აშშ-ის ელჩი: როცა მეგობარი შეშფოთებულია და ოკუპანტი გიწონებს, უნდა დაისვას კითხვა - კარგია თუ არა

აშშ-ის ელჩი რუსულ კანონზე

“როცა ვსაუბრობთ კანონპროექტზე, რომელზეც შეშფოთება გამოხატა შენმა პარტნიორმა, მეგობარმა, ხოლო შენმა ოკუპანტმა მოიწონა, ალბათ, უნდა დაისვას კითხვა – არის თუ არა ეს კარგი რამ და კარგი ნიშანი”, – ასე ეხმაურება საქართველოში აშშ-ის ელჩი რობინ დანიგანი “ქართული ოცნების” მიერ რუსული კანონის ხელახალ ინიციირებას.

ელჩის თქმით, რუსული კანონის მიღება საქართველოს ევროპულ გზას დააშორებს და ნეგატიურად აისახება არასამთავრობო ორგანიზაციებზე. ამასთან, ელჩმა აღნიშნა, რომ ოცნების მიერ ინიცირებულ კანონპროექტსა და აშშ-ში მოქმედ FARA-ს შორის მსგავსება საერთოდ არ არის.

რა თქვა რობინ დანიგანმა

“აშშ-მ ძალიან მკაფიოდ დააფიქსირა თავისი შეშფოთება და პოზიცია, როგორც საჯაროდ ისე პირად საუბრებში ამ კანონპროექტის შესახებ, რომ თუ იგი იქნება მიღებული ეს საქართველოს დააშორებს თავის ევროპულ გზას და ამავდროულად, ამ კანონის მიღება ნეგატიურად აისახება არასამთავრობო ორგანიზაციებზე, რომლებიც ყოველდღიურად მუშაობენ იმისთვის, რომ სიკეთე მოუტანონ საზოგადოებას და მოსახლეობას. ასევე უნდა აღინიშნოს, რომ აშშ არ არის მარტო ამ პოზიციაში და ამ შეშფოთებას იზიარებს ევროკავშირი, ევროსაბჭო, ნატო, ევროპარლამენტი, ცალკეული ევროპული ქვეყნები – მათაც მიაჩნიათ რომ კანონის მიღებას ექნება ნეგატიური გავლენა საქართველოს ევროპულ გზაზე.

როდესაც ვსაუბრობთ კანონპროექტზე, რომლის შესახებ შეშფოთება გამოხატა შენმა პარტნიორმა, მეგობარმა, ხოლო შენმა ოკუპანტმა ის მოიწონა, ალბათ უნდა დაისვას კითხვა – არის თუ არა ეს კარგი რამ და კარგი ნიშანი.

რაც შეეხება კანონმდებლობის მსგავსებას ამერიკულთან, მინდა გითხრათ,რომ ეს საერთოდ არ არის მსგავსი კანონი. აშშ მიესალმება არასამთავრობო ორგანიზაციების საქმიანობას. ის რასაც თქვენ ახსენებთ, მიემართება ლობისტ ორგანიზაციებს, კომპანიებს თუ პირებს, რომელიც მიემართება სხვა ქვეყნების სასარგებლოდ და მათ აქვთ მოვალეობა რომ დარეგისტრირდნენ კონკრეტულ რეესტრში.

ასე რომ ამ კანონის ამერიკულთან მსგავსებაზე საუბარი არ არის, მე იმედი მაქვს რომ ჩვენ ქართველ ხალხთან, მთავრობასთან და სამოქალაქო საზოგადოებასთან ერთად მუშაობით გავაგრძელებთ საქართველოს ევროპული გზის მხარდაჭერას”, – აღნიშნა ელჩმა. 

● სახდეპი რუსულ კანონზე: საქართველოს ევროპული გზიდან გადაიყვანს, შეზღუდავს დამოუკიდებელ მედიას
● სახდეპი რუსულ კანონზე: საქართველოს ევროპული გზიდან გადაიყვანს, შეზღუდავს დამოუკიდებელ მედიას
● “რუსული კანონის მიღების შემთხვევაში, საქართველო ევროკავშირის წევრი ვერ გახდება” – კომენტარი

● 3 აპრილს ცნობილი გახდა, რომ არასამთავრობო ორგანიზაციების “ფინანსების გამჭვირვალობაზე” მმართველი პარტია რუსულ კანონს ხელახლა აინიციირებს. ამის შესახებ “ქართული ოცნების” ფრაქციის თავმჯდომარემ, მამუკა მდინარაძემ სპეციალურ ბრიფინგზე განაცხადა.

● ხელისუფლების მთავარი არგუმენტი მდგომარეობს იმაში, რომ საქართველოში მოქმედი არასამთავრობო ორგანიზაციების გამჭვირვალობა კითხვის ნიშნის ქვეშ დგას, რაც საფრთხეს უქმნის ქვეყნის უსაფრთხოებას. თუმცა, ამ არგუმენტის არც დამოუკიდებელ ექსპერტებს, არც ოპოზიციას და არც სამოქალაქო საზოგადოებას არ სჯერა. ექსპერტები აღნიშნავენ, რომ ამგვარად “ქართული ოცნება” ხელისუფლებაში ყოფნის გახანგრძლივებას ცდილობს და ნიადაგს იმზადებს 2024 წლის ოქტომბრის საპარლამენტო არჩევნებისთვის, რათა ალტერნატიული აზრი ქვეყანაში ჩაახშოს.

● ერთხელ ე.წ. უცხოელი აგენტების შესახებ კანონი საქართველოს მმართველმა პარტიამ უკვე დააინიციირა ზუსტად ერთი წლის წინ – გასული წლის მარტში. მაშინ კანონი პირველი მოსმენით პარლამენტში მიიღეს კიდეც, თუმცა “ოცნება” იძულებული გახდა კანონი გაეწვია, რადგან თბილისი მრავალათასიანმა პროტესტმა მოიცვა. ათასობით ადამიანი რამდენიმე დღის განმავლობაში აპროტესტებდა აღნიშნული კანონის მიღებას, რომელსაც საქართველოში “რუსული კანონი” უწოდეს, რადგან იგი რუსეთში მიღებული კანონის ანალოგია.