"ქართული ოცნების" დეპუტატი ამბობს, რომ აშშ-ს არჩევნებში მიცვალებულმა გაიმარჯვა. რა მოხდა სინამდვილეში?

აშშ-ს არჩევნებში მიცვალებულმა გაიმარჯვა

“ქართული ოცნების” დეპუტატი, ირაკლი ზარქუა ტელეკომპანია “იმედის” ეთერში აშშ-ში ჩატარებულ შუალედურ არჩევნებს ეხმაურება და ამბობს, რომ “ამერიკაში გარდაცვლილი კაცი აურჩევიათ და თუ არის საშუალება, მე ამას დავგმობდი, რადგან შემაშფოთებელია.”

რა მოხდა სინამდვილეში

ამერიკის შეერთებული შტატებში, პენსილვანიის შტატში შუალედურ არჩევნებზე, ერთი თვით ადრე გარდაცვლილმა დემოკრატმა ენტონი დელუკამ ხმების 85%-ზე მეტი მოპიოვა და არჩევნებში გაიმარჯვა.

საქმე იმაშია, რომ გარდაცვალების მომენტისთვის საარჩევნო ბიულეტენების შეცვლა ან მისი ადგილისთვის სხვა კანდიდატის წამოყენება უკვე დაგვიანებული აღმოჩნდა. მიუხედავად იმისა, რომ მისმა ოპონენტმა ხმების 14 პროცენტზე მეტი აიღო, დელუკას ამგვარმა გამარჯვებამ პენსილვანიაში სპეციალური არჩევნების დანიშვნა გამოიწვია, რომელიც მოგვიანებით გაიმართება, თუმცა ზუსტი დრო ჯერ-ჯერობით უცნობია.

“მიუხედავად იმისა, რომ ჩვენ წარმოუდგენლად ვწუხვართ ტონი დელუკას დაკარგვის გამო, ჩვენ ვამაყობთ, რომ ამომრჩევლები მას კვლავ ენდობიან და აგრძელებენ დემოკრატიული ღირებულებების მიმართ ერთგულების გამოხატვას მისი კიდევ ერთხელ არჩევით”. – ნათქვამია პენსილვანიის წარმომადგენელთა პალატაში დემოკრატთა კომიტეტის Tweet-ზე.

აშშ-ში მსგავსი შემთხვევა ადრეც დაფიქსირებულა. კერძოდ, 2018 წელს რესპუბლიკელმა დენის ჰოფმა მოიპოვა ადგილი ნევადის სენატში მიუხედავად იმისა, რომ ისიც არჩევნებამდე ერთი თვით ადრე გარდაიცვალა. თუმცა პენსილვანიისგან განსხვავებით, ნევადის შტატის კანონმდებლობის გამო ნევადაში ხელახალი სპეციალური არჩევნები არ დანიშნულა.

“მერამდენე დღეა, ხომ? რამდენიმე დღის წინ ჩატარდა არჩევნები აშშ-ში. ჩვენ გვაინტერესებს იმიტომ, რომ ჩვენი მთავარი სტრატეგიული პარტნიორები არიან და იქ რაც ეუთო ოდირის დასკვნა მოვისმინეთ და ჩანაწერი – სადაც არის პოლარიზაცია, სადაც არის მოსყიდვა, სადაც არის დაშინება, სადაც, რაღა შორს წავიდეთ, გარდაცვლილი ადამიანი აურჩევიათ, ნუ, არ ვიცი, ეს თუ სიმართლეა, ჩვენთან, ქე მაინც, გარდაცვლილები ხმას აძლევენო და იქ საერთოდ გარდაცვლილი აურჩევიათ. შემაშფოთებელია და მე, რა ვიცი, თუ არის საშუალება, ალბათ დავგმობდი.” – განაცხადა ზარქუამ.

მისივე თქმით, საქართველო, მიუხედავად იმ ახალგაზრდა დემოკრატიული პროცესებისა, როგორც აღმოჩნდა, ეუთო/ოდირის დასკვნის მიხედვით, გაცილებით წინ ყოფილა და “კიდევ ერთხელ, ამით ამაყი ვარ.”

“მე ვისურვებდი და ვუსურვებ აშშ-ს, რომ ის რეკომენდაციები, რაც არის, მათ შორის, ეუთო/ოდირის, არცერთი არ ჰქონია შესრულებული და დროულად შეასრულონ. ეს არ არის ირონიულად ნათქვამი, ჩვენ გვინდა, რომ ჩვენი პარტნიორი იყოს მაგალითის მომცემი.” – აღნიშნა ზარქუამ. 

● 10 წელი “ქართულ ოცნებასთან”. სხვადასხვა სფეროს ექსპერტები ოცნების მმართველობას აფასებენ
● მედია, პოლიტიკური დევნა, სააკაშვილი და სხვა – ევროპარლამენტმა საქართველოზე კომპრომისული რეზოლუცია მიიღო
● გადამწყვეტი 180 დღე. რა უნდა მოასწროს საქართველომ დეკემბრამდე, თუ ევროკავშირთან დაახლოება უნდა

ამერიკის შეერთებულ შტატებში გამართულ შუალედურ არჩევნებში, მას შემდეგ, რაც ნევადაში დემოკრატმა კეტრინ კორტეს მასტომ გაიმარჯვა, სენატში დემოკრატებმა რაოდენობა 50-მდე შეავსეს, ხოლო ვიცე-პრეზიდენტ კამალა ჰარისის დამატებითი ერთი ხმით, 6 დეკემბერს ჩანიშნული ჯორჯიის მეორე ტურის შედეგების მიუხედავად, სენატში უმრავლესობას დემოკრატები შეინარჩუნებენ. 

რაც შეეხება წარმომადგენელთა პალატას, მართალია, რესპუბლიკელები განაგრძობდნენ ლიდერობას, თუმცა ჯერ ხმები ისეთ ადგილებში არაა დათვლილი, სადაც ტრადიციულად დემოკრატები იმარჯვებენ ხოლმე. საბოლოო შედეგების გამოცხადებას შესაძლოა რამდენიმე დღე დასჭირდეს.