დიდი ბრიტანეთის შემდეგ ვახტანგ გომელაური აშშ-მაც დაასანქცირა და მაგნიტსკის სიაში შეიყვანა
აშშ-ს სანქციები
დიდი ბრიტანეთის შემდეგ ვახტანგ გომელაური აშშ-მაც დაასანქცირა და მაგნიტსკის სიაში შეიყვანა. მასთან ერთად სანქცირებულია განსაკუთრებულ დავალებათა დეპარტამენტის დირექტორის მოადგილე, მირზა კეზევაძე. სახაზინო დეპარტამენტმა მათ ფინანსური სანქციები დაუწესა.
აშშ-ის სახაზინო დეპარტამენტმა გომელაურსა და კეზევაძეს სანქციები მედიის წარმომადგენლების, ოპოზიციისა და დემონსტრანტების მიმართ სასტიკის რეპრესიების გამო დაუწესა. როგორც დეპარტამენტი მიუთითებს, აღნიშნული ქმედება გაერთიანებულ სამეფოსთან იყო შეთანხმებული.
“საქართველოში არჩევნების შემდეგ შინაგან საქმეთა სამინისტროს წამყვანმა ოფიციალურმა პირებმა სასტიკი რეპრესიები დაიწყეს საკუთარი ხალხის წინააღმდეგ, მათ შორის ჟურნალისტებზე მიზანმიმართული თავდასხმა და ძალადობა”, – განაცხადა ტერორიზმისა და ფინანსური დაზვერვის საკითხებში ხაზინის მდივნის მოვალეობის შემსრულებელმა, ბრედლი ტ. სმითმა.
სანქცირებული პირების ქონება და ქონებრივ ინტერესები, რომლებიც შეერთებულ შტატებში ან აშშ-ს პირების მფლობელობაშია, დაბლოკილია.
დიდი ბრიტანეთისა და ჩრდილოეთ ირლანდიის გაერთიანებულმა სამეფომ, 19 დეკემბერს, ხუთ ქართველ მაღალჩინოსანს სანქციები დაუწესა. დასანქცირებულთა შორის არიან, საქართველოს შინაგან საქმეთა მინისტრი ვახტანგ გომელაური და მისი მოადგილე, განსაკუთრებულ დავალებათა დეპარტამენტის უფროსი “ხარება” და მისი მოადგილე და თბილისის პოლიციის უფროსი.
ბრიტანეთის მთავრობის განმარტებით, ეს ხუთი ქართველი მაღალჩინოსანი პასუხისმგებელია ჟურნალისტებსა და მშვიდობიან მომიტინგეებზე ძალადობრივ თავდასხმებზე.
სანქციები მოჰყვა დიდი ბრიტანეთის გასულ კვირას მიღებულ გადაწყვეტილებას, შეაჩეროს საქართველოს მთავრობის მხარდაჭერის ყველა პროგრამა, მათ შორის, თავდაცვის სექტორში. ასევე, შეზღუდოს თანამშრომლობა “ქართულ ოცნებასთან”.
ოფიციალურ განცხადებაში ნათქვამია, რომ სანქციები მომზადდა შეერთებულ შტატებთან კოორდინირებული ქმედებების ფარგლებში.
● 5 დეკემბერს ქართულ თემაზე მომუშავე ჟურნალისტი ალექს რაუფოღლუ, აშშ-ს სახელმწიფო მდივნის, ენტონი ბლინკენის კომენტარს ავრცელებს, რომელშიც ვკითხულობთ, რომ შეერთებული შტატები ემზადება მათ ხელთ არსებული ინსტრუმენტების გამოსაყენებლად, მათ შორის სანქციებისთვის.
● მანამდე, აშშ-ს სახაზინო დეპარტამენტმა ძალოვნები, ზვიად ხარაზიშვილი, იგივე ხარება და მისი მოადგილე მილერი ლაგაზაური, ასევე პრორუსული “კონსერვატიული მოძრაობის” ლიდერები, კოკა მორგოშია და ზურა მახარაძე 16 სექტემბერს დაასანქცირა.
ასევე, სახელმწიფო დეპარტამენტმა საქართველოს მთავრობისა და პარლამენტის 60-ზე მეტ წევრს, მათ შორის მათ ოჯახის წევრებს “დემოკრატიის ხელყოფისთვის” სავიზო შეზღუდვები დაუწესა. აღსანიშნავია, რომ “ხარებას” მსგავსად მისი მარჯვენა ხელიც ე.წ. მაგნიტსკის სიაში დაამატეს. ორივე მაღალჩინოსნის სახელი რუსული კანონის მოწინააღმდეგეების მიმართ ჩადენილ ძალადობას უკავშირდება.
ამერიკის შეერთებული შტატების ხაზინის დეპარტამენტში აცხადებენ, რომ დაიბლოკება აღნიშნული პირების ყველა საკუთრება და აქტივები, რომელიც აშშ-ში აქვთ, ან ფლობენ მათ ისეთ ქვეყნებში, რომელიც აშშ-ის იურისდიქციის ქვეშ ექცევა.
● მანამდე სახელმწიფო დეპარტამენტმა სანქციების პაკეტი გამოაცხადა 6 ივნისს, რომელიც გულისხმობს სავიზო შეზღუდვებს და პირველ ეტაპზე მოიცავდა დაახლოებით 30 ადამიანს.
● აღსანიშნავია, რომ საქართველოში მიმდინარე პოლიტიკურ მოვლენებთან დაკავშირებით, 4 დეკემბერს, ამერიკის შეერთებული შტატების ჰელსინკის კომისიის თავმჯდომარემ, ჯო უილსონმა საგანგებო განცხადება გაავრცელა.
უილსონი სახელმწიფო დეპარტამენტს და ევროპულ მოკავშირეებს მოუწოდებს, თბილისის მერს, შინაგან საქმეთა მინისტრსა და “რეპრესიების ორგანიზებაზე პასუხისმგებელ ყველა პირს” პერსონალური სანქციები დაუწესონ.
