალში შიშობენ, რომ მათი სახელმწიფოებრიობა შეიძლება გახდეს ვაჭრობის საგანი“
საქართველოს მოქალაქეებისთვის სავიზო რეჟიმის გაუქმებასა და მოსკოვსა და თბილისს შორის პირდაპირი ფრენების აღდგენაზე ისაუბრა რუსეთში მცხოვრებმა ბლოგერმა ალიკ პუხაევმაც. მისი აზრით, „სამხრეთ ოსეთი შიშობს, რომ მათი სახელმწიფოებრიობა შეიძლება გახდეს ვაჭრობის საგანი, როგორც ეს იყო 1920 წელს რუს და ქართველ ბოლშევიკებს შორის, როგორც ეს იყო 90-იანი წლების დასაწყისში, როდესაც კომუნისტური ელიტა აშენებდა ახალ საქართველოს და ახალ რუსეთს.”
თავის საავტორო ტელეგრამ-არხში პუხაევი წერს, რომ აკვირდება „როგორ იზრდება საქართველოს სიმპათიები რუსეთის მიმართ, მათ შორის ჩრდილოეთ კავკასიაში“:
”ჩრდილოეთ კავკასიელები, რომლებიც ოდესღაც ჩვენი დამოუკიდებლობის პროექტს ზომიერი შურით უყურებდნენ, ახლა იმედგაცრუებულნი არიან იმით, თუ როგორ ვერ შედგა ის.”
„თუ ცხინვალი სტატუსს დაკარგავს, ეს მხოლოდ მისი უმოქმედობის გამო მოხდება“
კიდევ ერთი ანონიმური ტელეგრამ-არხი, რომელიც სამხრეთ ოსეთის პოლიტიკურ ვითარებას აშუქებს, აკრიტიკებს ცხინვალის ამჟამინდელ ხელისუფლებას ინიციატივის ნაკლებობისა და “აზიმუტის” ქმედებებზე ადეკვატური პასუხის არარსებობის გამო:
„რატომ არ არის რეაქცია სამხრეთ ოსეთის ოფიციალური ხელისუფლების მხრიდან, სად არის საგარეო საქმეთა სამინისტროს რეაქცია – უნდა დაველოდოთ, სანამ სხვა რუსული კომპანიები დაიწყებენ სამხრეთ ოსეთის ქვეყნების სიიდან ამოღებას?
ფაქტობრივად, ავიაკომპანიის ქმედებებზე ოფიციალური კომენტარი არ გაკეთებულა. ამის შესახებ არც სამხრეთ ოსეთის პრეზიდენტი და არც პარლამენტის თავმჯდომარე არ საუბრობენ.“
მაგრამ დეპუტატმა დავით სანაკოევმა განაცხადა:
„რუსეთს აქვს უფლება იმოქმედოს საკუთარი ინტერესებიდან გამომდინარე. ახლა ისეთი ვითარებაა, რომ სამხრეთ ოსეთსა და რუსეთს შორის ეკონომიკური, სოციალური და პოლიტიკური კავშირები პრაქტიკულად არ არსებობს და შეიძლება აღმოჩნდეს ისე, რომ ამ სივრცეებში საქართველოს ყოფნა ბევრად მომგებიანი იქნება, ვიდრე ჩვენი“.
სანაკოევი თვლის, რომ თუ სამხრეთ ოსეთი დაკარგავს სტატუსს, „ეს იქნება მხოლოდ საკუთარი თავის, მისი უმოქმედობის გამო.“
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
